2014 ଲୋକସଭା ନିର୍ବାଚନରେ ବିଜେପିକୁ 21 ପ୍ରତିଶତ ଭୋଟ ମିଳିଥିବା ବେଳେ 2019ରେ ଏହା 38 ପ୍ରତିଶତକୁ ବୃଦ୍ଧି ପାଇଛି । ସେହିପରି 2014 ବିଧାନସଭା ନିର୍ବାଚନରେ ବିଜେପି ଖାତାକୁ 18 ପ୍ରତିଶତ ଭୋଟ ଯାଇଥିବା ବେଳେ 2019ରେ 32 ପ୍ରତିଶତ ଭୋଟ ପାଇଛି ବିଜେପି । ଏପରିକି 2019 ସାଧାରଣ ନିର୍ବାଚନରେ 33ଟି ଏସ.ଟି ବିଧାନସଭା ସିଟରୁ 11ଟି ସିଟକୁ ଦଖଲ କରିପାରିଛି ଦଳ । ତେଣୁ ଏଥିପାଇଁ ଓଡିଶା ବିଜେପିକୁ ଶୁଭେଚ୍ଛା ଜଣାଇଛନ୍ତି ନଡ୍ଡା । ଭାରତୀୟ ଜନତା ପାର୍ଟି ଓଡିଶାରେ ସରକାର ଗଠନ ଲକ୍ଷ୍ୟର ନିକଟତର ହୋଇଗଲାଣି, ଖୁବଶୀଘ୍ର ଓଡିଶାରେ ମଧ୍ୟ ବିଜେପିର ବାନା ଉଡିବ ବୋଲି ଜେ.ପି. ନଡ୍ଡା କହିଛନ୍ତି । କେବଳ ସରକାର ଗଢିବାର ଦମ୍ଭୋକ୍ତି ନୁହେଁ ବରଂ ଆୟୁଷ୍ମାନ ଭାରତ ଲାଗୁ ପାଇଁ ପୁଣି ଥରେ ରାଜ୍ୟ ସରକାରଙ୍କୁ ନିବେଦନ କରିଛନ୍ତି ନଡ୍ଡା । ତେବେ ନଡ୍ଡାଙ୍କ ଦମ୍ଭୋକ୍ତି ପରେ ଉତ୍ସାହିତ ଅଛି ରାଜ୍ୟ ବିଜେପି।
ସେପଟେ ଜେ.ପି. ନଡ୍ଡାଙ୍କ ଅଭିଭାଷଣକୁ ନେଇ ପ୍ରତିକ୍ରିୟା ରଖିଛନ୍ତି ବିଜେଡି ଓ କଂଗ୍ରେସ । ସରକାର ଗଠନ ପାଇଁ ବିଜେପି ଯେଉଁ ସ୍ୱପ୍ନ ଦେଖୁଛି । ସେ ସ୍ୱପ୍ନ ସ୍ୱପ୍ନରେ ରହିଯିବ ବୋଲି ଉଭୟ ଦଳ କହିଛନ୍ତି । ଅନ୍ୟପଟେ ବିଜେପି ଓଡିଶାରେ ସରକାର ଗଠନ କରିବା ପାଇଁ ସାଙ୍ଗଠନିକ ଦୋଷ ଦୂର୍ବଳତା ଦୂର କରିବା ସହ ରାଜ୍ୟ ନେତୃତ୍ୱ ସୃଷ୍ଟି କରିବାର ଆବଶ୍ୟକତା ରହିଛି ବୋଲି ରାଜନୈତିକ ସମୀକ୍ଷକ ମତ ରଖିଛନ୍ତି।
2014 ତୁଳନାରେ 2019 ସାଧାରଣ ନିର୍ବାଚନରେ ବିଜେପିର ଯେ କେବଳ ଭୋଟ ପ୍ରତିଶତ ବୃଦ୍ଧି ପାଇଛି ତାହା ନୁହେଁ । ଉଭୟ ବିଧାନସଭା ଓ ଲୋକସଭାରେ ସିଟ ମଧ୍ୟ ବୃଦ୍ଧି କରିପାରିଛି ଦଳ । ତେବେ 2024ରେ ବିଜେପି ସରକାର ଗଠନ ନେଇ ଆଶାବାଦୀ ଥିବା ବେଳେ କେତେ ଫଳପ୍ରଦ ହୋଇପାରୁଛି ତାହା ଉପରେ ନଜର ରହିଛି।
