ଅନୁଭବ ଜାଗ୍ରତିଙ୍କ ନିର୍ବନ୍ଧକୁ ନେଇ ଚର୍ଚ୍ଚା । ଏକ୍ସ ହ୍ୟାଣ୍ଡଲରେ ଓଲିଉଡ ଷ୍ଟାର ତଥା ପୂର୍ବତନ ସାଂସଦ ଅନୁଭବ ମହାନ୍ତି ଏବଂ ବାନ୍ଧବୀ ଜାଗ୍ରତି ଶୁକ୍ଲାଙ୍କ ଏକ ଫଟୋ ଖୁବ ଚର୍ଚ୍ଚାର ବିଷୟ ପାଲଟିଛି । ଉଭୟ ନିର୍ବନ୍ଧ କରିଥିବା ସୂଚନା ମିଳିଥିବା ବେଳେ ଉଭୟ ଏନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି । କିମ୍ବା ନିଜ ଅଫିସିଆଲ ଆକାଉଣ୍ଟରେ କୌଣସି ପୋଷ୍ଟ କରି ନାହାନ୍ତି । ଗତ କିଛିବର୍ଷ ହେବ ଉଭୟଙ୍କ ପ୍ରେମ ସମ୍ପର୍କ ଖୁବ ଚର୍ଚ୍ଚାରେ ରହିଥିଲା । ଅର୍ଗସକୁ ଦେଇଥିବା ସାକ୍ଷାତକାରରେ ଅନୁଭବ ଖୁବଶୀଘ୍ର ଦ୍ବିତୀୟ ବିବାହ କରିବାକୁ ଯାଉଥିବା କହିଥିବା ବେଳେ ଜାଗ୍ରତି ମଧ୍ୟ ଚଳିତ ବର୍ଷ ବିବାହ କରିବେ ବୋଲି କହିଥିଲେ । ଯଦିଓ ଉଭୟ ପରସ୍ପରକୁ ବିବାହ କରିବା କଥା ସ୍ପଷ୍ଟ କରିନଥିଲେ, କିନ୍ତୁ ସେମାନଙ୍କର ସମ୍ପର୍କ ଖୁବ ଗଭୀର ବୋଲି କହିଥିଲେ ।

ସୂଚନା ମୁତାବକ ଅନୁଭବ ଏବଂ ଜାଗ୍ରତିଙ୍କ ସମ୍ପର୍କ ୨୦୨୦ ମସିହାରେ ଆରମ୍ଭ ହୋଇଥିଲା । ଜାଗ୍ରତି ଲୋକସଭା ଟିଭିରେ ଉପସ୍ଥାପିକା ଥିବାବେଳେ ଯୁବ ସାଂସଦ ଭାବେ ଅନୁଭବଙ୍କ ସାକ୍ଷାତକାର ନେଇଥିଲେ । ପରେ ଅନୁଭଙ୍କ ଉପରେ ବହି ଲେଖିବା ଉଦ୍ଦେଶ୍ୟରେ ତାଙ୍କ ସହ ମିଳାମିଶା ଆରମ୍ଭ କରିଥିଲେ । ଏହା ପରଠୁ ସମ୍ପର୍କ ଆହୁରି ଘନିଷ୍ଠ ହୋଇଥିଲା । 2020 ମସିହାରେ ଅନୁଭବ ନିଜ ପତ୍ନୀ ବର୍ଷା ପ୍ରିୟଦର୍ଶନୀଙ୍କଠାରୁ ଡିଭୋର୍ସ ପାଇଁ କୋର୍ଟର ଦ୍ବାରସ୍ଥ ହୋଇଥିଲେ। ବର୍ଷା ଅଭିଯୋଗ କରିଥିଲେ ଯେ , ଦିଲ୍ଲୀରେ ଥିବା ତାଙ୍କର ବାନ୍ଧବୀ ଜାଗ୍ରତିଙ୍କ ପାଇଁ ତାଙ୍କର ଡିଭୋର୍ସ ହେବାକୁ ଯାଉଛି ।

ପୁଣି ଅନୁଭବ ମଧ୍ୟ ସମୟ ସମୟରେ ଜାଗ୍ରତିଙ୍କ ଫଟୋ ପୋଷ୍ଟ କରୁଥିଲେ, ଯାହାକୁ ନେଇ ଚର୍ଚ୍ଚା ହୋଇଥିଲା। ଗତ କିଛି ଦିନ ଭିତରେ ବିଭିନ୍ନ ସାକ୍ଷାତକାରରେ ଜାଗ୍ରତି ଓ ଅନୁଭବ ବିବାହ କରିବାକୁ ଇସାରା ଦେଇଥିଲେ। ହେଲେ ଭାଇରାଲ ହୋଇଥିବା ଫଟୋକୁ ନେଇ ଉଭୟ ଏବେ ଯାଏଁ କୌଣସି ସ୍ପଷ୍ଟ ସୂଚନା ଦେଇନାହାନ୍ତି ।

Argus News | argus news | Odisha Latest News, Breaking News, Trending News, Live TV