ମୌଳିକ ସୁବିଧାରୁ ବଞ୍ଚିତ ଜାମପଡ଼ା ଗ୍ରାମବାସୀ

କଳାହାଣ୍ଡି:  ସରକାର ଗ୍ରାମାଞ୍ଚଳରେ ଗମନାଗମନ ପାଇଁ ବିଭିନ୍ନ ଯୋଜନା ମାଧ୍ୟମରେ ରାସ୍ତା ଓ ଶିଶୁମାନଙ୍କୁ ପୃଷ୍ଟିକର ଖାଦ୍ୟ ଯୋଗାଇବା ପାଇଁ ଗାଁ ଗାଁରେ ଅଙ୍ଗନୱାଡି କେନ୍ଦ୍ର ସ୍ଥାପନ କରିଛନ୍ତି । ହେଲେ ସ୍ୱାଧିନତାର ଦୀର୍ଘ ୭୨ବର୍ଷ ବିତି ଯାଇଥିଲେ ସୁଦ୍ଧା ଏମିତି ବି ଗାଁ ଅଛି ଯେଉଁଠି ନା ଅଛି ଗମନାଗମନର ସୁବିଧା ନା ଅଛି ଅଙ୍ଗନୱାଡି କେନ୍ଦ୍ର । କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ଭଇଁରିପାଲି ପଞ୍ଚାୟତର ଜାମପଡା ଗାଁରୁ ଦେଖିବା ଏହି ରିପୋର୍ଟ ।

ଜୟପାଟଣା ବ୍ଲକ ଭଇଁରିପାଲି ଗ୍ରାମପଞ୍ଚାତର ଜାମପଡା ଗାଁ । ଏହି ଗାଁରେ ହରିଜନ ଆଦିବାସୀ ତଥା ଅନ୍ୟାନ୍ୟ ସମ୍ପ୍ରଦାୟର ପ୍ରାୟ ୨ଶହରୁ ଉର୍ଦ୍ଧ୍ୱ ଲୋକ ବସବାସ କରନ୍ତି । ହେଲେ ଏହି ଗାଁକୁ ଯିବାକୁ ହେଲେ ନଦୀ ପାର ହୋଇ ଯିବାକୁ ପଡେ । ଗାଁର ଶିଶୁମାନେ ସ୍କୁଲ ଯିବାକୁ ହେଲେ ବିପଦ ସଂକୁଳ ଅବସ୍ଥାରେ ନଦୀ ପାର ହୋଇ ପାଖରେ ଥିବା କଦଳିବାହିଲି ଗ୍ରାମକୁ ପାଠ ପଢିବାକୁ ତଥା ଅଙ୍ଗନୱାଡି କେନ୍ଦ୍ରକୁ ଯାଇଥାନ୍ତି କୁନିକୁନି ପିଲାମାନେ । ଗାଁର ଲୋକେ ପିଡିଏସ ସାମଗ୍ରୀ ଆଣିବାକୁ ନଦୀ ପାର ହୋଇ ଭଇଁରିପାଲି ପଞ୍ଚାୟତକୁ ଯାଇଥାନ୍ତି । ଅନ୍ୟପଟେ ଏହି ଗାଁର କେହି ରୋଗରେ ଆକ୍ରାନ୍ତ କିମ୍ବା ଗର୍ଭବତୀ ହେଲେ ତାଙ୍କୁ ଖଟିଆରେ ବୋହି ନଦୀ ପାର କରି ଦୀର୍ଘ ୪ କି.ମି ନେଲା ପରେ ଆମ୍ବୁଲାନ୍ସରେ ଡାକ୍ତର ଖାନା ନେଉଥିବା ଅଭିଯୋଗ ହୋଇଛି । ଗ୍ରାମରେ ଅଙ୍ଗନୱାଡି କେନ୍ଦ୍ର କରି ଶିଶୁମାନଙ୍କୁ ପୃଷ୍ଟିକର ଖାଦ୍ୟ ଯୋଗାଇ ଦେବା ପାଇଁ ମଧ୍ୟ ଦାବୀ କରିଛନ୍ତି ।

ନିର୍ବାଚନ ସମୟରେ ବହୁ ନେତା ଏହି ଗ୍ରାମକୁ ଆସି ଭୋଟ ଭିକ୍ଷା କରିବା ସହ ରାସ୍ତା କରାଇଦେବାକୁ ପ୍ରତିଶୃତି ଦେଇଥାନ୍ତି । ହେଲେ ନିର୍ବାଚନ ସରିଲା ପରେ ଫଲଶୁନ ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ଏହାସହ ଅନେକ ସମୟରେ ଗ୍ରାମବାସୀ ବ୍ଲକ ପ୍ରଶାସନ ଓ ସ୍ଥାନୀୟ ବିଧାୟକଙ୍କ ଦ୍ୱାରସ୍ଥ ହୋଇ ରାସ୍ତା ଓ ଅଙ୍ଗନୱାଡି ପାଇଁ ଦରଖାସ୍ତ ଦେଇଥିଲେ ସୁଦ୍ଧା କୌଣସି ସୁଫଳ ମିଳିନଥିବା କହିଛନ୍ତି । ଏହି ଗ୍ରାମର ସମସ୍ୟା ସମ୍ପର୍କରେ ଜୟପାଟଣା ବିଡିଓଙ୍କୁ ଯୋଗାଯୋଗ କରିବାରୁ ସେ କଣ କହୁଛନ୍ତି ଆସନ୍ତୁ ଶୁଣିବା ।

ସରକାର ତୁରନ୍ତ ଏହି ଗ୍ରାମ ପ୍ରତି ଦୃଷ୍ଟି ଦେଇ ରାସ୍ତା ତଥା ଅଙ୍ଗନୱାଡି ନକଲେ ଆଗାମୀ ଦିନରେ ବିପଦ ସଂକୁଳ ଅବସ୍ଥାରେ ନଦୀ ପାର ହେଉଥିବା ଶିଶୁଙ୍କ ପ୍ରତି କେବେ ଯେ କୌଣସି ଦୁର୍ଘଟଣା ନହେବ ଏହାକୁ ଏଡାଇ ଦିଆଯାଇନପାରେ ।