ପୁଣି ଜନନୀ ଯନ୍ତ୍ରଣା, ଆମ୍ବୁଲାନ୍ସ ପହଞ୍ଚି ନପାରିବାରୁ ରାସ୍ତାରେ ପ୍ରସବ କଲେ ମହିଳା

ରାୟଗଡ଼ା:  ପୁଣି ଜନନୀ ଯନ୍ତ୍ରଣା । ରାସ୍ତା ନଥିବାରୁ ଆସିପାରିଲାନି ଆମ୍ବୁଲାନ୍ସ । ଶେଷରେ ରାସ୍ତାରେ ପ୍ରସବ କଲେ ମହିଳା । ତେବେ ଏହା ଏକ ଜଟିଳ ପ୍ରସବ ଥିବା ବେଳେ ମହିଳା ଜଣକ ୨ଟି ସନ୍ତାନ ଜନ୍ମ ଦେଇଥିଲା । ଏହା ଭିତରୁ ଗୋଟିଏ ଶିଶୁର ମୃତ୍ୟୁ ହୋଇଥିବା ଜଣାପଡିଛି । ଏଭଳି ଅଭିଯୋଗ ଆସିଛି ରାୟଗଡା କାଶୀପୁର ବ୍ଲକର ଅଡାଝୋଲ ଗ୍ରାମରେ ।

ମହିଳାଜଣକ ପ୍ରସବ ଯନ୍ତ୍ରଣା ଅନୁଭବ କରିବା ପରେ ପରିବାର ଲୋକେ ଆମ୍ବୁଲାନ୍ସକୁ ଫୋନ କରିଥିଲେ । ମାତ୍ର ରାସ୍ତା ନଥିବାରୁ ପହଞ୍ଚିପାରିଲାନି ଆମ୍ବୁଲାନ୍ସ । ଶେଷରେ ଆଶାକର୍ମୀ ଓ ୧୦୨ ଡ୍ରାଇଭର ଗର୍ଭବତୀଙ୍କୁ କାନ୍ଧରେ ପ୍ରାୟ ୩ କିଲୋମିଟର ବୋହି ନେଇଥିଲେ । ଏପରିକି ତାଙ୍କୁ ଏକ ନଦୀ ମଧ୍ୟ ପାର କରିବାକୁ ପଡିଥିଲା । ମହିଳା ଜଣକ ଏହାପରେ ରାସ୍ତାକଡରେ ପ୍ରସବ କରିଥିଲେ । ପ୍ରସବର କିଛି ସମୟ ପରେ ଗୋଟିଏ ଶିଶୁର ମୃତ୍ୟୁ ହୋଇଥିବା ବେଳେ ମାଆ ଓ ଅନ୍ୟ ଶିଶୁଟିକୁ ଗୁରୁତର ଅବସ୍ଥାରେ ଟିକିରି ମେଡିକାଲରେ ଭର୍ତ୍ତି କରାଯାଇଥିଲା । ଏବେ ଉଭୟ ମାଆ ଓ ଶିଶୁ ସୁସ୍ଥ ଥିବା ଜଣାପଡ଼ିଛି ।