ବିଦେଶରେ ଫସିଥିବା ଭାରତୀୟଙ୍କୁ ସ୍ଵଦେଶ ଫେରାଇ ଆଣିବାକୁ ଆମର ଅକ୍ଳାନ୍ତ ପ୍ରୟାସ ଜାରି ରହିବ- ଧର୍ମେନ୍ଦ୍ର ପ୍ରଧାନ

ଅର୍ଗସ ବ୍ୟୁରୋ : ବିଶ୍ଵରେ ଆତଙ୍କ ଖେଳାଇଥିବା କୋରୋନା ମହାମାରୀ ପାଇଁ ବିଦେଶରେ ଥିବା ଭାରତୀୟ ଫସି ରହିଛନ୍ତି। ସେମାନଙ୍କୁ ସ୍ଵଦେଶ ଫେରାଇ ଆଣିବା ପାଇଁ ସରକାର ବନ୍ଦେ ଭାରତ ମିଶନର ଶୁଭାରମ୍ଭ କରିଛନ୍ତି। ଏହି ମିଶନ ଦ୍ଵାରା ପ୍ରବାସୀ ଭାରତୀୟଙ୍କୁ ଜଳପଥ ଓ ଆକାଶ ପଥ ଦେଇ ଭାରତକୁ ଅଣାଯାଉଛି। ତେବେ ସରକାରଙ୍କ ଏହି ପ୍ରୟାସକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଶଂସା କରିଛନ୍ତି। ଏନେଇ ସେ ସୋସିଆଲ ମିଡିଆରେ ଲେଖିଛନ୍ତି ଯେ, କୋଭିଡ-19 ମଧ୍ୟରେ ବିଦେଶରେ ଫସିଥିବା ଭାରତୀୟଙ୍କ ଦୁର୍ଦ୍ଦଶା ବୁଝିପାରିଥିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୃହମନ୍ତ୍ରୀ ଅମିତ ଶାହାଙ୍କୁ ଧନ୍ୟବାଦ। ଦୁନିଆର ସବୁଠୁ ବଡ଼ ସ୍ଵେଦେଶ ପ୍ରତ୍ୟାବର୍ତ୍ତନ ବନ୍ଦେ ଭାରତ ମିଶନର ସୁବିଧା ପ୍ରଦାନ କରି ମୋଦି ସରକାର ଲୋକଙ୍କ ଘର ପ୍ରତ୍ୟାବର୍ତ୍ତନ ସୁନିଶ୍ଚିତ କରିବାରେ କିଛି ଅବହେଳା କରି ନାହାଁନ୍ତି।

କେନ୍ଦ୍ରମନ୍ତ୍ରୀ ପୁଣି ଲେଖିଛନ୍ତି ଯେ, ଏସ୍ ଜୟଶଙ୍କର ଏବଂ ହରଦୀପ ସିଂହ ପୁରୀଙ୍କ ପ୍ରୟାସରେ ଓଡିଆ ଭାଇ ଭଉଣୀମାନେ ଫେରିଛନ୍ତି, ଯାହାକି ପ୍ରଶଂସନୀୟ। ଦୁବାଇରେ ଫସିଥିବା 151 ଜଣ ଭାରତୀୟ ଆଜି ଘରକୁ ପ୍ରତ୍ୟାବର୍ତ୍ତନ କରିଛନ୍ତି। ସେମାନଙ୍କ ମଧ୍ୟରେ 2 ଜଣ ଶିଶୁ ଅଛନ୍ତି। ମୁଁ ସେମାନଙ୍କୁ ସ୍ଵାଗତ କରୁଛି। କୋଭିଡ-19 ସଂକ୍ରମଣରୁ ବର୍ତ୍ତିବା ପାଇଁ ରାଜ୍ୟ ଏବଂ କେନ୍ଦ୍ର ସରକାରଙ୍କ ଦ୍ଵାରା ଜାରି କରାଯାଇଥିବା ଦିଶାନିର୍ଦ୍ଦେଶ ଏବଂ ସୁରକ୍ଷା ଉପାୟକୁ ପାଳନ କରନ୍ତୁ। ବିଦେଶରେ ଫସିଥିବା ଭାରତୀୟଙ୍କୁ ସ୍ଵଦେଶ ଫେରାଇ ଆଣିବାକୁ ଆମର ଅକ୍ଳାନ୍ତ ପ୍ରୟାସ ଜାରି ରହିବ।