ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତି ଉନ୍ମୋଚନ କଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ
ଅର୍ଗସ ବ୍ୟୁରୋ: ଆଜି ମହାନ ସ୍ୱାଧୀନତା ସଂଗ୍ରାମୀ ବୀର ସୁରେନ୍ଦ୍ର ସାଏଙ୍କ ଜନ୍ମ ଜୟନ୍ତୀ । ବୀରସୁରେନ୍ଦ୍ର ସାଏ ବିମାନ ବନ୍ଦର ସମ୍ମୁଖରେ ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତି ଉନ୍ମୋଚନ କଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହି କାର୍ଯ୍ୟକ୍ରମରେ ଭର୍ଚୁଆଲ ମାଧ୍ୟମରେ ଯୋଗଦେଇଥିଲେ କେନ୍ଦ୍ର କୋଇଲା ମନ୍ତ୍ରୀ ପ୍ରହଲ୍ଲାଦ ଯୋଶୀ । ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ, ବରଗଡ ସାଂସଦ ସୁରେଶ ପୂଜାରୀ ସମେତ ବ୍ରଜରାଜନଗର ବିଧାୟକ କିଶୋର ମହାନ୍ତି ମଧ୍ୟ ଉପସ୍ଥିତ ରହିଥିଲେ ।
ଭାରତବର୍ଷର ଇତିହାସ ପୃଷ୍ଠାରେ ଯେଉଁ କେତେକ ବିପ୍ଳବୀ, ବୀର, ସଂଗ୍ରାମୀ, ଯୁଗଜନ୍ମା ପୁରୁଷ ନିଜ ଜନ୍ମଭୂମିର ସୁରକ୍ଷା ପାଇଁ ସମସ୍ତ ସୁଖଶାନ୍ତିକୁ ଜଳାଞ୍ଜଳି ଦେଇ ଦୁଃଖକଷ୍ଟ ଓ ନିର୍ଯ୍ୟାତନା ବରଣ କରି ଯୁଦ୍ଧରେ ଆତ୍ମବଳି ଦେଇଥିଲେ ସେମାନଙ୍କ ମଧ୍ୟରେ ମହାନ ସଂଗ୍ରାମୀ ବୀର ସୁରେନ୍ଦ୍ର ସାଏ ସର୍ବାଗ୍ରେ ସ୍ମରଣୀୟ। ମଣିଷ ମାତ୍ରେ ହିଁ ଚାହେଁ ସ୍ୱାଧୀନ ଜୀବନଯାପନ, କିନ୍ତୁ ଯେତେବେଳେ ଏହା ମିଳେ ନାହିଁ, ସେତେବେଳେ ସେ ହୋଇଯାଏ ସଂଗ୍ରାମୀ ଓ ବିପ୍ଳବୀ। ସଂଗ୍ରାମ ଓ ବିପ୍ଳବ କରି ସ୍ୱାଧୀନତା ପାଇବା ପାଇଁ ଚେଷ୍ଟା କରେ। ଭାରତର ସ୍ୱାଧୀନତା ସଂଗ୍ରାମରେ ଯେଉଁମାନେ ବାସ୍ତବିକ ବିପ୍ଳବ କରି ପ୍ରାଣବଳି ଦେଇଥିଲେ ସେମାନଙ୍କ ମଧ୍ୟରେ ଅନ୍ୟତମ ଥିଲେ ବୀର ସୁରେନ୍ଦ୍ର ସାଏ। ସେ ଏଭଳି ଜଣେ ବିପ୍ଳବୀ ଥିଲେ ଯିଏକି ବ୍ରିଟିଶ ସରକାରଙ୍କର ଅନ୍ୟାୟ, ଅତ୍ୟାଚାର ଓ ଅନୀତି ଆଗରେ ମୁଣ୍ଡ ନ ନୁଆଁଇ ଜୀବନସାରା ସଂଗ୍ରାମ କରିଥିଲେ।
ବୀର ସୁରେନ୍ଦ୍ର ସାଏ ଝାରସୁଗୁଡ଼ାର ଚୌହାନ ରାଜପରିବାରରେ ‘ଖିଣ୍ଡା’ ନାମକ ଗ୍ରାମରେ ଜନ୍ମଗ୍ରହଣ କରିଥିଲେ ୧୮୦୯ ଜାନୁଆରୀ ୨୩ରେ । ୧୮୮୪ ମସିହା ଫେବୃଆରୀ ୨୮ ତାରିଖ ଅପରାହ୍ଣ ଗୋଟେବେଳେ ୭୫ ବର୍ଷ ବୟସରେ ଜନନାୟକ ବୀର ସୁରେନ୍ଦ୍ର ସାଏଙ୍କର ଜୀବନପ୍ରଦୀପ ନିର୍ବାପିତ ହେଲା।
