ଗଜପତି ଜିଲ୍ଲା ପାରଳାଖିମୁଣ୍ଡି ବନବିଭାଗର ଏସିଏଫ ସୌମ୍ୟରଞ୍ଜନ ମୃତ୍ୟୁ ମାମଲାକୁ ବିତିଲାଣି 4 ବର୍ଷ । ଏ ଯାଏଁ ନ୍ୟାୟକୁ ଅପେକ୍ଷା କରିଛନ୍ତି ସୌମ୍ୟଙ୍କ ପରିବାର । ଏପଟେ ଆଜି ବିଧାନସଭା ଶୂନ୍ୟକାଳରେ ଉଠିଛି ଏହି ପ୍ରସଙ୍ଗ । ପୂର୍ବ ବିଜେଡି ସରକାରକୁ ଟାର୍ଗେଟ୍ କରିଛନ୍ତି ବିଜେପି ବିଧାୟକ ପଦ୍ମଲୋଚନ ପଣ୍ଡା । ସୌମ୍ୟରଞ୍ଜନ ପାରଳାଖେମୁଣ୍ଡିରେ ରହୁଥିଲେ । ଡିଏଫଓଙ୍କ ସହ ତାଙ୍କ ଭଲ ସମ୍ପର୍କ ନଥିଲା । ଅଢେଇ ଶହ ଗ୍ରାମ କିରୋସିନିରେ ସୌମ୍ୟଙ୍କ ମୃତ୍ୟୁ ହେଲା । ପୋଡିବାର ନିଦର୍ଶନ ନାହିଁ କିନ୍ତୁ ମାରି ଦିଆଗଲା । କିଭଳି ସୌମ୍ୟଙ୍କ ମୃତ୍ୟୁ ହେଲା, କାହାର ଚକ୍ରାନ୍ତ ଆଉ କାହାର ସମ୍ପୃକ୍ତି ଥିଲା ସବୁ କଥା ସାମ୍ନାକୁ ଆସିବା ଦରକାର । ପୁଣି ଫାଇଲ୍ ଖୋଲି ତଦନ୍ତ କରିବାକୁ ଦାବି କରିଛନ୍ତି ବିଧାୟକ ପଦ୍ମଲୋଚନ ପଣ୍ଡା ।

ଉପରିସ୍ଥ ଅଧିକାରୀଙ୍କ ସହ ମାମଲାରେ ତତ୍କାଳୀନ ବିଜେଡି ସରକାରରେ ମନ୍ତ୍ରୀ ଥିବା ଗଞ୍ଜାମ ଜିଲ୍ଲାର ଜଣେ ବଡ଼ ନେତାଙ୍କ ବିରୋଧରେ ଅଭିଯୋଗ କରିଥିଲେ ମୃତ ସୌମ୍ୟଙ୍କ ବାପା। ଏବେ ପୁଣି ପୂର୍ବ ବିଜେଡି ସରକାରରେ ମନ୍ତ୍ରୀ ଥିବା ଆଉ ଦୁଇ ଜଣ ବରିଷ୍ଠ ନେତାଙ୍କ ମାମଲାରେ ବିବାଦୀୟ ଭୂମିକା ନେଇ ସାଂଘାତିକ ଅଭିଯୋଗ କରିଛନ୍ତି ସୌମ୍ୟଙ୍କ ମାମୁଁ। ଏମାନଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରିବାକୁ ଦାବି କରିଛନ୍ତି ।

କ୍ଷମତା ଲୋଭରେ ବିଜେଡି ସରକାର ଆଇନର ହାତ ବାନ୍ଧିବା ସହ ACF ସୌମ୍ୟରଞ୍ଜନଙ୍କ ଅପରାଧୀଙ୍କୁ ଘଣ୍ଟ ଘୋଡାଉଥିବା ଅଭିଯୋଗ ହୋଇଥିଲା। ଏବେ ଖୋଦ୍ ଶାସକ ଦଳର ଜଣେ ବିଧାୟକଙ୍କ ଦାବି ପରେ ବିଜେପି ସରକାର ସୌମ୍ୟଙ୍କ ଫାଇଲ୍ ଖୋଲିବେ, ସୌମ୍ୟଙ୍କ ପରିବାର ନ୍ୟାୟ ମିଳିବ ବୋଲି ଆଶା ରଖିଛନ୍ତି । ସିମୁଳିଆରୁ ମନୋଜ ପ୍ରଧାନ ଓ ଭୁବନେଶ୍ବରରୁ ରୋଶନ ରଥଙ୍କ ରିପୋର୍ଟ ଅର୍ଗସ୍ ନ୍ୟୁଜ୍

Argus News | argus news | -Argusnews Home: Odisha Latest News, Breaking News, Trending News, Live TV and more