ବାଲେଶ୍ବର: ବାଲେଶ୍ବର ବାହାନଗାରେ ଗଡ଼ିଲା ମାଲ୍ଗାଡ଼ି। ଦୁର୍ଘଟଣାର 51 ଘଣ୍ଟା ପରେ ଟ୍ରାକରେ ଚାଲିଲା ଟ୍ରେନ। ଉଭୟ ଅପ-ଲାଇନ ଓ ଡାଉନ-ଲାଇନ ଚଳାଚଳ ପାଇଁ ପ୍ରସ୍ତୁତ ହେବା ପରେ ରେଳମନ୍ତ୍ରୀଙ୍କ ଉପସ୍ଥିତିରେ ଟ୍ରାକ ଉପରେ ମାଲଗାଡ଼ି ଗଡ଼ିଛି। ଶୁକ୍ରବାର ସଂଧ୍ୟାରେ ଭୟଙ୍କର ରେଳ ଦୁର୍ଘଟଣା ପରେ ଏହି ରୁଟରେ ଯାତାୟତ ବାଧାପ୍ରାପ୍ତ ହୋଇଥିଲା। ରେଳ ଲାଇନ୍ ମରାମତି ପରେ ପ୍ରଥମେ ଡାଉନ ଲାଇନରେ ଏକ ମାଲବାହୀ ଟ୍ରେନ୍ ସୋରରୁ ବାଲେଶ୍ବର ଅଭିମୁଖେ ଯାଇଥିଲା।
ପରେ ଏକ କୋଇଲା ବୋଝେଇ ଟ୍ରେନ ଅପ-ଲାଇନରେ ଭାଇଜାଗରୁ ରାଉରକେଲା ଅଭିମୁଖେ ଏହି ରୁଟ ଦେଇ ଯାତ୍ରା ଆରମ୍ଭ କରିଥିଲା। ଆଜି ସକାଳେ ମଧ୍ୟ ଏହି ରୁଟ ଦେଇ ପାସେଞ୍ଜର ଟ୍ରେନ ଗଡିଥିବା ଦେଖିବାକୁ ମିଳିଛି। ରେଳ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଥିବା ବେଳେ ଖୋଦ ରେଳମନ୍ତ୍ରୀ ଘଟଣା ସ୍ଥଳରେ ଉପସ୍ଥିତ ରହି ଟ୍ରେନକୁ ହାତ ହଲାଇ ସ୍ବାଗତ କରିଥିଲେ। ଖୁବଶୀଘ୍ର ଏହି ରୁଟରେ ଟ୍ରେନ ଚଳାଚଳ ସ୍ବଭାବିକ ହେବ ବୋଲି ମନ୍ତ୍ରୀ ସୂଚନା ଦେଇଥିବା ବେଳେ ଦୁର୍ଘଟଣା ପାଇଁ ଦାୟୀ ବ୍ୟକ୍ତି ଉପରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।
ଅଧିକ ପଢନ୍ତୁ ଓଡ଼ିଶା ଖବର
ନବରଙ୍ଗପୁର: ଲାଞ୍ଚ ନେବା ସମୟରେ ଭିଜିଲାନ୍ସ ହାତରେ ଧରା ପଡିଲେ ମହିଳା ସୁପରଭାଇଜର୍ । କୋଡ଼ିଙ୍ଗା ଅଙ୍ଗନବାଡି ସେକ୍ଟରର ସୁପରଭାଇଜର୍ ରାଜେଶ୍ୱରି ନାଗ , ବନ୍ଦୀଗୁଡ଼ା ଅଙ୍ଗନୱାଡ଼ି କର୍ମୀ ସୁଭାସିତା ପାତ୍ରଙ୍କ ଠାରୁ 5400 ଟଙ୍କା ଲାଞ୍ଚ ନେବା ସମୟରେ ମାଡ଼ି ବସିଲା ଭିଜିଲାନ୍ସ ।
ସୂଚନା ଅନୁଯାୟୀ 2022 ମସିହା ଅକ୍ଟୋବର ମାସରୁ 2023 ମସିହା ଜୁଲାଇ ମାସ ସୁଦ୍ଧା ଦିଆଯାଇଥିବା ପୋଷଣ ସାମଗ୍ରୀ ଏବଂ ଖେଳନା ବାବଦରେ ପ୍ରତ୍ୟେକ ଅଙ୍ଗନବାଡ଼ି ପିଛା ଆସିଥିବା ଟଙ୍କାକୁ ମଞ୍ଜୁର କରିବା ପାଇଁ ଲାଞ୍ଚ ମାଗିଥିଲେ ମହିଳା ସୁପରଭାଇଜର୍ ।
ଆଜି ଅପରାହ୍ନ ସମୟରେ ଉକ୍ତ ଟଙ୍କାକୁ ମହିଳା ସୁପରଭାଇଜରଙ୍କୁ ଦେବା ସମୟରେ ମାଡ଼ି ବସିଥିଲା ଭିଜିଲାନ୍ସ । କୋଡ଼ିଙ୍ଗା ସେକ୍ଟର ଅଧୀନରେ ଥିବା 23 ଗୋଟି ସେକ୍ଟରର 22 ଜଣ ଅଙ୍ଗନବାଡି କର୍ମୀଙ୍କ ଠାରୁ 200 ଲେଖାଏଁ ଏବଂ ବନ୍ଦୀଗୁଡ଼ା ଅଙ୍ଗନବାଡିଙ୍କ ଠାରୁ 1000 ଟଙ୍କା , ସମୁଦାୟ 5400 ଟଙ୍କା ମାଗିଥିଲେ ମହିଳା ସୁପରଭାଇଜର୍ । ଅଧିକ ତଦନ୍ତ ନିମନ୍ତେ ପ୍ରଥମେ କୋଡ଼ିଙ୍ଗା ସେକ୍ଟର କାର୍ଯ୍ୟାଳୟ ଏବଂ କୋଷଗୁମୁଡ଼ା ସ୍ଥିତ ICDS ଅଫିସ୍ ରେ ତନାଘନା କରୁଛି ଭିଜିଲାନ୍ସ ଟିମ୍ ।
ଆହୁରି ପଢନ୍ତୁ ଓଡିଶା ଖବର...
ଅର୍ଗସ ବ୍ୟୁରୋ : ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିବ ୟୁନିଟ-୧ ହାଟ । ପାର୍କିଂ ବ୍ୟବସ୍ଥା ସୁବିଧା ନହେବାରୁ ୟୁନିଟ୍ ୧ ମାର୍କେଟ ବନ୍ଦ କରି ଆନ୍ଦୋଳନକୁ ଓହ୍ଲାଇଛନ୍ତି ବ୍ୟବସାୟୀ ସଂଘ । ଆନ୍ଦୋଳନ ସମୟରେ ୟୁନିଟ-୧ ମାର୍କେଟ ବ୍ୟବସାୟୀ ଓ ଉଠାଦୋକାନୀଙ୍କ ମଧ୍ୟରେ କଥା କଟାକଟି ସହ ଚାପା ଉତ୍ତେଜନା ସୃଷ୍ଟି ହୋଇଥିଲା । ବ୍ୟବସାୟୀ ମାନେ ରାସ୍ତା ରାସ୍ତାରୋକ କରିବା ଯୋଗୁଁ ରାସ୍ତା ଯାମ୍ ହୋଇଥିଲା ।
ଅଧିକ ପଢନ୍ତୁ ଓଡ଼ିଶା ଖବର
ଉଠାଦୋକାନୀଙ୍କ ପାଇଁ ମାର୍କେଟରେ ପାର୍କିଙ୍ଗ ସମସ୍ୟା ହେଉଥିବା ବ୍ୟବସାୟୀ ମାନେ ଅଭିଯୋଗ କରିଛନ୍ତି । ସେମାନଙ୍କୁ ଅନୁମତି ଦିଆଯାଇଥିବା ଭେଣ୍ଡିଙ୍ଗ ଜୋନରୁ ଆଗକୁ ବଢ଼ି ବ୍ୟବସାୟ କରୁଥିବାରୁ ଭିଡ ଜମୁଥିବା କହିଛନ୍ତି ବ୍ୟବସାୟୀ । ସେଥିପାଇଁ ବିଏମସି କମିଶନରଙ୍କ ପାଖରେ ଏକ ଦାବିପତ୍ର ଦେଇଛନ୍ତି ମାର୍କେଟ ବ୍ୟବସାୟୀ ସଂଘ । ୨ ଦିନ ଭିତରେ ସମସ୍ୟାର ସମାଧାନ ହେବା ପ୍ରତିଶ୍ରୁତି ଦେଇଛନ୍ତି ବିଏମସି କମିଶନର ।
କୋରାପୁଟ: ରାସ୍ତା ନୁହେଁ ତ ମରଣଯନ୍ତା । ନବୀନଙ୍କ ଓଡ଼ିଶାରେ ନବୀନ ରାସ୍ତା । ବୈପାରୀଗୁଡା ବ୍ଲକ ହାଳଦିକୁଣ୍ଡ ପଞ୍ଚାୟତ କେନ୍ଦୁଗୁଡାରୁ ଡାଙ୍ଗରୀଗୁଡା ଗାଁକୁ ସଂଯୋଗ କରୁଥିବା ରାସ୍ତା । ଚାରିଖଣ୍ଡ ଗାଁର ଗ୍ରାମବାସୀଙ୍କ ଇୟେ ହେଉଛି ନିତି ଦିନିଆ ରାସ୍ତା । ଖଟିଆରେ ବୁହା ହୁଅନ୍ତି ରୋଗୀ । ଗାଁ ଗାଁର ବିକାଶର କଥା କହୁଥିବା 23 ବର୍ଷର ସ୍ଥିର ସରକାରଙ୍କର ଇୟେ ହେଉଛି ଅସଲ ମୁଖା । ରାସ୍ତା ଖଣ୍ତେ ପାଇଁ ଗୁହାରି କରି କରି ଥକି ଗଲେଣି ଗ୍ରାମବାସୀ । ରାସ୍ତା ଦେଇ ପ୍ରତିଦିନ ଶହ ଶହ ପିଲା, ଛାତ୍ରଛାତ୍ରୀ ବିପଦପୂର୍ଣ୍ଣ ଅବସ୍ଥାରେ ଯିବା ଆସିବା କରୁଛନ୍ତି । ପ୍ରଶାସନକୁ ବାରମ୍ବାର ଜଣାଇଲେ ମଧ୍ୟ କିଛି ସୁଫଳ ମିଳୁନାହିଁ ।
ଏ ରାସ୍ତା ଉପରେ ଗାଡ଼ି ଚାଲିବା ଦୂର କଥା । ଚାଲି ଚାଲି ଗଲେ ମଧ୍ୟ ପ୍ରତି ପାଦରେ ବିପଦ । ଚାଷ ଜମି, ଜଙ୍ଗଲ ରାସ୍ତା ଦେଇ ଯିବାକୁ ହୁଏ । ଗୋଟେ ପଟେ ବନ୍ୟ ଜନ୍ତୁଙ୍କ ଭୟ, ଅନ୍ୟ ପଟେ ଘରେ ଚୁଲି ନ ଜଳିବାର ଆଶଙ୍କା । ବିକାଶ ଏଠି ବାଟବଣା । ଏନେଇ ଗ୍ରାମବାସୀ ବହୁବାର ସ୍ଥାନୀୟ ପ୍ରଶାସନ ନିକଟରେ ଗୁହାରୀ କରିଛନ୍ତି । କିନ୍ତୁ ମିଳିଛି କେବଳ ପ୍ରତିଶ୍ରୁତି ପରେ ପ୍ରତିଶ୍ରୁତି । ନିର୍ବାଚନ ସମୟରେ ଭୋଟ ବ୍ୟାଙ୍କ ହାତେଇବା ନିମନ୍ତେ ମାଳ ମାଳ ନେତାଙ୍କ ଲମ୍ବା ଲାଇନ ଲାଗେ । କିନ୍ତୁ ଦୁଃଖ ସମୟରେ ପାଖରେ କେହି ମଧ୍ୟ ନ ଥାଆନ୍ତି । ତେବେ ସ୍ଥାନୀୟ ପ୍ରଶାସନ ଓ ରାଜ୍ୟ ସରକାରଙ୍କ କୁମ୍ଭ କର୍ଣ୍ଣ ନିଦ୍ରା କେବେ ଭାଙ୍ଗୁଛି ତାହା କେବଳ ଦେଖିବାକୁ ବାକି ରହିଲା ।
ଅଧିକ ପଢନ୍ତୁ ଓଡ଼ିଶା ଖବର
