ଆମେରିକାର ଡୋନାଲ୍ଡ ଟ୍ରମ୍ପ ପ୍ରଶାସନ ଭାରତ ଉପରେ ୫୦% ଶୁଳ୍କ ଲଗାଇବାକୁ ନେଇ ଦୁଇ ଦେଶ ମଧ୍ୟରେ ସମ୍ପର୍କରେ ଏକପ୍ରକାର ତିକ୍ତତା ଦେଖାଦେଇଛି। କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚୀନର ତିଆନଜିନରେ ଅନୁଷ୍ଠିତ ଏସସିଓ ସମ୍ମିଳନୀରେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଓ ଚୀନ ରାଷ୍ଟ୍ରପତି ଶି ଜିନପିଙ୍ଗଙ୍କ ସହିତ ଗୋଟିଏ ମଞ୍ଚରେ ଏକାଠି ହୋଇ ଆମେରିକାକୁ ସ୍ପଷ୍ଟ ବାର୍ତ୍ତା ଦେଇଥିଲେ ଯେ ଭାରତ ପାଖରେ ବାଣିଜ୍ୟ ପାଇଁ ଅନେକ ବିକଳ୍ପ ଖୋଲା ଅଛି। ତେବେ ଏହା ଭିତରେ ଏକ ଗୁରୁତ୍ବପୂର୍ଣ୍ଣ କଥା ସାମ୍ନାକୁ ଆସୁଛି। ଯେଉଁଥିରୁ ଜଣାପଡ଼ିଛି ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜ ଦେଶର ସ୍ବାର୍ଥ ପାଇଁ ନୁହେଁ, ବରଂ ଅନ୍ୟ କାରଣ ପାଇଁ ଭାରତକୁ ଜାଣିଶୁଣି ଟାର୍ଗେଟ୍ କରିଛନ୍ତି ଏବଂ ଯାହା ଫଳରେ ଉଭୟ ଦେଶ ମଧ୍ୟରେ ସମ୍ପର୍କ ଖରାପ ହେବାରେ ଲାଗିଛି।

ଆମେରିକା ପ୍ରଶାସନର ବରିଷ୍ଠ କୂଟନୀତିଜ୍ଞମାନେ ଏବେ ଟ୍ରମ୍ପଙ୍କ ଶୁଳ୍କ ନୀତି ବିରୁଦ୍ଧରେ ଖୋଲାଖୋଲି ଭାବେ କହିବା ଆରମ୍ଭ କରିଛନ୍ତି। ସେମାନେ ଡୋନାଲ୍ଡ ଟ୍ରମ୍ପଙ୍କ ଉଦ୍ଦେଶ୍ୟ ଉପରେ ମଧ୍ୟ ସ୍ପଷ୍ଟ ଭାବେ କହିଛନ୍ତି ଯେ ଭାରତ ବିରୋଧରେ ଟ୍ରମ୍ପଙ୍କ ଶୁଳ୍କ ନୀତି ଆମେରିକାର ବ୍ୟବସାୟିକ ସ୍ୱାର୍ଥ ସହିତ ଜଡିତ ନୁହେଁ। ବରଂ ଏହା ପଛରେ ଟ୍ରମ୍ପଙ୍କ ଗଭୀର ବ୍ୟକ୍ତିଗତ ସ୍ୱାର୍ଥ ରହିଛି। ଆମେରିକୀୟ ଗୁଇନ୍ଦାମାନେ ବି ଆଶ୍ଚର୍ଯ୍ୟ ହୋଇଛନ୍ତି ଯେ ଯେଉଁ ଭାରତକୁ ଆମେରିକା ବର୍ଷ ବର୍ଷ ଧରି କୂଟନୈତିକ ପ୍ରୟାସ ପରେ କମ୍ୟୁନିଷ୍ଟ ଋଷିଆନ ବ୍ଲକରୁ ଅଲଗା କରି ଚୀନ୍ ବିରୁଦ୍ଧରେ ଏକ ଶକ୍ତି ଭାବରେ ଗଢ଼ି ତୋଳିଥିଲା, ସେହି ଭାରତ ଏବେ ଆମେରିକା ରାଷ୍ଟ୍ରପତିଙ୍କ ତ୍ରୁଟିପୂର୍ଣ୍ଣ ନୀତି ଯୋଗୁଁ ଖୋଲାଖୋଲି ଭାବରେ ଚୀନ୍ ଏବଂ ଋଷ ସହିତ ବନ୍ଧୁତା କରୁଛି।

ଆମେରିକାର ପୂର୍ବତନ NSA ବା ଜାତୀୟ ସୁରକ୍ଷା ପରାମର୍ଶଦାତା ଜେକ୍ ସୁଲିଭାନ୍ ଏକ ସାକ୍ଷାତକାରରେ କହିଛନ୍ତି ଯେ ଡୋନାଲ୍ଡ ଟ୍ରମ୍ପ ପାକିସ୍ତାନରେ ତାଙ୍କ ପରିବାରର ବ୍ୟବସାୟିକ ଚୁକ୍ତିକୁ ପ୍ରୋତ୍ସାହିତ କରିବା ପାଇଁ ଭାରତ ସହିତ ସମ୍ପର୍କକୁ ବଳି ପକାଇ ଦେଇଛନ୍ତି । ସୁଲିଭାନ୍ କହିଛନ୍ତି, ଦଶନ୍ଧି ଧରି, ଦ୍ୱିପାକ୍ଷିକ ସହଯୋଗ ଆଧାରରେ, ଆମେରିକା ବିଶ୍ୱର ସର୍ବବୃହତ ଗଣତନ୍ତ୍ର, ଭାରତ ସହିତ ସମ୍ପର୍କକୁ ମଜବୁତ କରିବା ପାଇଁ କାମ କରିଆସିଛି। ଯାହା ସହିତ ଆମେ ପ୍ରଯୁକ୍ତିବିଦ୍ୟା, ପ୍ରତିଭା, ଅର୍ଥନୀତି ଏବଂ ଚୀନର ରଣନୈତିକ ପ୍ରବୃତ୍ତିକୁ ମୁକାବିଲା କରିବା ଉଚିତ। ଏହି କ୍ଷେତ୍ରରେ ଗୁରୁତ୍ୱପୂର୍ଣ୍ଣ ପ୍ରଗତି ହୋଇଛି। ସେ ଆହୁରି କହିଛନ୍ତି କି ଟ୍ରମ୍ପ୍ ଏବେ ଭାରତ ସହିତ ସମ୍ପର୍କକୁ ସାଇଡ୍ କରିଦେଇଛନ୍ତି। ଯାହାର ମୁଖ୍ୟ କାରଣ ହେଉଛି, ଟ୍ରମ୍ପ ପରିବାର ପାକିସ୍ତାନ ସହିତ ବ୍ୟବସାୟିକ ଚୁକ୍ତି କରିବାକୁ ଚାହୁଁଛି।

ସୁଲିଭାନ୍ କହିଛନ୍ତି କି, ଏହା ଆମେରିକା ପାଇଁ ଏକ ବଡ଼ ରଣନୈତିକ ବିପର୍ଯ୍ୟୟ। କାରଣ ଏକ ଦୃଢ଼ ଭାରତ-ଆମେରିକା ସହଭାଗୀତା ଆମର ସ୍ୱାର୍ଥକୁ ସୁରକ୍ଷା ଦିଏ। ତେବେ ଭାରତ ସହିତ ଟ୍ରମ୍ପଙ୍କ ସମ୍ପର୍କ ଖରାପ ହେବା ଉପରେ ସୁଲିଭାନ୍ କହିଛନ୍ତି, ଯଦି ଆମର ସହଯୋଗୀମାନେ ଏହି ସିଦ୍ଧାନ୍ତ ନିଅନ୍ତି ଯେ ସେମାନେ ଆମ ଉପରେ କୌଣସି ପ୍ରକାରେ ବିଶ୍ୱାସ କରିପାରିବେ ନାହିଁ, ତେବେ ଏହା ଆମେରିକୀୟ ଲୋକଙ୍କ ଦୀର୍ଘକାଳୀନ ସ୍ୱାର୍ଥରେ ନୁହେଁ। ସେ ଆହୁରି କହିଛନ୍ତି, ଭାରତ ସହିତ ଯାହା ଘଟୁଛି ତାହା ବିଶ୍ୱବ୍ୟାପୀ ଆମର ସମସ୍ତ ସମ୍ପର୍କ ଏବଂ ସହଭାଗୀତା ଉପରେ ସିଧାସଳଖ ଏବଂ ବ୍ୟାପକ ପ୍ରଭାବ ପକାଇବ। ତେବେ ଆମେରିକାର ପୂର୍ବତନ NSAଙ୍କ ଏଭଳି ବୟାନରୁ ଗୋଟିଏ କଥା ତ ସ୍ପଷ୍ଟ ହୋଇଯାଇଛି ଯେ ଡୋନାଲ୍ଡ ଟ୍ରମ୍ପ ନିଜ ଦେଶର ହିତ ପାଇଁ ଭାରତ ଉପରେ ଅତିରିକ୍ତ ଟାରିଫ୍ କସିନାହାଁନ୍ତି, ବରଂ ପାକିସ୍ତାନ ସହିତ ନିଜ ପାରିବାରିକ ବ୍ୟବସାୟିକ ସମ୍ପର୍କ ବଢ଼ାଇବା ପାଇଁ ଜାଣି ଶୁଣି ଭାରତକୁ ଟାର୍ଗେଟ୍ କରିଛନ୍ତି।

Argus News | argus news | Odisha Latest News, Breaking News, Trending News, Live TV