ଗୋପ୍‌ରେ ଗର୍ଜିଲେ ଧର୍ମେନ୍ଦ୍ର: ପୁରୀରେ ଅଧା ଡାକ୍ତର ପଦବୀ ଖାଲି ପଡ଼ିଛି, ଏହାର ଜବାବ ଦିଅନ୍ତୁ ସରକାର

ଗୋପ୍‌: ପୁରୀ ଜିଲ୍ଲା ଗୋପ୍‌ରେ ବିଜେପିର ‘ଜବାବ ମାଗୁଛି ଓଡ଼ିଶା’ କାର୍ଯ୍ୟକ୍ରମରେ ଯୋଗଦେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରଜ୍ୟ ସରକାରଙ୍କ ବିଫଳତା ପୁଣି ବଖାଣିଛନ୍ତି । ଗୋପ୍‌ରେ ନିଜ ଭାଷଣ ଆରମ୍ଭ କରିବା ପୂର୍ବରୁ ଧର୍ମେନ୍ଦ୍ର ଓଡ଼ିଶା ମାଟିର ବୀର ସହୀଦ୍‌ଙ୍କୁ ମନେପକାଇଛନ୍ତି । ସେ ଏହି ଅବସରରେ କହିଛନ୍ତି ଯେ, ରାଜ୍ୟ ସରକାର ଏବେ ସମ୍ପୁର୍ଣ୍ଣ ଦୁର୍ନୀତି ଗ୍ରସ୍ତ । ଚିଟ୍‌ଫଣ୍ଡ ଠାରୁ ଆରମ୍ଭ କରି ପିସି ପର୍ଯ୍ୟନ୍ତ ସବୁ ପ୍ରକାର ଘୋଟାଲାରେ ରାଜ୍ୟ ସରକାରଙ୍କ ସମ୍ପୃକ୍ତି ରହିଛି । ଆଗାମୀ ନିର୍ବାଚନରେ ଏହି ଦୁର୍ନୀତିଗ୍ରସ୍ତ ସରକାରଙ୍କୁ ଗାଦିଚ୍ୟୁତ କରିବାକୁ ସେ ଗୋପବାସୀଙ୍କୁ ଆହ୍ୱାନ୍‌ ଦେଇଛନ୍ତି । ସେ ଚାଷୀ ଓ ଚାଷ କଥା କହି ରାଜ୍ୟ ସରକାରଙ୍କୁ ଲୋକଙ୍କ ହଳିଆ ବୋଲି କହିଛନ୍ତି । ସେ କହିଛନ୍ତି ହଳିଆକୁ ବର୍ଷ ଶେଷରେ ଯେଭଳି ଚାଷର ହିସାବ ମଗାଯାଏ ସେହିଭଳି ଏହି ସରକାରକୁ ମଧ୍ୟ ହିସାବ ମାଗିବାର ସମୟ ଆସିଛି ।

ଏହି କାର୍ଯ୍ୟକ୍ରମରେ ରାଜ୍ୟ ସରକାରଙ୍କ ଅନେକ ବିଫଳତା ଲୋକଙ୍କ ଆଗରେ ରଖିଛନ୍ତି ଧର୍ମେନ୍ଦ୍ର । ପୁରୀ ଜିଲ୍ଲାରେ ସ୍ୱାସ୍ଥ୍ୟ ସେବା ସମ୍ପୁର୍ଣ୍ଣ ବିଗିଡ଼ି ଯାଇଥିବା କହି ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି । ପୁରୀରେ ଅନେକ ଡାକ୍ତରଖାନା ଥିବା ବେଳେ ଏଠି ଡାକ୍ତରଙ୍କ ଘୋର ଅଭାବ ରହିଛି । ଏଭଳି ପରିସ୍ଥିତିରେ ସ୍ୱାସ୍ଥ୍ୟ ସେବା ଚାଲିଥିଲେ ମଧ୍ୟ ରାଜ୍ୟ ସରକାର କୁମ୍ଭକର୍ଣ୍ଣ ନିଦରେ ଶୋଇଛନ୍ତି । ପୁରୀ ଜିଲ୍ଲାରେ କାହିଁକି ଆଜି ଅଧା ଡାକ୍ତର ପଦବୀ ଖାଲି ପଡ଼ିଛି ବୋଲି ରାଜ୍ୟ ସରକାରଙ୍କୁ ସେ ଜବାବ ମାଗିଛନ୍ତି ।

ସେ ଆହୁରି ମଧ୍ୟ କହିଛନ୍ତି ଦୀର୍ଘ 19 ବର୍ଷ ଧରି ଏହି ନବୀନ ସରକାର ଶାସନ କଲା ପରେ ମଧ୍ୟ ଆଜି ବି ରାଜ୍ୟରେ ଲୋକଙ୍କୁ ପାଇବା ପାଣି ଟୋପାଏ ସୁବିଧାରେ ମିଳୁନାହିଁ । ପାଇପ ଯୋଗେ ପିଇବା ପାଣି ଯୋଗାଇବାରେ ସରକାର ସମ୍ପୁର୍ଣ୍ଣ ବିଫଳ ହୋଇଥିବା ଧର୍ମେନ୍ଦ୍ର ଅଭିଯୋଗ କରିଛନ୍ତି । କାହିଁକି ଲୋକଙ୍କୁ ପାଇପ୍‌ ଯୋଗେ ସୁବିଧାରେ ପାଣି ଯୋଗାଇ ଦିଆଯାଇନାହିଁ, ରାଜ୍ୟ ସରକାରଙ୍କୁ ତାର ଜବାବ ମାଗିଛନ୍ତି ଧର୍ମେନ୍ଦ୍ର । ଆହୁରି ମଧ୍ୟ କହିଛନ୍ତି ଯେ, ପୁରୀ ଜିଲ୍ଲାରେ ଯେତିକି ପାଣି ରହିଛି ତାର ସଂରକ୍ଷଣ ବ୍ୟବସ୍ଥା ଯଦି ରାଜ୍ୟ ସରକାର କରିଥାନ୍ତେ ତେବେ ଆଜି ଗୋଟିଏ ବି ଚାଷୀ ହତାଶ ହୋଇନଥାନ୍ତେ । ଏହି ପୁରୀର ଚାଷୀ ଭାଇମାନେ ଯଦି ସଠିକ୍‌ ଜଳସେଚନର  ସୁବିଧା ପାଇପାରନ୍ତେ ତେବେ ସାରା ରାଜ୍ୟକୁ ପନିପରିବା ଯୋଗାଇବାର କ୍ଷମତା ତାଙ୍କର ରହିଛି ବୋଲି କହିଛନ୍ତି ଧର୍ମେନ୍ଦ୍ର । ଖାଲି ସେତିକି ନୁହେଁ ଜଳ ସେଚନରେ ସୁବିଧା ନଥିବା ବେଳେ ଏଠାରେ ଚାଷୀଙ୍କ ପାଇଁ କୋଲ୍ଡ ସ୍ଟୋରେଜ୍‌ର ସୁବିଧା ମଧ୍ୟ ନାହିଁ । ଯାହା ଫଳରେ ଚାଷୀ ଭାଇମାନେ ନାନା ହଇରାଣ ହେଉଛନ୍ତି ।

ମହାନ ସ୍ୱାଧୀନତା ସଂଗ୍ରାମୀ ଜୟୀ ରାଜଗୁରୁ, ଚାଖି ଖୁଣ୍ଟିଆ ଓ ବକ୍ସି ଜଗବନ୍ଧୁଙ୍କ ଜନ୍ମ ମାଟି ପୁରୀ ଜିଲ୍ଲାର ଗୋପ ବ୍ଲକରେ ଆୟୋଜିତ ଜବାବ ମାଗୁଛି ଓଡିଶା ଅଭିଯାନ କାର୍ଯ୍ୟକ୍ରମରେ ଯୋଗ ଦେଲି । pic.twitter.com/uWLrOUqCVk

— Dharmendra Pradhan (@dpradhanbjp) January 30, 2019

ସେ ଏହି ଅବସରେ ଶିକ୍ଷକଙ୍କ କଥା ମଧ୍ୟ ଉଠାଇଛନ୍ତି । ସେ କହିଛନ୍ତି ଏହି ସରକାର ଶିକ୍ଷକମାନଙ୍କୁ ଦରମା ଦେଇପାରୁ ନାହାନ୍ତି । କିନ୍ତୁ ବାହାରୁ ସୁପରଷ୍ଟାର ଆଣି କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ଶିକ୍ଷକମାନେ ଏହି ରାଜ୍ୟରେ ଅବହେଳିତ ହୋଇ ରହିଛନ୍ତି ।

ଏମିତିକି ବିଜୁଳି ଯୋଗାଇବାରେ ମଧ୍ୟ ରାଜ୍ୟ ସରକାର ବିଫଳ ହୋଇଥିବା କହିଛନ୍ତି ଧର୍ମେନ୍ଦ୍ର । ପୁରୀରେ 24 ଘଣ୍ଟା ବିଜୁଳି ରହୁନଥିବା କଥା କହି ରାଜ୍ୟ ସରକାରଙ୍କୁ ଏହାର ଜବାବ ମାଗିଛନ୍ତି ଧର୍ମେନ୍ଦ୍ର ।

କେନ୍ଦ୍ର ସରକାରଙ୍କ ସ୍ୱଚ୍ଛଭାରତ ଯୋଜନା ହେଉ କିମ୍ବା ପ୍ରଧାନମନ୍ତ୍ରୀ ଆବାସ ଯୋଜନା, ପ୍ରତ୍ୟେକ ସରକାରୀ ଯୋଜନାର ଫାଇଦା ଉଠାଇବାକୁ ହେଲେ ଏଠି ପିସି ଦେବାକୁ ପଡ଼ୁଛି ବୋଲି ସେ କହିଛନ୍ତି । ତେଣୁ ଏଭଳି ଦୁର୍ନୀତିଗ୍ରସ୍ତ ସରକାରଙ୍କୁ ଏବେ ଜବାବ ମାଗିବାର ସମୟ ଆସିଛି । ଏହି ଦୁର୍ନୀତିର ଓ ସମସ୍ୟାର ସମାଧାନ ହେଉଛି ଏହି ସରକାରଙ୍କୁ ଗାଦିଚ୍ୟୁତ କରିବା ବୋଲି ଧର୍ମେନ୍ଦ୍ର ଗୋପବାସୀଙ୍କୁ ଆହ୍ୱାନ ଦେଇଛନ୍ତି ।