ମାର୍ଚ୍ଚ ୮ ତାରିଖ । ଅନ୍ତର୍ଜାତୀୟ ମହିଳା ଦିବସ । ମହିଳାଙ୍କ ପାଇଁ ଆଜିର ଦିନ । ଚଳିତ ବର୍ଷର ଥିମ ରହିଛି 'ଆକ୍ସିଲରେଟ୍ ଆକ୍ସନ୍' । ମହିଳାଙ୍କ ଉପଲକ୍ଷେ ଆଜି ବିଭିନ୍ନ ସ୍ଥାନରେ ମହିଳାଙ୍କୁ ନେଇ କାର୍ଯ୍ୟକ୍ରମ ମଧ୍ୟ କରାଯାଉଛି । ହେଲେ ଆପଣମାନେ ଜାଣିଛନ୍ତି ଏ ଦିନକୁ ପାଳନ କାହିଁକି କରାଯାଏ । ଏହା ପଛରେ କ’ଣ ରହିଛି କାରଣ ।

ମହିଳାମାନେ ସମାଜରେ ପୁରୂଷ ପରି ସକ୍ଷମ । ମହିଳା ସବୁ କ୍ଷେତ୍ରରେ ତାଙ୍କ ଦକ୍ଷତା ଦେଖାଉଛନ୍ତି । କିନ୍ତୁ ଆଜି ବି ସମାଜରେ ମହିଳାଙ୍କୁ ପୁରୁଷଙ୍କ ତୁଳନାରେ ସମ୍ମାନ ଓ ସୁଯୋଗ ମିଳେନି । ଏହାର ଗୋଟିଏ କାରଣ ହେଉଛି ମହିଳାମାନେ ସେମାନଙ୍କର ଅଧିକାର ବିଷୟରେ ଅବଗତ ନଥାନ୍ତି । ସମାନ କ୍ଷେତ୍ରରେ ସମାନ କାର୍ଯ୍ୟ କରୁଥିବା ଜଣେ ପୁରୁଷ ମହିଳାଙ୍କ ଅପେକ୍ଷା ଅଧିକ ରୋଜଗାର କରନ୍ତି ।

ସେହିଭଳି ଅନ୍ୟାନ୍ୟ କ୍ଷେତ୍ରରେ ମଧ୍ୟ ମହିଳାମାନେ ସେମାନଙ୍କର ଅଧିକାର ବିଷୟରେ ଜାଣି ନଥିବାରୁ ସମାନ ସୁଯୋଗଠାରୁ ଦୂରରେ ରୁହନ୍ତି । ପ୍ରତ୍ୟେକ କ୍ଷେତ୍ରରେ ମହିଳାଙ୍କ ଅଂଶଗ୍ରହଣକୁ ପ୍ରୋତ୍ସାହିତ କରିବା ଏବଂ ମହିଳାମାନଙ୍କୁ ସେମାନଙ୍କର ଅଧିକାର ବିଷୟରେ ଅବଗତ କରାଇବା ପାଇଁ ପ୍ରତିବର୍ଷ ଆନ୍ତର୍ଜାତୀୟ ମହିଳା ଦିବସ ପାଳନ କରାଯାଏ । ସମୟ ସହିତ ମହିଳାମାନେ ସମାଜ ଏବଂ ରାଷ୍ଟ୍ର ଗଠନର ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇପାରିଛନ୍ତି। ନିଜ ଘର ଓ ପରିବାରରେ ସୀମିତ ରହିଥିବା ମହିଳା ଯେବେ ଚାରି କାନ୍ଥରୁ ବାହାରି ଆସିଲେ, ସେମାନେ ଅଦ୍ଭୁତ ସଫଳତା ପାଇବା ଆରମ୍ଭ କଲେ। କ୍ରୀଡା ଠାରୁ ଆରମ୍ଭ କରି ମନୋରଞ୍ଜନ ଏବଂ ରାଜନୀତି ଠାରୁ ସାମରିକ ଏବଂ ପ୍ରତିରକ୍ଷା ମନ୍ତ୍ରଣାଳୟ ପର୍ଯ୍ୟନ୍ତ ମହିଳାମାନେ କେବଳ ଜଡିତ ନୁହଁନ୍ତି ବରଂ ଏକ ବଡ଼ ଭୂମିକା ମଧ୍ୟ ଗ୍ରହଣ କରିଛନ୍ତି।

ତେବେ ଆପଣ ଜାଣନ୍ତି ଅନ୍ତର୍ଜାତୀୟ ମହିଳା ଦିବସ ପାଳନ କେବେ ଏବଂ କେଉଁଠାରୁ ଆରମ୍ଭ ହୋଇଥିଲା ? ଆନ୍ତର୍ଜାତୀୟ ମହିଳା ଦିବସ କେବଳ ମାର୍ଚ୍ଚ ୮ରେ କାହିଁକି ପାଳନ କରାଯାଏ?

୧୯୦୮ ମସିହାରେ ଆମେରିକାରେ ଏକ ଶ୍ରମିକ ଆନ୍ଦୋଳନ ହୋଇଥିଲା, ଯେଉଁଥିରେ ବହୁ ସଂଖ୍ୟକ ମହିଳା ଅଂଶଗ୍ରହଣ କରିଥିଲେ। ପ୍ରାୟ ୧୫,୦୦୦ ମହିଳା ନ୍ୟୁୟର୍କର ରାସ୍ତାରେ ଯାଇ ସେମାନଙ୍କ ଅଧିକାର ପାଇଁ ସ୍ୱର ଉତ୍ତୋଳନ କରିଥିଲେ। କାର୍ଯ୍ୟରତ ମହିଳାମାନେ ସେମାନଙ୍କର କାମର ସମୟ ହ୍ରାସ କରେଇବା ଏବଂ ଦରମା ବୃଦ୍ଧି କରେଇବା ନେଇ ଦାବି କରିଥିଲେ। ମହିଳାମାନେ ଭୋଟ୍ ଦେବାର ଅଧିକାର ମଧ୍ୟ ଦାବି କରିଥିଲେ। ସେମାନଙ୍କର ଅଧିକାରକୁ ନେଇ ମହିଳାଙ୍କ ଉଚ୍ଚ ସ୍ୱର ତତ୍କାଳୀନ ସରକାରଙ୍କ କାନରେ ପଡିଲା। ତା’ପରେ ୧୯୦୯ ମସିହାରେ, ଆମେରିକାର ସୋଶଲିଷ୍ଟ ପାର୍ଟି ମହିଳା ଦିବସ ପାଳନ କରିବାକୁ ଘୋଷଣା କଲା।

ସେହିଭଳି ମାର୍ଚ୍ଚ ୮ ରେ, ଆମେରିକାର ମହିଳାମାନେ ସେମାନଙ୍କର ଅଧିକାର ପାଇଁ ଏକ ପଦଯାତ୍ରା କରିଥିଲେ। ଏହି ଦିନ ମଧ୍ୟ ମହିଳା ଦିବସ ପାଳନ କରିବାକୁ ଘୋଷଣା କରାଯାଇଥିଲା। ଏଥି ସହିତ ୧୯୧୭ ମସିହାରେ, ପ୍ରଥମ ବିଶ୍ୱଯୁଦ୍ଧ ସମୟରେ, ଋଷର ମହିଳାମାନେ ରୁଟି ଏବଂ ଶାନ୍ତି ପାଇଁ ଧର୍ମଘଟ ଆରମ୍ଭ କରିଥିଲେ। ସେମାନେ ଯୁଦ୍ଧକୁ ନେଇ ସେମାନଙ୍କର ଦାବି ଏବଂ ମତାମତ ମଧ୍ୟ ରଖିଥିଲେ। ଏହା ପରେ ସମ୍ରାଟ ନିକୋଲାସ ତାଙ୍କ ପଦରୁ ଇସ୍ତଫା ଦେଇଥିଲେ ଏବଂ ମହିଳାମାନେ ଭୋଟ୍ ଦେବାର ଅଧିକାର ପାଇଥିଲେ। ସେମାନଙ୍କୁ ଦିଆଯାଇଥିବା ଅଧିକାରକୁ ଦୃଷ୍ଟିରେ ରଖି ୟୁରୋପରେ ମହିଳାମାନେ ମଧ୍ୟ କିଛି ଦିନ ପରେ ମାର୍ଚ୍ଚ ୮ରେ ଶାନ୍ତି କାର୍ଯ୍ୟକର୍ତ୍ତାଙ୍କୁ ସମର୍ଥନ କରିଥିଲେ। ଏହି କାରଣରୁ ମାର୍ଚ୍ଚ ୮ରୁ ଆନ୍ତର୍ଜାତୀୟ ମହିଳା ଦିବସ ପାଳନ ଆରମ୍ଭ ହୋଇଥିଲା।

Argus News | argus news | Odisha Latest News, Breaking News, Trending News, Live TV