ପଞ୍ଚଭୂତରେ ବିଲୀନ ହେଲେ ଅଭିନେତା ମନୋଜ କୁମାର । ରାଷ୍ଟ୍ରୀୟ ସମ୍ମାନ ସହ ସମ୍ପନ୍ନ ହୋଇଛି ମନୋଜ କୁମାରଙ୍କ ଶେଷକୃତ୍ୟ । ମୁମ୍ବାଇର ଜୁହୁ ସ୍ଥିତ ଶ୍ମଶାନ ଘାଟରେ ଅନ୍ତିମ ସଂସ୍କାର ସମ୍ପନ୍ନ ହୋଇଛି । ହଜାର ହଜାର ପ୍ରଶଂସକ ମନୋଜଙ୍କ ପାର୍ଥିକ ଶରୀରର ଶେଷ ଦର୍ଶନ କରିଥିବାବେଳେ ବହୁ ବରିଷ୍ଠ ନେତା, ଅଭିନେତା ମନୋଜଙ୍କ ଅନ୍ତିମ ସଂସ୍କାର ସମୟରେ ଉପସ୍ଥିତ ଥିଲେ।

ଅଭିନେତା ମନୋଜ କୁମାରଙ୍କର ଶୁକ୍ରବାର ଦିନ 87 ବର୍ଷ ବୟସରେ ପରଲୋକ ହୋଇଯାଇଛି । ସେ ବହୁତ ଦିନ ଧରି ଅସୁସ୍ଥ ଥିଲେ। ତାଙ୍କ ପୁଅ କୁନାଲ ଗୋସ୍ୱାମୀ କହିଛନ୍ତି ଯେ ସେ ୨-୩ ସପ୍ତାହ ଧରି ଅସୁସ୍ଥ ଥିଲେ । ତାଙ୍କୁ ଚିକିତ୍ସା ପାଇଁ କୋକିଲାବେନ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । ଶୁକ୍ରବାର ଭୋର ୩:୩୦ ସମୟରେ ସେ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଥିଲେ ।

ମନୋଜ କୁମାରଙ୍କୁ ରାଷ୍ଟ୍ରୀୟ ସମ୍ମାନ ସହିତ ଶେଷ ବିଦାୟ ଦିଆଯାଇଛି । ଅମିତାଭ ବଚ୍ଚନ, ଅଭିଷେକ ବଚ୍ଚନ, ଅରବାଜ ଖାନ-ସଲିମ ଖାନ, ସୁଭାଷ ଘାଇ, ରାଜପାଲ ଯାଦବ, ଅନୁ ମଲିକ, ପ୍ରେମ ଚୋପ୍ରାଙ୍କ ସମେତ ବହୁ ବଲିଉଡ ସେଲିବ୍ରିଟି ମନୋଜ କୁମାରଙ୍କୁ ଶେଷ ବିଦାୟ ଦେଇଥିଲେ ।

୧୯୫୭ରେ ଫିଲ୍ମ ଫ୍ୟାସନ ଜରିଆରେ ଚଳଚ୍ଚିତ୍ର ଜଗତରେ ପାଦ ଥାପିଥିଲେ ମନୋଜ କୁମାର । ୧୯୬୫ ମସିହା ଥିଲା ତାଙ୍କ କ୍ୟାରିୟର ପାଇଁ ଗେମ୍ ଚେଞ୍ଜର୍ । ସେହି ବର୍ଷ ଆସିଥିବା ସହିଦ ଫିଲ୍ମ ତାଙ୍କ କ୍ୟାରିୟରକୁ ମାଇଲେଜ୍ ଦେଇଥିଲା । ଆଉ ଏହା ପରେ ସେ ପଛକୁ ଫେରି ଚାହିଁ ନଥିଲେ । ସେ କୌଣସି ବି ରୋ ହେଉ, ନିଖୁଣ ଅଭିନୟ କରି ଦର୍ଶକଙ୍କ ମନ ଜିଣି ନେଉଥିଲେ ମନୋଜ କୁମାର । କେବଳ ମନୋଜଙ୍କ ଫିଲ୍ମ ହିଟ୍ ହେଉ ନଥିଲା, ତାଙ୍କ ଗୀତରେ ଝୁମୁଥିଲେ ଲୋକ ।

ସେ ଅଭିନୟ କରିଥିବା ଉପକାର ଫିଲ୍ମର ଗୀତ 'ମେରେ ଦେଶ କି ଧରତୀ' ଆଜି ବି ଗୁଞ୍ଜରିତ ହେଉଛି ଦେଶର ପିଲାଠୁ ବୁଢ଼ାଙ୍କ ତୁଣ୍ଡରେ । ୧୯୩୭ ଜୁଲାଇ ୨୪ରେ ମନୋଜ କୁମାର ପରାଧୀନ ଭାରତ ଆଜିର ପାକିସ୍ତାନରେ ଜନ୍ମ ହୋଇଥିଲେ । ତାଙ୍କ ନାଁ ଥିଲା ହରିକୃଷ୍ଣ ଗିରି ଗୋସ୍ଵାମୀ । ଦେଶ ବିଭାଜନ ବେଳେ ତାଙ୍କ ପରିବାର ଦିଲ୍ଲୀ ପଳାଇ ଆସିଥିଲେ ।

Argus News | argus news | Odisha Latest News, Breaking News, Trending News, Live TV