ସୁନା ଗ୍ରାହକଙ୍କୁ ଠକୁଛନ୍ତି ବଡ଼ ବଡ଼ ଦୋକାନୀ, ସରକାର ନେବେ କି ଆଖିଦୃଶିଆ କାର୍ଯ୍ୟାନୁଷ୍ଠାନ ?

ଭୁବନେଶ୍ୱର: ଆପଣ ସୁନା କିଣୁଛନ୍ତି କି, ହୋଇଯାଆନ୍ତୁ ସାବଧାନ । ବଡ଼ ବଡ଼ ଆକର୍ଷଣୀୟ ବିଜ୍ଞାପନ ଦେଖାଇ ଗ୍ରାହକଙ୍କୁ ଲୁଟୁଛନ୍ତି ନାମୀ ଦାମୀ ଗହଣା ଦୋକାନୀ ।  ଏଭଳି ସାଂଘାତିକ ତଥ୍ୟ ଖୋଦ ସରକାର କହୁଛନ୍ତି । ସରକାରଙ୍କର ଖାଉଟି ଓ ଯୋଗାଣ ବିଭାଗ ସୂଚନା ଅନୁସାରେ ରାଜ୍ୟର ନାମୀ ଦାମୀ ବଜାରରେ ବିକ୍ରି ହେଉଥିବା ବ୍ରାଣ୍ଡ ଜୁଏଲାରୀ ଓଜନ ମାପରେ ଠକେଇ କରୁଛନ୍ତି । ଦୀର୍ଘ ବର୍ଷ ଧରି ଶୋଷଣର ଶିକାର ହେଉଛନ୍ତି ଗ୍ରାହକ । ଆଉ ଗତ ବିଧାନସଭାରେ ସୁନା ଦୋକାନୀଙ୍କ ଲୁଟର ସାଂଘାତିକ ତଥ୍ୟ ଉପସ୍ଥାପନ ହୋଇଥିଲା  ।

ବାଚସ୍ପତି ମଧ୍ୟ ଏ ପ୍ରସଙ୍ଗରେ ରୁଲିଂ ଦେଇଥିଲେ । ତେବେ ବିଧାନସଭାରେ ଏ ପ୍ରସଙ୍ଗରେ ଆଲୋଚନା ପରେ ଚେଇଁ ଶୋଇଥିବା ସରକାରଙ୍କ ଖାଉଟି ଯୋଗାଣ ବିଭାଗ ଜାଗି ଉଠିଥିଲା । ବିଭାଗ ପକ୍ଷରୁ ବିଭିନ୍ନ ସୁନା ଅଳଙ୍କାର ଦୋକାନରେ ଚଢ଼ାଉ କରାଯାଇଥିଲା । ପୂର୍ବରୁ ମାତ୍ର 500 ରୁ 1000 ଟଙ୍କା ଜରିମାନା ନେଇ ସେମାନଙ୍କୁ କ୍ଲିନ୍‌ ଚିଟ୍‌ ଦେଉଥିଲା ବିଭାଗ । ଏବେ ପ୍ରଶ୍ନ ଉଠୁଛି ଯୋଗାଣ ବିଭାଗର ବର୍ଷ ବର୍ଷ ଧରି ଗହଣା ଦୋକାନ ସହ କିଭଳି ମଧୁଚନ୍ଦ୍ରିକା ଚାଲିଥିଲା । ଯାହାର ଶିକାର ହେଉଥିଲା ନୀରିହ ଗ୍ରାହକ । ଜାଣନ୍ତୁ ଏଭଳି କଳାକାରନାମା କରୁଥିବା 6 ଟି ସହରର 45ଟି ଦୋକାନ ଉପରେ ଚଢ଼ାଉ କରାଯାଇଥିଲା । ସେଗୁଡ଼ିକ ମଧ୍ୟରେ ଲାଲଚାନ୍ଦ,  ଖିମିଜି,  ତନିସ୍କ, କଲ୍ୟାଣ, ରିଲିଆନ୍ସ, ମେସର୍ସ ହଲମାର୍କ, କଟକର ଇପାରୀ ଗୋବିନ୍ଦ, ଜୋତ୍ସନା ଓ ସେନକୋ ଭଳି ନାମୀ ଦାମୀ ସୁନା ଦୋକାନ ମଧ୍ୟ ଥିଲେ  । ଏହାସହ ବ୍ରହ୍ମପୁରର କେଶବ ଜୁଏଲାର, ସମ୍ବଲପୁରର ନିଭ୍‌ ପାଏଲ ଜୁଏଲର୍ସ ମଧ୍ୟ ଅଛନ୍ତି ।

ଏହି ସବୁ ବ୍ରାଣ୍ଡର ବଡ ବଡ  ହୋର୍ଡିଂ ଓ ବିଜ୍ଞାପନ ରାସ୍ତାଘାଟ, ଗଣ ମାଧ୍ୟମ ସବୁଠି ଦେଖିବାକୁ ମିଳୁଛି  । ସବୁଠାରୁ ଭରସାଯୋଗ୍ୟ କହି ଲୋକଙ୍କୁ ନିଜ ଆଡକୁ ଆକୃଷ୍ଟ କରୁଛନ୍ତି ଏହି ଦୋକନୀ । କିନ୍ତୁ ବିଜ୍ଞାପନ ଦେଖାଇ ଗ୍ରାହକଙ୍କ ବିଶ୍ୱାସରେ ବିଷ ଦେଉଛନ୍ତି ଏହି ବ୍ୟବସାୟୀକ ଅନୁଷ୍ଠାନ । ଏ କଥା ଆମୋ କହୁନୁ  । ଖୋଦ୍ ଯୋଗାଣ ବିଭାଗ ରାଜ୍ୟର 6 ଟି ବଡ ବଡ  ସହରରେ  ପ୍ରାୟ 40 ଟି  ଦୋକାନରେ ଚଢାଉ କରି ଏହି ସୂଚନା ଦେଇଛି  ।

ଏମାନଙ୍କ ଠାରୁ ମାତ୍ର  3 ଲକ୍ଷ 77 ହଜାର ଟଙ୍କା ଜୋରିମାନା ଆଦାୟ କରାଯାଇଛି  । 14 କ୍ୟାରେଟ୍ ସୁନାକୁ ଏହି ଦୋକାନୀମାନେ 22 କ୍ୟାରେଟ୍ କହି ବିକ୍ରୀ କରୁଥିବା କହିଛନ୍ତି ଯୋଗାଣମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ  । ଏଣିକି ଜାନୁୟାରୀ 20ରୁ ସୁନା ବିକ୍ରୀ ଉପରେ କଟକଣା ଲାଗିବ ବୋଲି କହିଛନ୍ତି ମନ୍ତ୍ରୀ  । ତେବେ ଗତ 20 ତାରିଖରେ  ବିଧାନସଭାରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ପ୍ରଶ୍ନରେ ଖାଉଟି ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ସୁନା ଠେକେଇ ନେଇ ସ୍ବୀକାର କରିଥିଲେ  ।

 ଗତ ଦୁଇ ବର୍ଷ ମଧ୍ୟରେ 42 ଟି କୋଦାନ ଉପରେ ଚଢାଇ କରିଥିଲା ବିଭାଗ  । କିନ୍ତୁ ଜୋରିମାନା ମାତ୍ର 500 ଓ 1000 ଟଙ୍କା ପକାଇ ଛାଡି ଦେଇଥିଲା  । ତେବେ ଭୁବନେଶ୍ୱର ଓ ବ୍ରହ୍ମପୁରର କାହିଁକି ଚଢାଉ ହେଉନି ବୋଲି ବାଚସ୍ପତି ଗୃହରେ ଉଦବଗେ ପ୍ରକାଶ କରିବା ସହ ସଂପୃକ୍ତ ଇନସ୍ପେକ୍ଟରଙ୍କୁ କାରଣ ଦର୍ଶାଅ ନୋଟିସ ଜାରି କରିବାକୁ ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ  । ଆଉ ଏହା ପରେ ପଦାକୁ ଆସିଛି ଏହି ସାଙ୍ଘାତିକ୍ ଠକେଇର  କଳାକରନାମା  ।

ଏଠାରେ ପ୍ରଶ୍ନ ଉଠୁଛି କେବଳ ଜୋରିମାନା ନାଁ ଦୋକାନୀ ବିରୋଧରେ ମାମଲା ରୁଜୁ କରିବେ ସରକାର  । ସେମାନଙ୍କ ବିରୋଧରେ ନିଆଯିବକି ଦୃଢ କାର୍ଯ୍ୟାନୁଷ୍ଠାନ  ।  ବର୍ଷ ବର୍ଷ ଧରି ଏହି ଦୋକାନୀଙ୍କ ଦ୍ବାରା ଠକେଇର ଶିକାର ହେଉଥିବା ଗ୍ରାହକଙ୍କୁ  ନ୍ୟାୟ ଦେବେକି ସରକାର  । ସେମାନଙ୍କୁ ମିଳିବ କି କ୍ଷତି ପୂରଣ  ।  ଗ୍ରାହକଙ୍କ ଠାରୁ ଠକି ନେଇଥିବା ସୁନା ଦୋକାନୀ ଟଙ୍କା ଫେରସ୍ତ କରିବେ କି  । ସବୁ ଜାଣି ମଧ୍ୟ କାହିଁକି ଭୁବନେଶ୍ବର ଦୋକାନୀ ଉପରେ ଚଢାଉ କରୁନଥିଲା ଯୋଗାଣ ବିଭାଗ  । କଣ ଥିଲା ଏହା ପଛର ରହସ୍ୟ  । ଏମିତି କିଛି ପ୍ରଶ୍ନ ଘେରର ରାଜ୍ୟ ସରକାର ଓ ଯୋଗାଣ ବିଭାଗର ଭୂମିକା  ।