ହୋଇପାରୁନି ଧାନବିକ୍ରି: ବରଗଡ଼ ଚାଷୀଙ୍କ ଟୋକନ ନବୀକରଣ ପାଇଁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ସୁରେଶ ପୂଜାରୀ

ଭୁବନେଶ୍ୱର:  ବରଗଡ଼ ଜିଲ୍ଲାର ଅନେକ ଚାଷୀ ଧାନବିକ୍ରି ପାଇଁ ମିଳିଥିବା ଟୋକନ ଅବଧି ଶେଷ ହୋଇଯିବା ଯୋଗୁଁ ଧାନବିକ୍ରି କରିପାରିନାହାନ୍ତି । କରୋନା ପ୍ରବାଭରୁ ଶ୍ରମିକ ଅଭାବ, ପରିବହନ ଅସୁବିଧା ସହ ମିଲ ମାଲିକଙ୍କ ମନମୁଖି ଧାନ କିଣା ଯୋଗୁଁ ଚାଷୀମାନେ ଧାନବିକ୍ରି କରିପାରିନାହାନ୍ତି । ଅନେକ ଚାଷୀଙ୍କ ଟୋକନ ଅକାମି ହୋଇଛି । ତେଣୁ ବରଗଡ଼ ଜିଲ୍ଲାର ଚାଷୀମାନଙ୍କ ଧାନବିକ୍ରି ପାଇଁ ଟୋକନ ନବୀକରଣ କରିବାକୁ ଚିଠି ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି ବରଗଡ଼ ବିଜେପି ସାଂସଦ ସୁରେଶ ପୂଜାରୀ ।

ଏହାସହ ସେ ଆହୁରି ଲେଖିଛନ୍ତି, ଜିଲ୍ଲା ପ୍ରଶାସନର ପ୍ରତିଶ୍ରୁତି ସତ୍ତ୍ୱେ ରାଜ୍ୟ ସରକାରଙ୍କ ଯୋଗାଣ ବିଭାଗ ପକ୍ଷରୁ ଟୋକନ ନବୀକରଣ କରାଯାଇନାହିଁ । ସେଥିପାଇଁ ଚାଷୀମାନେ ଅସୁବିଧାରେ ପଡ଼ୁଛନ୍ତି । ନିୟନ୍ତ୍ରିତ ବଜାର କମିଟିର ସୀମିତ  ଭିତ୍ତିଭୂମି ଓ ବର୍ଷା ଯୋଗୁଁ ଚାଷୀମାନଙ୍କ ଧାନ ନଷ୍ଟ ହେବାରେ ଲାଗିଛି । ରବି ଧାନ ବିକ୍ରୟରେ ବିଳମ୍ବ ହେଉଥିବାରୁ ଖରିଫ୍‌ ଫସଲର ପ୍ରସ୍ତୁତି ବାଧାପ୍ରାପ୍ତ ହେଉଛି । ଏଭଳି ତମାମ ଅସୁବିଧା ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଇଛନ୍ତି ସୁରେଶ ପୂଜାରୀ ।

ଏହିସବୁ ସମସ୍ୟା ପ୍ରତି ଗୁରୁତ୍ୱ ଦେବାସହ ଏହାର ସମାଧାନ ପାଇଁ ଉଚିତ ପଦକ୍ଷେପ ନେବା ସହ ଚାଷୀଙ୍କ ଧାନବିକ୍ରି ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେବାକୁ ଜଣାଇଛନ୍ତି ସାଂସଦ ସୁରେଶ ପୂଜାରୀ ।