ଅର୍ଗସ ବ୍ୟୁରୋ : ୨୦୦୧ ମସିହାରେ ଓଡ଼ିଶା ଟେକ୍ସଟାଇଲ ମିଲ ବନ୍ଦ ହେବା ପରେ ଏହା ଉପରେ ନିର୍ଭର କରୁଥିବା ଅନେକ ପରିବାର ବେରୋଜଗାର ହୋଇପଡ଼ିଥିଲେ। ଅନେକ ଶ୍ରମିକ ଚାକିରି ହରେଇ ଥିଲେ। ଏହାକୁ ପୁନରୁଦ୍ଧାର କରିବା ପାଇଁ ବାରମ୍ବାର ପ୍ରତିଶ୍ରୁତି ଦିଆଯିବା ପରେ ମଧ୍ୟ ତାହା ପାଣିର ଗାର ପାଲଟି ଥିଲା । ୨୦୦୨ ମସିହାରେ ମାମଲା ହାଇକୋର୍ଟ ଯାଇଥିଲା । କୋର୍ଟରେ ମାମଲାର ଶୁଣାଣି ହେବା ପରେ ଉକ୍ତ ଜମିକୁ ସରକାର ନିଜ ଅକ୍ତିଆରରେ ନିଅନ୍ତୁ ବୋଲି ଗତ ୨ ତାରିଖ ଦିନ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ଏଥିପାଇଁ ସରକାର ଅଫିସିଆଲ୍ ଲିକ୍ୟୁଡେଟର ମାଧ୍ୟମରେ ୧୧୫ କୋଟି ଟଙ୍କା ଜମା ମଧ୍ୟ କରିଥିଲେ । ତେବେ ଜମିକୁ ସରକାର ଏବେ ନିଜ ଅକ୍ତିଆରରେ ନେଇଥିବା ଏହାର ଭାଗ୍ୟ କଣ ହେବ ସେ ନେଇ ଚିନ୍ତା ପ୍ରକଟ କରିଛନ୍ତି ଓଟିଏମର ପୂର୍ବତନ କର୍ମଚାରୀ ।
ଅନ୍ୟପଟେ ଓଟିଏମ ଜମିରେ ରାଜ୍ୟ ସରକାର ଟେକ୍ସଟାଇଲ ପାର୍କ ନିର୍ମାଣ କରିବେ ବୋଲି ଶିଳ୍ପ ସଚିବ ମେକ ଇନ୍ ଓଡ଼ିଶା କଂକ୍ଲେଭରେ ସୂଚନା ଦେଇଥିଲେ । ଯେଉଁଥିରେ ପ୍ରାୟ ୮୦ ସଂସ୍ଥା ନିଜର ୟୁନିଟ୍ ପ୍ରତିଷ୍ଠା କରିବେ । ଏଥିରେ ଅନେକଙ୍କୁ ରୋଜଗାର ମିଳିବ ବୋଲି ସରକାର ପୁଣି ଥରେ ସୁନେଲି ସ୍ବପ୍ନ ଦେଖେଇଛନ୍ତି । ସେପଟେ ହାଇକୋର୍ଟଙ୍କ ନିର୍ଦ୍ଦେଶ ପରେ ସରକାର ଓଟିଏମ ଜମିକୁ ନିଜ ଅକ୍ତିଆରକୁ ନେଇଥିବା ଯୋଗୁ ମୁଖ୍ୟମନ୍ତ୍ରୀ ଓ ହାଇକୋର୍ଟଙ୍କୁ ଧନ୍ୟବାଦ ଜଣେଇଛନ୍ତି କଟକ ଚୌଦ୍ଵାର ବିଧାୟକ । ଓଟିଏମ ଜମିରେ ରାଜ୍ୟ ସରକାର ଟେକ୍ସଟାଇଲ ପାର୍କ ନିର୍ମାଣ କରି ବେରୋଜଗାର ଲୋକଙ୍କୁ ରୋଜଗାରକ୍ଷମ କରିବେ ତ ?
