ଓଡ଼ିଶାରେ ଖୁବଶୀଘ୍ର ଲାଣ୍ଡ କରିବେ ବିଜେପିର ଦୁଇ ହେବିଓ୍ୱେଟ୍‌, ଧାର୍ଯ୍ୟ ହୋଇସାରିଛି ତାରିଖ

ଭୁବନେଶ୍ୱର: ଆସନ୍ତା ସାଧାରଣ ନିର୍ବାଚନ ପାଇଁ ରାଜନୈତିକ ଦଳଗୁଡ଼ିକ ମଧ୍ୟରେ ଆରମ୍ଭ ହୋଇଛି ନିର୍ବାଚନୀ କସରତ୍‌ । ସତ୍ତାକୁ ଆସିବାକୁ ନେଇ ସର୍ତ୍ତ ମଧ୍ୟ ଲମ୍ବି ଚାଲିଛି । ଅନ୍ୟପଟେ ନିର୍ବାଚନୀ ପ୍ରଚାର ପାଇଁ ଦଳ ଖେଳିଲେଣି ଟ୍ରମ୍ପକାର୍ଡ । ନିର୍ବାଚନ ପ୍ରଚାରରେ ଜନତାଙ୍କୁ ଆକୃଷ୍ଟ କରିବା ପାଇଁ ରାଜନୈତିକ ଦଳ ଆପଣେଇଲେଣି ନୂଆ ପନ୍ଥା ।

ଏହାରି ଭିତରେ ବିଜେପି ନିଜର ହେବିଓ୍ୱେଟ୍‌ ନେତାଙ୍କୁ ଆଣି ଓଡ଼ିଶା ମାଟିରେ ଲାଣ୍ଡ କରାଇବାକୁ ପ୍ରସ୍ତୁତ କରିସାରିଛି ବ୍ଲୁ ପ୍ରିଣ୍ଟ । ରାଜ୍ୟରେ ନେତାମାନଙ୍କୁ ସଙ୍ଗଠିତ କରି ଗ୍ରାଉଣ୍ଡ ଜିରୋରେ ବିଜେପିର ସ୍ଥିତି ସୁଦୃଢ କରୁଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ରାଜ୍ୟ ସରକାରଙ୍କ ଅପାରଗତାକୁ ଟାର୍ଗେଟ କରି ଲୋକଙ୍କ ପାଖରେ କେନ୍ଦ୍ରର ଜନ ହିତକର ଯୋଜନାକୁ ନେଇ ପହଞ୍ଚୁଛି ବିଜେପି ।

କିନ୍ତୁ ଏହି ସ୍ୱରକୁ ଆଉ ଟିକେ ଶାଣୀତ କରିବା ପାଇଁ ହେବିଓ୍ୱେଟ୍‌ ନେତାଙ୍କ ସାହାରା ନେବାକୁ ଦଳ ମଧ୍ୟ ଆଶାବାଦୀ । ତେଣୁ ୟୁପିର ମୁଖ୍ୟମନ୍ତ୍ରୀ ତଥା ‘ଗବରଶେର’ ନାମରେ ପରିଚିତ ଯୋଗୀ ଆଦିତ୍ୟନାଥ ଓଡ଼ିଶାରେ ଲାଣ୍ଡ କରିବାକୁ ନେଇ ବିଜେପି କର୍ମୀ ତଥା ରାଜ୍ୟବାସୀଙ୍କ ମନରେ ସୃଷ୍ଟି  ହୋଇଛି ଉତ୍ସାହ । ଏହାସହ ସବୁବେଳେ ଆକ୍ସନ ମୁଡରେ ଥିବା କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ ମଧ୍ୟ ଓଡ଼ିଶା ଆସିବା ନେଇ ତାରିଖ ଧାର୍ଯ୍ୟ ହୋଇଛି ।

ତେବେ ଫେବୃଆରୀ ୧୭ ତାରିଖରେ ଉତ୍ତର ଓଡିଶା ଗସ୍ତରେ ଆସିବେ କେନ୍ଦ୍ରମନ୍ତ୍ରୀ ରାଜନାଥ ସିଂହ । ସେ ଭଦ୍ରକରେ ଏକ ଦଳୀୟ ସଭାରେ ଉଦବୋଧନ ଦେବେ । ସେହିପରି ଫେବୃଆରୀ ୨୦ରେ କଳାହାଣ୍ଡି ଗସ୍ତ କରିବେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ସେଠାରେ ସେ ଏକ ଦଳୀୟ ରାଲି କରିବେ । ଏହାପରେ ଖୋର୍ଧା ନାଚୁଣୀରେ ମଧ୍ୟ କର୍ମୀଙ୍କୁ ଉଦବୋଧନ ଦେବେ ଯୋଗୀ । ଏନେଇ ବିଜେପି ମୁଖପାତ୍ର ଗୋଲକ ମହାପାତ୍ର ସୂଚନା ଦେଇଛନ୍ତି ।