ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡା ୨୦୨୦: ୧୩ଟି ସ୍ୱର୍ଣ୍ଣ ପଦକ ସହ ଶୀର୍ଷରେ ପୁନେ ୟୁନିଭର୍ସିଟି

ଭୁବନେଶ୍ୱର: ଆଜି ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡା ୨୦୨୦ରେ ମହେଶ ଦତ ଅସାୱାଲେ ଓ ପ୍ରାଜକ୍ତା ରବିନ୍ଦ୍ର ଖାଲ୍‌କର୍‌ଙ୍କ ମାଧ୍ୟମରେ ଭାରୋତଳନରେ ୨ଟି ଏବଂ ଜ୍ୟୋତିବା ବଜରଙ୍ଗ ଅଟ୍‌କାଲେଙ୍କ ମାଧ୍ୟମରେ କୁସ୍ତିରେ ଗୋଟିଏ ସ୍ୱର୍ଣ୍ଣ ପଦକ ଜିତି ସାବିତ୍ରୀବାଇ ଫୁଲେ ପୁନେ ୟୁନିଭର୍ସିଟି ପଦକ ତାଲିକାର ଶୀର୍ଷରେ ପହଂଚିଛି । ଅନ୍ୟପକ୍ଷରେ ଚଣ୍ଡୀଗଡର ପଞ୍ଜାବ ୟୁନିଭର୍ସିଟି ଓ ବେଙ୍ଗାଲୁରୁର ଜୈନ ୟୁନିଭର୍ସିଟି ବର୍ତମାନ ପର୍ଯ୍ୟନ୍ତ ୮ଟି ଲେଖାଏଁ ସ୍ୱର୍ଣ୍ଣ ପଦକ ଜିତିଛନ୍ତି । ସାବିତ୍ରୀବାଇ ଫୁଲେ ପୁନେ ୟୁନିଭର୍ସିଟି ୧୩ଟି ସ୍ୱର୍ଣ୍ଣ ପଦକ ଜିତିଛି । ସେହିପରି ଅମୃତସରର ଗୁରୁ ନାନକ ଦେବ୍ ୟୁନିଭର୍ସିଟି ଓ ୟୁନିଭର୍ସିଟି ଅଫ୍ ମୁମ୍ବାଇ ଶୀର୍ଷ ୫ଟି ବିଶ୍ୱବିଦ୍ୟାଳୟ ମଧ୍ୟରେ ରହିଛନ୍ତି ।

ମୋଟ ୨୫୮ କେଜିର ଭାରୋତଳନ ସହ ଗତବର୍ଷ ଡିାସମ୍ବରରେ ମୋହାଲିରେ ଆୟୋଜିତ ଅଲ୍ ଇଣ୍ଡିଆର ଇଂଟର୍‌-ୟୁନିଭର୍ସିଟି ଚାମ୍ପିଅନ୍‌ସିପ୍‌ରେ ମହେଶ ଅସାୱାଲେ ବିଜୟୀ ହୋଇଥିଲେ । ସେ ସ୍ନାଚ୍‌ରେ ୧୨୩ କେଜି ଭାରୋତଳନ କରିବା ସହ କ୍ଲିନ୍ ଆଣ୍ଡ ଜର୍କରେ ୧୪୩ କେଜିର ଭାରୋତଳନ କରିଥିଲେ । ଡୋପ୍ ନିୟମର ଉଲଘଂନ ପରେ ଏକ ବର୍ଷର ନିଲମ୍ବନ ପରେ ମହେଶ ଗତ ବର୍ଷ ସେପ୍ଟେମ୍ବରରେ ଏହି କ୍ରୀଡାକୁ ଫେରିଥିଲେ । ଓଡିଶାର ବର୍‌ହମ୍‌ପୁର ୟୁନିଭର୍ସିଟିର ମନୋଜ କୁମାର ସାହୁ ଗତ ମାସରେ ଖେଲୋ ଇଣ୍ଡିଆ ୟୁଥ୍ ଗେମ୍ସରେ ବଏଜ୍ ଅଣ୍ଡା୍‌-୨୧ ୭୩ କେଜି କ୍ଲାସ୍‌ରେ ରୌପ୍ୟ ପଦକ ଜିତିଥିଲେ ।

ତେବେ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡାରେ ସେ ନିଜ ପ୍ରଦର୍ଶନରେ ସୁଧାର ଆଣିବା ସହ ୨୬୭ କେଜିର ଭାରୋତଳନ କରିଥିଲେ । ମନୋଜ ପଞ୍ଜାବ ୟୁନିଭର୍ସିଟିର ମନିଷ କୁମାର ଓ ପଞ୍ଜାବୀ ୟୁନିଭର୍ସିଟିର ଲଭ୍‌ପ୍ରୀତ ସିଂହଙ୍କୁ ପଛରେ ପକାଇ ସ୍ୱର୍ଣ୍ଣ ପଦକ ହାସଲ କରିଛନ୍ତି । ଗ୍ୱାଲିୟର୍‌ର ଲକ୍ଷ୍ମୀବାଇ ନ୍ୟାସ୍‌ନାଲ ଇନ୍‌ଷ୍ଟିଚ୍ୟୁଟ୍ ଅଫ୍ ଫିଜିକାଲ ଏଜୁକେଶନ ଏହାର ୯୦କେଜି କ୍ଲାସ୍ ଜୁଡୋକା କୁଲ୍‌ଦୀପ ସିଂହଙ୍କ ମାଧ୍ୟମରେ ପ୍ରଥମ ସ୍ୱର୍ଣ୍ଣ ପଦକ ହାସଲ କରିଛି । ସେହିପରି ମେନ୍‌ସ ୮୧କେଜି କ୍ଲାସ୍‌ରେ ସମୀର ପଠାନ୍ ବିଜେତା ହୋଇ ଗୁଜରାଟ ୟୁନିଭର୍ସିଟି ପାଇଁ ପ୍ରଥମ ସ୍ୱର୍ଣ୍ଣ ପଦକ ହାସଲ କରିଛନ୍ତି । ସର୍ବନିମ୍ନ ଗୋଟିଏ ଲେଖାଏଁ ସ୍ୱର୍ଣ୍ଣ ପଦକ ଜିତିଥିବା ଅନ୍ୟ ୩୦ଟି ବିଶ୍ୱବିଦ୍ୟାଳୟ ତାଲିକାରେ ଏହି ଦୁଇ ବିଶ୍ୱବିଦ୍ୟାଳୟ ସାମିଲ ହୋଇଛି ।

ଆୟୋଜକ କଳିଙ୍ଗ ଇନ୍‌ଷ୍ଟିଚ୍ୟୁଟ୍ ଅଫ୍ ଇଣ୍ଡଷ୍ଟ୍ରିଆଲ ଟେକ୍ନୋଲୋଜିର ପୁରୁଷ ଓ ମହିଳା ରଗ୍‌ବି ଟିମ୍‌, ପଞ୍ଜାବ ୟୁନିଭର୍ସିଟି ୧୯-୫ ଓ କାବାୟିତ୍ରୀ ବାହିନାବାଇ ଚୌଧୁରୀ ୟୁନିଭର୍ସିଟି ୫୫-୦କୁ ପଛରେ ପକାଇ ସେମିଫାଇନାଲରେ ପହଂଚିଛି । ଶିବାଜୀ ୟୁନିଭର୍ସିଟି ଓ ଚଣ୍ଡୀଗଡ ୟୁନିଭର୍ସିଟି ପୁରୁଷ ଟିମ୍ ସହ ପାଟଳିପୁତ୍ର ୟୁନିଭର୍ସିଟି ଓ ଲଭ୍‌ଲି ପ୍ରଫେସ୍‌ନାଲ ୟୁନିଭର୍ସିଟିର ମହିଳା ଟିମ୍ କ୍ୱାଟର୍‌ଫାଇନାଲରେ ବିଜୟୀ ହୋଇଛନ୍ତି ।