ଓ୍ୱାଲ୍‌ଟିୟର ବିଭାଜନକୁ ନେଇ ରାଜ୍ୟ ସରକାରଙ୍କୁ ଟାର୍ଗେଟ କଲେ ଧର୍ମେନ୍ଦ୍ର

ଓ୍ୱଲଟିୟର ଡିଭିଜନ ବିଭାଜନ ସମ୍ପର୍କରେ ମନ୍ତବ୍ୟ ଦେଇ ରାଜ୍ୟ ସରକାରଙ୍କୁ ମିଛୁଆ ସରକାର କହିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ର କହିଛନ୍ତି ଯେ, ୨୦୧୪ ମସିହାରେ ଆନ୍ଧ୍ରର ପୁନର୍ଗଠନର ବିଧି ଆଇନରେ ପରିଣତ ହେବା ସମୟରେ ବିଜୁ ଜନତା ଦଳର ବନ୍ଧୁମାନେ ଲୋକସଭା ଓ ରାଜ୍ୟସଭାରେ ଉପସ୍ଥିତ ଥିଲେ । ରେଲ୍‌ୱେ ଜୋନ୍‌ ୱାଲଟିୟରରେ ହେବା ପ୍ରସଙ୍ଗରେ ବିଜେଡିର ସାଂସଦମାନେ ପଦୁଟିଏ ହେଲେ ପାଟି ଫିଟେଇ ନଥିଲେ । ସେତେବେଳେ ଚୁପ୍‌ ରହି ଆଜି କୁମ୍ଭୀର କାନ୍ଦଣା କାନ୍ଦୁଛନ୍ତି ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଶ୍ରୀ ପ୍ରଧାନ ପ୍ରଶ୍ନ କରିଛନ୍ତି ଯେ, ରାୟଗଡାରେ ରେଳ ଡିଭିଜନ ହେବା ନେଇ ବିଜେଡିର ଏତେ ରାଗ କାହିଁକି ? ରାୟଗଡାରେ ରେଳ ଡିଭିଜନ ହେବା ନେଇ କାହିଁକି ବିରୋଧ କରାଯାଉଛି । ଯେତେବେଳେ ପ୍ରଧାନମନ୍ତ୍ରୀ  କୋରାପୁଟ, ରାୟଗଡା, ମାଲକାନଗିରି ଏବଂ ନବରଙ୍ଗପୁରକୁ ଆକାଂକ୍ଷୀ ଜିଲ୍ଲା ଭାବେ ପ୍ରସ୍ତାବ ଦେଲେ,  ସେତେବେଳେ ରାଜ୍ୟ ସରକାର ଏହାକୁ ବିରୋଧ କରିଥିଲେ ବୋଲି କହିଛନ୍ତି ଧର୍ମେନ୍ଦ୍ର । ଏବେ ସେହି ସମାନ ଢଙ୍ଗରେ ରାୟଗଡାରେ ରେଳ ଡିଭିଜନ ହେବା ବେଳେ ଏହାକୁ ବିରୋଧ କରାଯାଉଛି । ବିରୋଧ କରିବା ଛଳରେ ଓଡିଶାର ପ୍ରଗତିକୁ ନରେନ୍ଦ୍ର ମୋଦି ଯେଉଁ ଗତି ଦେଉଛନ୍ତି ତାକୁ ରାଜ୍ୟ ସରକାର ବାଧା ଦେଉଛନ୍ତି ବୋଲି କହିଛନ୍ତି ଧର୍ମେନ୍ଦ୍ର ।

ଖୋର୍ଦ୍ଧା-ବାଲାଙ୍ଗୀର ରେଳ ପ୍ରକଳ୍ପ ପାଇଁ ଏବେ ସୁଦ୍ଧା ଜମି ଅଧିଗ୍ରହଣ ହୋଇନାହିଁ ବୋଲି ସମାଲୋଚନା କରିଛନ୍ତି ଧର୍ମେନ୍ଦ୍ର ।