ବାଲୁକାକଳା ମାଧ୍ୟମରେ ଆର୍ନ୍ତଜାତୀୟ ଯୋଗ ଦିବସ ଉପଲକ୍ଷେ ସୁଦର୍ଶନ ପଟ୍ଟନାୟକଙ୍କ ଶୁଭେଚ୍ଛା

ପୁରୀ: ଆଜି ଆର୍ନ୍ତଜାତୀୟ ଯୋଗ ଦିବସ । ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତେ ଏହାକୁ ପାଳନ କରିଛନ୍ତି । ତେବେ ସୁସ୍ଥ ଶରୀର ଓ ନିରାପଦ ଶରୀର ଗଠନ ଦିଗରେ ଯୋଗର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥାଏ । ସେପଟେ ପ୍ରକୃତି ସହ ସନ୍ତୁଳନ ରକ୍ଷାକରି ମଣିଷ ନିଜ ଶରୀରକୁ ଗଢି ତୋଳିବାରେ ଯୋଗ ଓ ପ୍ରାଣାୟମ୍ ନିହାତି ଜରୁରୀ। ଅନ୍ୟପଟେ ଆଜି ଆର୍ନ୍ତଜାତୀୟ ଯୋଗ ଦିବସ ଉପଲକ୍ଷେ ବାଲୁକାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଏକ ସୁନ୍ଦର ବାଲୁକାକଳା ନିର୍ମାଣ କରି ଯୋଗ ବିଷୟରେ ବ୍ୟାଖ୍ୟା କରିଥିବା ବେଳେ ପତଞ୍ଜଳୀ ଯୋଗ ସମିତି ପକ୍ଷରୁ ମଧ୍ୟ ଯୋଗ ପାଇଁ ବିରାଟ ଆୟୋଜନ କରାଯାଇଛି ।

ଆଜି ଆନ୍ତର୍ଜାତୀୟ ଯୋଗ ଦିବସ.ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରସ୍ତାବ କ୍ରମେ ଜାତିସଂଘ ଜୁନ୍ ୨୧ ତାରିଖକୁ ବିଶ୍ୱ ଯୋଗ ଦିବସ ଭାବେ ପାଳନ କରିବାକୁ ନିଷ୍ପତ୍ତି ନେବା ପରେ ସାରା ବିଶ୍ୱ ଏହି ଦିନଟିକୁ ଯୋଗ ଦିବସ ରୁପେ ପାଳନ କରିଆସୁଛନ୍ତି । ତେବେ ଚଳିତବର୍ଷ ଯୋଗ ଦିବସର ବିଷୟବସ୍ତୁ ହୃଦୟ ପାଇଁ ଯୋଗ ରହିଥିବା ବେଳେ, ପୁରୀ ବେଳାଭୂମୀରେ ବାଲୁକାକଳା ମାଧ୍ୟମରେ ଶୁଭେଚ୍ଛା ଜଣାଇଛନ୍ତି ଆନ୍ତର୍ଜାତୀୟ ବାଲୁକାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ । ସେ ଏହି ବାଲୁକାକଳାରେ ସୂର୍ଯ୍ୟ ନମସ୍କାରର ବିଭିନ୍ନ ଭଙ୍ଗୀକୁ ଚିତ୍ରଣ କରିବା ସହ ସୁସ୍ଥ ରହିବା ପାଇଁ ଜୀବନରେ ଯୋଗର ଆବଶ୍ୟକତାକୁ ଉପଲବ୍ଧି କରାଇଛନ୍ତି । ପ୍ରାୟ ୭ଟନ୍ ବାଲିରେ ୧୫ଫୁଟ୍ ଉଚ୍ଚତା ବିଶ୍ଷ୍ଟ ଏହି ସୁନ୍ଦର ବାଲୁକାକଳାକୁ ଦେଖିବା ପାଇଁ ବେଳାଭୂମୀରେ ପର‌୍ୟ୍ୟଟକଙ୍କ ବିଡ ଜମୁଛି ।

ଆଜି ଉପଲକ୍ଷେ ପୁରୀରେ ମଧ୍ୟ ପତଞ୍ଜଳୀ ଯୋଗ ସମିତି ଓ ଭାରତ ସ୍ୱାଭିମାନ ପକ୍ଷରୁ ବିଶ୍ୱ ଯୋଗ ଦିବସ ପାଳିତ ହୋଇଯାଇଛି । ଯୋଗ ପାଇଁ ଭାରତ ଆଜି ବିଶ୍ୱ ଗୁରୁ ପାଲଟିଥିବା ବେଳେ,ଏହା ମାଧ୍ୟମରେ ସୁନ୍ଦର ଓ ନିରୋଗ ସ୍ୱାସ୍ଥ୍ୟ ହାସଲ କରିହେବ । ତେଣୁ ଅସୁସ୍ଥ ହେବା ପରେ ଯୋଗ ଆରମ୍ଭ କରିବା ପରିବର୍ତ୍ତେ ସୁସ୍ଥ ସମୟରୁ ଯୋଗ କ୍ରିୟା କରିବା ଦ୍ୱାରା ମଣିଷ ରୋଗର ବଶବର୍ତ୍ତୀ ହେବ ନାହିଁ ବୋଲି ଅନେକ ନଜିର ରହିଛି । ସ୍ୱାସ୍ଥ୍ୟ ହିଁ ସମ୍ପଦ.....ଏହାକୁ ପାଥେୟ କରି ଯୋଗକୁ ନିଜ ଜୀବନରେ ଅପରିହାର୍ଯ୍ୟ ବୋଲି ଧରିନେବା ହିଁ ଉଚିତ୍ ଶିକ୍ଷା ବୋଲି ବାର୍ତ୍ତା ଦିଆଯାଇଛି । ଵିଶ୍ୱ ଯୋଗ ଦିବସରେ ଆଜି ସୁସ୍ଥ ସୁନ୍ଦର ଶରୀର ଗଠନ କରିବା ଉଦ୍ଦେଶ୍ୟ ରହିଥିବା ବେଳେ ବହୁତ ଲୋକ ଏହି ଯୋଗ ଶିବିରରେ ଅଂଶ ଗ୍ରହଣ କରିଛନ୍ତି ।