ସେହିପରି ପୁରୀ ଜିଲ୍ଲା ଉଦୟପୁରର ସୁନିତା ସାମନ୍ତରାୟ 2013 ମସିହାରେ ଆାବାସ ଯୋଜନାରେ ଦ୍ବିତୀୟ କିସ୍ତି ପାଇଁ 5 ହଜାର ଟଙ୍କା ଲାଞ୍ଚ ମଗାଯାଉଥିବା ଅଭିଯୋଗ କରିଥିଲେ । ଅଭିଯୋଗ ପ୍ରମାଣିତ ହୋଇନଥିଲେ ମଧ୍ୟ ଦ୍ବିତୀୟ କିସ୍ତି ବାବଦକୁ 55 ହଜାର ଟଙ୍କା ହିତାଧିକାରୀଙ୍କୁ ଦେବା ପାଇଁ ପଂଚାୟତିରାଜ ବିଭାଗର ଶାସନ ସଚିବଙ୍କୁ ନିର୍ଦ୍ଦେଶ ଦେଇଥିଲେ ଲୋକାୟୁକ୍ତ । ହେଲେ ଘଟଣାକୁ 10 ମାସ ବିତି ଯାଇଥିଲେ ବି ଦ୍ବିତୀୟ କିସ୍ତି ପାଇପାରିନାହାଁନ୍ତି ହିତାଧିକାରୀ।
ଯାଜପୁର ଧର୍ମଶାଳା ବ୍ଲକରେ ଗୋଟିଏ ପରିବାରର 5ଜଣଙ୍କୁ ଆବାସ ମିଳିବା ପ୍ରସଙ୍ଗରେ ମଧ୍ୟ ଲୋକାୟୁକ୍ତଙ୍କ ନିର୍ଦ୍ଦେଶ କୁ ଠିକ ଭାବେ ପାଳନ କରାଯାଇନାହିଁ । ଏଭଳି କିଛି ଅଭିଯୋଗ ଆଣି ଆଜି ସରକାରଙ୍କୁ ସିଧାସିଧା ଟାର୍ଗେଟ କରିଛି ରାଜ୍ୟ ସୂଚନା ଅଧିକାର ଅଭିଯାନ । ବିଭିନ୍ନ ଦୁର୍ନିତି ମାମଲାରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଲୋକାୟୁକ୍ତ ନିର୍ଦ୍ଦେଶ ଦେଊଥିଲେ ମଧ୍ୟ ରାଜ୍ୟ ସରକାରଙ୍କ ବିଭିନ୍ନ ବିଭାଗ ଏହାକୁ ବେଖାତିର କରୁଥିବା ଅଭିଯୋଗ ହୋଇଛି ।
ସେପଟେ ଆଉ କିଛି ମାମଲାରେ ଲୋକାୟୁକ୍ତଙ୍କ ନିର୍ଦ୍ଦେଶ ପରେ ମାମଲା ରୁଜୁ କରି ବସି ପଡୁଛି ଭିଜିଲାନ୍ସ । ଯାହାକୁ ନେଇ ଭିଜିଲାନ୍ସର କାର୍ଯ୍ୟକାରୀତା ଉପରେ ଉଠିଛି ବଡ ପ୍ରଶ୍ନବାଚୀ। ଯାଜପୁର ତହସିଲରେ 10 ବର୍ଷ ଧରି 5 କୋଟି ଟଙ୍କା ଲୁଟ ମାମଲାରେ ମଧ୍ୟ ବହୁ ଓଏଏସ ଅଫିସରଙ୍କ ସମ୍ପୃକ୍ତି ଥିବା ପ୍ରମାଣ ମିଳିଥିଲା । ହେଲେ କଡା କାର୍ଯ୍ୟାନୁଷ୍ଠାନ ପାଇଁ ଲୋକଯୁକ୍ତ ଭିଜିଲାନ୍ସ ବିଭାଗକୁ ନିର୍ଦେଶ ଦେଲା ପରେ ବି କୌଣସି କାର୍ଯ୍ୟାନୁଷ୍ଠାନ ହେଲାନାହିଁ। ତେବେ ଲୋକାୟୁକ୍ତଙ୍କ ନିର୍ଦ୍ଦେଶ ଯଦି ପାଳନ କରିବାର ମନୋବୃତ୍ତି ନାହିଁ ଏହାକୁ ବନ୍ଦ କରି ଦିଅନ୍ତୁ ବୋଲି କହିଛନ୍ତି ବରିଷ୍ଠ ଆଇନଜୀବି।
