ରୋଗୀଙ୍କ ସମ୍ପର୍କୀୟଙ୍କୁ ଶୋଷିବାର ନୂଆ ଫଣ୍ଡା, ମୃତ୍ୟୁ ପରେ ବି ଚାଲୁଛି ଚିକିତ୍ସା !

ଭୁବନେଶ୍ୱର: ‘ଗବ୍ବର ଇଜ୍‌ ବ୍ୟାକ୍‌’ ଫିଲ୍ମରେ ପାଟିଲ ହସ୍ପିଟାଲରେ ଶବ ଚିକିତ୍ସା ଘଟଣା ତ ଆପଣ ଜାଣିଥିଲେ । କିନ୍ତୁ ଏଭଳି ଏକ ଘଟଣା ଫିଲ୍ମରେ ନୁହଁ ବରଂ ସତରେ ଘଟିଛି । ପୁଣି ସ୍ମାର୍ଟସିଟି ଭୁବନେଶ୍ୱରର ଏକ ନର୍ସିଂହୋମରେ । ଶବ ମାଗୁଛି ରକ୍ତ  ।  ଏପରି ସାଙ୍ଘାତିକ ଅଭିଯୋଗ ଆସିଛି ରାଜଧାନୀରେ  । ପୁଣି ଚର୍ଚ୍ଚାକୁ ଆସିଛି ଘରୋଇ ହସପିଟାଲ ଓ ନର୍ସିଂହୋମ୍  ।

ଶହୀଦନଗର ଥାନା ଅଞ୍ଚଳରେ ରହିଥିବା ଟ୍ରିନିଟ୍ ଫାର୍ମା ନାଁରେ ଏପରି ଅଭିଯୋଗ ଆଣିଛନ୍ତି ମେଡିକାଲରେ ଚିକିତ୍ସିତ ହୋଇ ମୃତ୍ୟୁବରଣ କରିଥିବା ରୋଗୀଙ୍କ ସମ୍ପର୍କୀୟ  । ଏପରିକି ଏହି ଘଟଣାରେ ଗଣମାଧ୍ୟମରେ ପ୍ରକାଶ ପାଇଥିବା ଖବର ଓ ମେଡିକାଲର ଦସ୍ତାବିଜକୁ ଦେଖାଇ ଟ୍ରିନିଟ୍ ଫାର୍ମା ବିରୋଧରେ ଆଣିଛନ୍ତି ଏପରି ଆରୋପ । ଖବର କାଗଜରେ ପ୍ରକାଶିତ ଖବର ଅନୁସାରେ  ପୁର୍ଘଟଣାରେ ଗୁରୁତର ଭାବେ ଆହତ ହୋଇଥିବା ସନ୍ତୋଷ ସାହୁ ଓ ହୃଦାନନ୍ଦ ଜେନାଙ୍କର ମୃତ୍ୟୁ ଘଟିଛି  ।

ଅପରପକ୍ଷରେ ସନ୍ତୋଷଙ୍କ ମୃତ୍ୟୁ ବରଣ କରିଥିବା କଥା ସକାଳ 7.55 ମିନଟରେ  ପରିବାର ବର୍ଗଙ୍କୁ କହିଥିଲେ ମେଡିକାଲ କର୍ତ୍ତୁପକ୍ଷ  । ପୋଲିସ ଓ ଗଣମାଧ୍ୟମ ଅନୁସାରେ ରାତି 9 ଟାଠୁ ସନ୍ତୋଷ ସାହୁଙ୍କର ମୃତ୍ୟୁ ଘଟିଛି  । ତେବେ ବିଳମ୍ୱିତ ରାତ୍ରୀରେ ସନ୍ତୋଷଙ୍କୁ ରକ୍ତ ଦେବା ସହ ଓ ପାଖାପାଖି 12000 ଟଙ୍କାର ମେଡିସିନ ଓ ଇଞ୍ଜେକସନ ଦେଇଥିଲେ ମେଡିକାଲ କର୍ତ୍ତୁପକ୍ଷ  ।  ଏପରି ସାଙ୍ଘାତିକ ଅଭିଯୋଗ ଆଣିଛନ୍ତି ମୃତକଙ୍କ ପରିବାର ବର୍ଗ ।

ଦିନରେ ରକ୍ତ ଦରକାର ହେଲେ ରକ୍ତ ନଥିବା କଥା ରୋକଠୋକ ମନା କରିଦେଉଛନ୍ତି ମେଡିକାଲ କର୍ତ୍ତୁପକ୍ଷ  । କିନ୍ତୁ ବିଳମ୍ୱିତ ରାତ୍ରୀରେ ସନ୍ତୋଷଙ୍କ ପରିବାର ଲୋକଙ୍କଠୁ 3500 ଟଙ୍କା ନେଇ ରକ୍ତ ମଧ୍ୟ ଦିଆଯାଇଛି  । 1 ଲକ୍ଷ ଟଙ୍କା ନଦେବା ପର୍ଯ୍ୟନ୍ତ ସନ୍ତୋଷଙ୍କୁ ଆଡମିଟ କରିନଥିଲା ଟ୍ରିନିଟି ହସ୍ପିଟାଲ  । କିନ୍ତୁ ସନ୍ତୋଷ ମୃତ୍ୟୁ ବରଣ କରିବା ପରେ 40000 ଟଙ୍କା ପରିବାର ବର୍ଗଙ୍କୁ ହସ୍ତାନ୍ତର କରିଛି ଟ୍ରିନିଟି ହସ୍ପିଟାଲ  ।

ତେବେ ଆବଶ୍ୟକ ନଥାଇ ଏତେ ଟଙ୍କା ଗରିବ ଲୋକଙ୍କଠୁ ଜୋର ଜବରଦସ୍ତ ନେବା ଘଟଣାରେ ଅସନ୍ତୋଷ ବ୍ୟକ୍ତ କରିଛନ୍ତି ସନ୍ତୋଷଙ୍କ ସମ୍ପର୍କୀୟ  । କେଉଁ ଉଦ୍ଦେଶ୍ୟରେ ରୋଗୀଙ୍କ ଠାରୁ ଏତେ ଟଙ୍କା ନେଇଥିଲା ହସପିଟାଲ ? ଟଙ୍କା ଦରକାର ନଥିବା ବେଳେ କାହିଁକି ପରିବାର ଉପରେ ଚାପ ପକାଇଥିଲା  ଟ୍ରିନିଟ୍ ଫାର୍ମା ? ଏହାର ଉଚ୍ଚସ୍ତରୀୟ ତଦନ୍ତ କରିବାକୁ ଦାବି କରିଛନ୍ତି ପରିବାର ଲୋକ  । ଘରୋଇ ହସ୍ପିଟାଲଗୁଡ଼ିଙ୍କ ବିରୋଧରେ ବାରମ୍ୱାର ଅଭିଯୋଗ ହେଉଛି  । ଟଙ୍କା ପାଇଁ ଶୋଷଣର ଶିକାର ହେଉଛନ୍ତି ସାଧାରଣ ଜନତା  । ହେଲେ ଭାଙ୍ଗୁନି ସରକାରଙ୍କ ନିଦ  ।