ରାଜ୍ୟର ଏହି ଚର୍ଚ୍ଚିତ ଘଟଣାରେ ଏବେ ଆରମ୍ଭ ହୋଇଛି ତଦନ୍ତ। ମୁହଁ ଖୋଲିଛି ବନ ବିଭାଗ। ଦନ୍ତାହାତୀର ମୃତ୍ୟୁକୁ ନେଇ ମୁହଁ ଖୋଲିଛନ୍ତି ପିସିସିଏଫ ଶଶୀ ପଲ। ସେ କହିଛନ୍ତି କେଉଁ ପରିସ୍ଥିତିରେ ହାତୀଟି ମଲା ତାହାର ତଦନ୍ତ ହେବ । ପୋଷ୍ଟ ମର୍ଟମ ରିପୋର୍ଟ ଆସିଲା ପରେ ତଦନ୍ତ ଆଗକୁ ବଢିବ।
ଏହି ଘଟଣାରେ ଦୋଷୀ ଧରାପଡିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପିସିସିଏଫ ଶଶୀ ପଲ କହିଛନ୍ତି। ଓଡ୍ରାଫ ଟିମ କାହିଁକି ଗଲା ସେ ନେଇ ସମ୍ପୃକ୍ତ ବିଭାଗ ତଦନ୍ତ ମଧ୍ୟ କରୁଛି।
ଶଶି ପଲ ଆହୁରି ମଧ୍ୟ କହିଛନ୍ତି ଯେ, ହାତୀ ପଲର ସମସ୍ତ ହାତୀ ନଦୀ ପାର ହୋଇଗଲେ କିନ୍ତୁ ଏହି ହାତୀଟି ସବଳ ଥାଇ ବି ଗୋଟେ ଏପରି ଜାଗାରେ ଫସିଗଲା ଯେଉଁଠୁ ବାହାରିବା ଅସମ୍ଭବ। ମୁଣ୍ଡଳି ମହାନଦୀରେ ଫସି ରହିଥିବା ହାତୀକୁ ଉଦ୍ଧାର କରିବା ପାଇଁ ଦେଶର ବଡ ବଡ ସଂସ୍ଥାର ବନ୍ୟ ପ୍ରାଣୀ ବିଶେଷଜ୍ଞଙ୍କ ସହ ଆମେ ଆଲୋଚନା କରିଥିଲୁ ଏପରିକି ତାଙ୍କୁ ହାତୀଟି ପାଣିରେ ଥିବାର ଫଟୋ ଓ ଭିଡିଓ ବି ପଠେଇଥିଲୁ। ହେଲେ ହାତୀକୁ ବାହାର କରିବା ପାଇଁ କୌଣସି ଟେକ୍ନିକ୍ କାମ କଲାନି। ଏଭଳି ସ୍ଥିତିରେ କ’ଣ ପାଇଁ ଏଭଳି ଘଟଣା ଘଟିଲା ତାକୁ ନେଇ ଚାଲିଛି ତଦନ୍ତ।
ଆଗାମୀ ଦିନରେ ପାଣିରେ ହାତୀ ଯାତାୟାତ ସମୟରେ ହାତୀଙ୍କ ଉପରେ ଆହୁରି ତୀକ୍ଷ୍ମ ନଜର ରଖାଯିବ। ଏଭଳି ଘଟଣାର ଯେଭଳି ପୁନରାବୃତ୍ତି ନ ଘଟିବା ସେଥିପାଇଁ ଜଳ ସେଚନ ବିଭାଗ ସହ ଆଲୋଚନା ମଧ୍ୟ ଚାଲିଛି। ଏଥିସହିତ ବ୍ୟାରେଜ ନିକଟରେ ହାତୀଙ୍କ ଚଲାପଥ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯିବ ବୋଲି ପିସିସିଏଫ ଶଶୀ ପଲ ତାଙ୍କ ପ୍ରତିକ୍ରିୟାରେ କହିଛନ୍ତି।
