ଜମ୍ମୁ-କଶ୍ମୀର ପୁଲଓ୍ୱାମା ଆତଙ୍କବାଦୀ ବିସ୍ଫୋରଣରେ ଦୁଇ ଓଡ଼ିଆ ସହିଦ୍‌

40 ଜଣ ଯବାନଙ୍କ ମଧ୍ୟରେ ରହିଛନ୍ତି ଦୁଇ ଓଡ଼ିଆ । ପୁଲ୍‌ଓ୍ୱାମା ଆତଙ୍କବାଦୀ ହମଲା ପରେ ସାରା ଦେଶରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । 40 ଜଣ ସହିଦ ସିଆର୍‌ପିଏଫ୍‌ ଯବାନଙ୍କ ମଧ୍ୟରେ ଦୁଇ ଜଣ ଓଡ଼ିଆ ମଧ୍ୟ ରହିଛନ୍ତି । ଏହି ଦୁଇ ଯବାନ ହେଲେ ପ୍ରସନ୍ନ ସାହୁ ଏବଂ ମନୋଜ କୁମାର ବେହେରା । ପ୍ରସନ୍ନ କୁମାର ସାହୁଙ୍କ ଘର ଜଗତସିଂହପୁର ଜିଲ୍ଲା ନୂଆଗାଁ ଅଞ୍ଚଳରେ ବୋଲି ସୂଚନା ମିଳିଛି । ବିସ୍ଫୋରଣରେ ପ୍ରସନ୍ନ ସହିଦ ହେବା ଖବର ତାଙ୍କ ଗାଁରେ ପହଞ୍ଚିବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ମାଟିର ବୀର ସନ୍ତାନଙ୍କ ପାଇଁ ଗ୍ରାମବାସୀ ସମବେଦନା ଜଣାଇବା ସହ ଆତଙ୍କବାଦୀଙ୍କ ବିରୋଧରେ କେନ୍ଦ୍ର ସରକାର ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ସେମାନେ ଦାବି କରିଛନ୍ତି ।

ସେହିପରି ସହିଦ ମନୋଜ ବେହେରାଙ୍କ ଘର କଟକ ଜିଲ୍ଲା ନିଆଳିର ରତନପୁର ଅଞ୍ଚଳରେ ବୋଲି ସୂଚନା ମିଳିଛି । ୨୦୦୬ ମସିହାରେ ସେ ସିଆର୍‌ପିଏଫ୍‌ରେ ଯୋଗ ଦେଇଥିଲେ । ସେ କିଛି ଦିନ ତଳେ ଗାଁକୁ ଛୁଟିରେ ଆସିଥିଲେ । ଛୁଟି ସରିବା ପରେ ପ୍ରାୟ ଏକ ସପ୍ତାହ ହେବ ସେ ନିଜ କର୍ମ କ୍ଷେତ୍ରରେ ଯୋଗଦେଇଥିଲେ । ତେବେ ତାଙ୍କ ପରିବାର ଏବେ ଦୁଃଖରେ ଭାଙ୍ଗି ପଡ଼ିଛନ୍ତି । ଗ୍ରାମବାସୀ ଶୋକସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି ।

ଜମ୍ମୁ-ଶ୍ରୀନଗର ଜାତୀୟ ରାଜପଥର ଅବନ୍ତୀପୋରା ନିକଟରେ ଏହି ହମ୍‌ଲା ହୋଇଥିଲା । ପାଖାପାଖି ୨୫୦୦ରୁ ଅଧିକ ଯବାନ ୭୦ଟି ଗାଡିରେ ଜମ୍ମୁରୁ ଶ୍ରୀନଗର ଯାଉଥିବା ବେଳେ ସେମାନଙ୍କ ଗାଡିକୁ ଆତଙ୍କବାଦୀ ଟାର୍ଗେଟ କରିଥିଲେ । IED ବିସ୍ଫୋରକ ଭର୍ତ୍ତି ଏକ ଭ୍ୟାନ୍‌କୁ ଯବାନ ବସିଥିବା ବସ୍‌ରେ ମାଡ଼ କରିଥିଲେ । ବିସ୍ଫୋରଣର ତୀବ୍ରତା ଏତେ ମାତ୍ରାରେ ଥିଲା ଯେ ଏଥିରେ ଗାଡ଼ି ସଂପୂର୍ଣ୍ଣ ଭାଙ୍ଗି ଚୁରମାର ହୋଇଯାଇଥିଲା ।

ତେବେ ପ୍ରସନ୍ନଙ୍କ ଝିଅ ତାଙ୍କ ବାପା ଦେଶ ପାଇଁ ଜୀବନ ଦେଇଥିବାରୁ ସେ ଗର୍ବିତ ବୋଲି କହିଛନ୍ତି । ହେଲେ ବାପାଙ୍କ ହାତ ଆଉ ଝିଅ ମୁଣ୍ଡରେ ନାହିଁ ବୋଲି କହି ଦୁଃଖ କରୁଛନ୍ତି । ଶୁଣନ୍ତୁ କ’ଣ କହୁଛନ୍ତି ପ୍ରସନ୍ନଙ୍କ ଝିଅ...

ପାକିସ୍ତାନ ଦ୍ୱାରା ପରିଚାଳିତ ଜୈଶ୍-ଏ-ମହମ୍ମଦ ସଂଗଠନ ମାରିଦେଲା ଭାରତ ମାଟିର ପ୍ରାୟ 40ଜଣ ବୀର ପୁତ୍ରଙ୍କୁ । ଚିନ୍ତା କଲେ ମଧ୍ୟ କୋହ ଉଠୁଛି । ସାରା ଦେଶ କାନ୍ଦୁଛି, ସହିଦ୍ ପରିବାରଙ୍କ ପ୍ରତିଟି ସଦସ୍ୟ, ପ୍ରତିଟି ସମ୍ପର୍କୀୟ, ସମସ୍ତ ଭାରତୀୟ ଆଜି ସ୍ତବ୍ଧ । ଦୁଃଖ, ଶୋକର ଛାୟା ଖେଳିଯାଇଛି । ଯେଉଁଭଳି ଭାବେ ଦୃଶ୍ୟରେ ଦେଖିବାକୁ ମିଳିଥିଲା, ସେଥିରୁ ବର୍ବରତା, ନିର୍ମମତାର କେତେ ପରିମାଣର ଥିଲା ଚିନ୍ତା କରାଯାଇପାରେ ।