ଖରାଦିନ ଆସିଲାଣି । ଏବେ ବଢିବ ଆଇସକ୍ରିମ , କୁଲଫିର ଚାହିଦା । ଅତିରିକ୍ତ ଖରାରେ ଯେତେବେଳେ ଆପଣ ବାହାରୁ କୌଣସି କାମ ସାରି ବା ଅଫିସ ସାରି ଘରକୁ ଫେରିବେ, ସେତେବେଳେ ଲୋଡା ହେଉଥିବ ଥଣ୍ଡା ପାଣି ଟିକେ ନହେଲେ ଥଣ୍ଡା ଥଣ୍ଡା ଆଇସକ୍ରିମ । କିନ୍ତୁ ପ୍ରତିଦିନ ଆଇସକ୍ରିମ କିଣି ରଖିବା ସମ୍ଭବ ନୁହେଁ । ସେଥିପାଇଁ ଏହାର ସହଜ ଉପାୟ ହେଉଛି ଘରେ ଏମିତି ଆଇସକ୍ରିମ ପ୍ରସ୍ତୁତ କରନ୍ତୁ, ଯାହା ପାଟିକୁ ସୁଆଦ ଲାଗିବା ସହ ସହଜରେ ଘରେ ପ୍ରସ୍ତୁତ ହୋଇ ପାରିବ । ସେମିତି ଏକ ଆଇସକ୍ରିମ ନାଁ ହେଉଛି 'ଖୋୟା କୁଲଫି' ।ଜାଣନ୍ତୁ କେମିତି ପ୍ରସ୍ତୁତ କରିବେ ଏହି କୁଲଫି ।

ଏହା ପ୍ରସ୍ତୁତ କରିବା ପାଇଁ ଆବଶ୍ୟକ ହେଉଥିବା ସାମଗ୍ରୀ ଗୁଡିକ ହେଉଛି କ୍ଷୀର, ଖୁଆ, ଗୁଜୁରାତି ପାଉଡର, ଡ୍ରାଏ ଫ୍ରୁଟ୍ସ, ଏବଂ ଅଳ୍ପ ଚିନି ।

ପ୍ରଥମେ କ୍ଷୀରକୁ କମ ଆଞ୍ଚରେ ଫୁଟାଇ ଫୁଟାଇ ଖୁଆ ପ୍ରସ୍ତୁତ କରନ୍ତୁ । ଏହି ଖୁଆକୁ ଏକ ପାତ୍ରରେ କାଢି ରଖିଦିଅନ୍ତୁ । ଅନ୍ୟ ଏକ ପାତ୍ରରେ ଅଳ୍ପ କ୍ଷୀର ନେଇ କମ ଆଞ୍ଚରେ ଏହାକୁ ଗରମ କରନ୍ତୁ । ଏହି କ୍ଷୀର ଅଧା କମିବା ପର୍ଯ୍ୟନ୍ତ ଏହାକୁ ଫୁଟାନ୍ତୁ । ପରେ ଏଥିରେ ଅଳ୍ପ ଖୁଆ, କିଛି ଚିନି, ଅଳ୍ପ ଗୁଜୁରାତି ପାଉଡର , ଏବଂ କିଛି ଡ୍ରାଏ ଫ୍ରୁଟ୍ସ ପକାଇ ଭଲ ଭାବରେ ମିଶାଇ ଏହାକୁ ଫୁଟାନ୍ତୁ ।

ପ୍ରାୟ ୫ରୁ ୧୦ ମିନିଟ୍ ଯାଏଁ ଟିକେ ମୋଟା ଆସ୍ତରଣ ବସିବା ଯାଏଁ ଏହାକୁ କମ୍ ଆଞ୍ଚରେ ଫୁଟିବାକୁ ଛାଡିଦିଅନ୍ତୁ । ଆସ୍ତରଣ ବସିଗଲା ପରେ ଗ୍ୟାସ ବନ୍ଦ କରି ଏହାକୁ ଥଣ୍ଡା ହେବାକୁ ଛାଡି ଦିଅନ୍ତୁ । ଥଣ୍ଡା ହେଇ ଆସିଲେ ଏହାକୁ ଆଇସକ୍ରିମ ତିଆରି ପାତ୍ରରେ ପୁରାଇ ଏକ କାଠି ସହ ନିଜର ଫ୍ରିଜର ଭିତରେ ରଖିଦିଅନ୍ତୁ । ରାତିରେ ପ୍ରସ୍ତୁତ କରି ରାତିସାରା ୮ ରୁ ୯ ଘଣ୍ଟା ପାଇଁ ଏହାକୁ ଫ୍ରିଜରରେ ରଖିଦିଅନ୍ତୁ ।

ସକାଳୁ ଏହି ପାତ୍ରକୁ କାଢି ଏକ ପାତ୍ରରେ ଥଣ୍ଡା ପାଣି ଆଣି ଏହାକୁ ତା ଭିତରେ କିଛି ସମୟ ରଖିଦିଅନ୍ତୁ । କିଛି ସମୟ ପରେ ସେହି ଛାଞ୍ଚରୁ ଧିରେଧିରେ ତିଆରି କରିଥିବା ଆଇସକ୍ରିମକୁ କାଢନ୍ତୁ । ଦେଖିବେ ପ୍ରସ୍ତୁତ ହେଇଯିବ ଆପଣଙ୍କ ମନ ପସନ୍ଦର ଖୋୟା କୁଲଫି । ଏହାକୁ ନିଜ ପରିବାର ନିଜ ପିଲାଙ୍କୁ କରି ଖାଇବାକୁ ଦିଅନ୍ତୁ । ଏହା ସ୍ବାଦିଷ୍ଟ ସହ ସ୍ବାସ୍ଥ୍ୟକର ମଧ୍ୟ ।

Argus News | argus news | Odisha Latest News, Breaking News, Trending News, Live TV