ମାଲକାନଗିରି : ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଖଇରପୁଟ ବ୍ଲକ ଅନ୍ତର୍ଗତ ମୁଦୁଲିପଡ଼ାଠାରେ ବଣ୍ଡା ଜନଜାତିଙ୍କ ପାଇଁ ଭିନ୍ନକ୍ଷମ ଅଧିକାର ଓ ବିଭିନ୍ନ ଯୋଜନା ସମ୍ବନ୍ଧିତ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ପକ୍ଷରୁ ପ୍ରଥମ ଥର କରି ବଣ୍ଡା ଜନଜାତିଙ୍କ ପାଇଁ ଭିନ୍ନକ୍ଷମ ଅଧିକାର ଓ ଅଧିନିୟମ ୨୦୧୬ ଓ ବିଭିନ୍ନ ଯୋଜନା ସମ୍ବନ୍ଧିତ ସଚେତନତା ଶିବିର ଅନୁଷ୍ଠିତ ହୋଇଛି । ଜିଲ୍ଲା ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ଅଧିକାରୀ ରାଧାମଣି ଦଳାଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ଶିବିରରେ ମୁଖ୍ୟ ଅତିଥି ଭାବେ ରାଜ୍ୟ ଭିନ୍ନକ୍ଷମ ଆୟୂକ୍ତ ସୁଲୋଚନା ଦାସ, ଅତିରିକ୍ତ ଜିଲ୍ଲାପାଳ ବୀରସେନ ପ୍ରଧାନ, ଏସ.ଡି.ପି.ଓ ସୁନାରାମ ହେମରମ, ଖଇଇପୁଟ ବ୍ଲକ ଅଧ୍ୟକ୍ଷା କୁମୁଦିନି କିରସାନି, ମୁଦୁଲିପଡ଼ା ସରପଂଚ ଜ୍ୟୋସ୍ନାରାଣୀ ଧାଙ୍ଗଡ଼ାମାଝି, ଉପଖଣ୍ଡ ସାମାଜିକ ସୁରକ୍ଷା ଅଧିକାରୀ ପଦ୍ମରଞ୍ଜନ ଦାସ ଯୋଗ ଦେଇଥିଲେ। ଏହି ଶିବିରରେ ଭିନ୍ନକ୍ଷମଙ୍କ ଅଧିକାର ଓ ଆଇନ ଉପରେ ଆଲୋକପାତ ହୋଇଥିଲା ।
କେନ୍ଦ୍ର ଓ ରାଜ୍ୟ ସରକାର ଭିନ୍ନକ୍ଷମଙ୍କ ପାଇଁ ବହୁ ଯୋଜନା କରିଥିବା ବେଳେ ଏମାନେ କିଭଳି ସରକାରୀ ସୁବିଧାରୁ ବଂଚିତ ନ ହେବେ, ସେଥିପାଇଁ ଏଭଳି ଶିବିରର ଆୟୋଜନ କରାଯାଇଛି । ଯେଉଁ ହିତାଧିକାରୀମାନେ ସରକାରୀ ସୁବିଧାରୁ ବଂଚିତ ଅଛନ୍ତି, ସେମାନଙ୍କୁ ଏହାର ସୁଫଳ ନେବାକୁ ଆହ୍ୱାନ ଦିଆଯାଇଥିଲା । ଏହି ଅବସରରେ ୩ ଜଣ ବଣ୍ଡା ହିତାଧିକାରୀଙ୍କୁ ହ୍ୱିଲ ଚେୟାର ଓ ୯ ଜଣ ବଣ୍ଡା ହିତାଧିକାରୀଙ୍କୁ ଭିନ୍ନକ୍ଷମ ଭତ୍ତା ପ୍ରଦାନ କରାଯିବା ସହ ବଂଚିତ ହୋଇଥିବା ହିତାଧିକାରୀଙ୍କ ପଞ୍ଜିକରଣ କରାଯାଇଛି ।
ସରକାରୀ ଓ ବେସରକାରୀ କର୍ମକର୍ତ୍ତାଙ୍କ ସହ ଆଲୋଚନା ପରେ ଏଠାକାର ଲୋକେ ନିଜର ଅଧିକାର ବିଷୟରେ ସଚେତନ ନୁହଁନ୍ତି । ତେଣୁ ପ୍ରକୃତ ହିତାଧିକାରୀ ଆବେଦନ କରିପାରୁନାହାନ୍ତି । କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଯୋଜନାର ସୁଫଳ କିଭଳି ପ୍ରକୃତ ହିତାଧିକାରୀ ପାଇବେ , ସେନେଇ ଏହି ସଚେତନତା ଶିବିରର ଅୟୋଜନ କରାଯାଇଛି ବୋଲି ରାଜ୍ୟ ଭିନ୍ନକ୍ଷମ ଆୟୂକ୍ତ ଶ୍ରୀମତି ଦାସ ପ୍ରକାଶ କରିଛନ୍ତି ।
