ବଡ଼ବଡ଼ିଆଙ୍କୁ ମାଫ୍‌, ଟାର୍ଗେଟରେ ସାନବାବୁ: ମୁଖ୍ୟମନ୍ତ୍ରୀଙ୍କ ଜିରୋ ଟଲେରାନ୍ସ ଫଣ୍ଡାକୁ ବିରୋଧୀଙ୍କ ସମାଲୋଚନା

ଭୁବନେଶ୍ୱର: ଜିରୋ ଟଲେରାନ୍ସ କଥା କହୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବେ ଚର୍ଚ୍ଚାରେ । ଦୁର୍ନୀତିର ଅଭିଯୋଗ ଆସିଥିବା କିଛି ସରକାରୀ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ପ୍ରଶଂସା ଗୋଟାଇବାରେ ଲାଗିଛନ୍ତି ରାଜ୍ୟ ସରକାର  । ହେଲେ ବଡବଡିଆ ଅଧିକାରୀଙ୍କ ବିରୋଧରେ କୋଟିକୋଟି ଟଙ୍କାର ଦୁର୍ନୀତି ଅଭିଯୋଗ ଆସିଛି ।

ଝିଣ୍ଟିକା ମାରି ବଣି ପୋଷୁଛନ୍ତି ମୁଖ୍ୟମନ୍ତ୍ରୀ । ରୋହି ଛାଡି ଦଣ୍ଡିକିରି ଧରିବାରେ ଲାଗିଛନ୍ତି ସରକାର । ଏଭଳି କଥା କହି ସିଧାସିଧା ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି ବିରୋଧୀ । ମୁଖ୍ୟମନ୍ତ୍ରୀଙ୍କ ଜିରୋ ଟଲେରାନ୍ସ ଫଣ୍ଡାକୁ ଏବେ ବିଭିନ୍ନ ମହଲରେ ସମାଲୋଚନା କରାଯାଉଛି । ବଡବଡିଆ ଅଫିସରଙ୍କ ବିରୋଧରେ ଥିବା ଅଭିଯୋଗର ଲମ୍ବା ତାଲିକା ଥୋଇ ସରକାରଙ୍କୁ ସମାଲୋଚନା କରିଛନ୍ତି ବିରୋଧୀ ।  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶାସନ କାଳ ଭିତରେ ଶହ ଶହ କୋଟି ଟଙ୍କାର ଦୁର୍ନୀତି ନେଇ ଅଭିଯୋଗ ଆସିଛି । ହେଲେ ବଡବଡିଆ ଅଫିସରଙ୍କ ବିରୋଧରେ ଆକ୍ସନ ନେବାପାଇଁ ସାହସ ଜୁଟାଇ ନାହାନ୍ତି ସରକାର  ।

ରାଜ୍ୟ ସମବାୟ ବ୍ୟାଙ୍କରେ ତତ୍କାଳୀନ ପରିଚାଳନା ନିର୍ଦ୍ଦେଶକ ତୁଷାରକାନ୍ତି ପଣ୍ଡା ଏବଂ ମ୍ୟାନେଜମେଣ୍ଟ ଇନଚାର୍ଜ ଥିବା ଆଇଏଏସ ଅଧିକାରୀ ବିଷ୍ଣୁପଦ ସେଠୀଙ୍କ ବିରୋଧରେ 700 କୋଟି ଟଙ୍କାରର ଦୁର୍ନୀତି ନେଇ ଅଭିଯୋଗ ଆସିଛି । ଏନେଇ ସିଭିଲ ସୋସାଇଟ ସଙ୍ଗଠନ ମଧ୍ୟ ବାରମ୍ବାର ଅଭିଯୋଗ ଉଠାଇ ଆସିଛି । କେବଳ ସେତିକି ନୁହେଁ  ଚାରା ଘୋଟାଲା, ଡାଲି ଦୁର୍ନୀତି, ଚିଟଫଣ୍ଡ ଓ ଖଣି ଦୁର୍ନୀତି ପରି ବଡବଡ ଦୁର୍ନୀତିରେ ଅନେକ ନେତା, ମନ୍ତ୍ରୀ ତଥା ବିଧାୟକ ଓ ଉଚ୍ଚ ପଦସ୍ଥ ଅଧିକାରୀଙ୍କ ନାଁ ଆସିଛି ।

ବିଧାନସଭା ତଥ୍ୟ ଅନୁଯାୟୀ ରାଜ୍ୟରେ ଗତ 9 ବର୍ଷ ହେଲା 255 ଜଣ ବରିଷ୍ଠ ଅଧିକାରୀଙ୍କ ବିରୋଧରେ ଆୟ ବର୍ହିଭୂତ ସମ୍ପତ୍ତି ଠୁଳ କରିବା ନେଇ ଭିଜିଲାନ୍ସ କେସ ଚାଳିଛି  । କିଛି ଅଣଓଡିଆ ଅଫିସରଙ୍କ ନାଁରେ ବିଭିନ୍ନ ସମୟରେ ସାଙ୍ଘାତିକ ଅଭିଯୋଗ ଆସିଛି । ହେଲେ ଜିରୋ ଟଲେରାନ୍ସ କଥା କହୁଥିବା ମୁଖ୍ୟମନ୍ତ୍ରୀ କାହିଁକି ଚୁପ୍ ଅଛନ୍ତି ? ଚାପ ପାଇଁ ସେ ଆକ୍ସନ ନେଇପାରୁନାହାନ୍ତି ! ବଡବଡିଆଙ୍କୁ ଛାଡି କେବଳ ତଳତଳିଆ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ନେଇ ସରକାର ବାହାବା ମାରୁଛନ୍ତି ବୋଲି ଅଭିଯୋଗ କରିଛନ୍ତି ବିରୋଧୀ କଂଗ୍ରେସ ଓ ବିଜେପି  ।

ସେପଟେ ଗତ 15ଦିନ ଭିତରେ 21ଜଣ ଆଉଟ୍ 6 ଜଣଙ୍କର ପେନସନ ବନ୍ଦ କରିଛନ୍ତି ସରକାର । ଗତ 17 ତାରିଖରେ 15 ଜଣ ଅଧିକାରୀଙ୍କୁ ଦୁର୍ନୀତିଗ୍ରସ୍ତ ଅଧିକାରୀଙ୍କୁ ବରଖାସ୍ତ କରିବା ସହ ଦୁଇ ଜଣ ପୂର୍ବତନ ଅଧିକାରୀଙ୍କର ପେନସନ ବନ୍ଦ କରିଥିଲେ ମୁଖ୍ୟମନ୍ତ୍ରୀ  । ଆଉ ଗତ 31 ତାରିଖରେ ପୁଣି 6ଜଣ ଦୁର୍ନୀତିଗ୍ରସ୍ତ ଅଧିକାରୀଙ୍କୁ ଚାକିରୀରୁ ବହିଷ୍କାର କରିବା ସହ 4 ଜଣଙ୍କର ପେନସନ ବନ୍ଦ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଯାହାକୁ ନେଇ ସମଗ୍ର ରାଜ୍ୟରେ ଆରମ୍ଭ ହୋଇଯାଇଛି ଜୋରଦାର ଚର୍ଚ୍ଚା । ମୁଖିଆଙ୍କ ଏଭଳି ଆଭିମୁଖ୍ୟକୁ ଦଳୀୟ ନେତା ଓ ମନ୍ତ୍ରୀ ମାନେ ବେଶ୍ ପ୍ରଶଂସା କରିଛନ୍ତି । ତେବେ ଏହାକୁ ଜୋରଦାର ସମାଲୋଚନା କରିଛନ୍ତି ବିଜେପି ବିଧାୟକ ଜୟନାରାୟଣ ମିଶ୍ର  ।

ପଞ୍ଚମ ଥର ପାଇଁ ଶାସନ ଗାଦିରେ ବସିବା ପରେ ସରକାରୀ କର୍ମଚାରୀଙ୍କ ଠାରୁ ଆରମ୍ଭ କରି ଦଳୀୟ କର୍ମୀମାନଙ୍କ କାନରେ 5- ଟି ମନ୍ତ୍ର ଫୁଙ୍କିଛନ୍ତି ନବୀନ । ତେବେ ଏପରି ସ୍ଥିତିରେ ବଡବଡିଆ ଅଧିକାରୀଙ୍କ ବିରୋଧରେ ଆସୁଥିବା ଅଭିଯୋଗର ତଦନ୍ତ କରି କାର୍ଯ୍ୟାନୁଷ୍ଠାନ ନେବେ କି ନବୀନ ? ଏହାକୁ ନେଇ ଏବେ ସାଧାରଣରେ ଉଠିଛି ପ୍ରଶ୍ନ  ।