ରାଜ୍ୟ ରାଜନୀତିରେ ପ୍ରଥମ। ବିଶୃଙ୍ଖଳିତ ଆଚରଣ ପାଇଁ ଏକା ସାଙ୍ଗରେ କଂଗ୍ରେସର ସମସ୍ତ ୧୪ ବିଧାୟକ ଗୃହରୁ ନିଲମ୍ବିତ । ଗତକାଲି ବିଧାନସଭାରେ ଘଣ୍ଟ ଗିନି ବଜାଇ ବିଶୃଙ୍ଖଳା କରିବାକୁ ନେଇ, ଗତକାଲି କଂଗ୍ରେସ ବିଧାୟକ ଦଳ ନେତା ରାମ ଚନ୍ଦ୍ର କାଡାମଙ୍କ ସମେତ 12 ବିଧାୟକଙ୍କୁ ନିଲମ୍ବନ କରିଥିଲେ ବାଚସ୍ପତି। ହେଲେ ନିଲମ୍ବନ ସତ୍ତ୍ବେ ଗୃହ ଛାଡ଼ିନଥିଲେ କଂଗ୍ରେସ ବିଧାୟକ। ଏପରିକି ବାଚସ୍ପତି କହିବା ପରେ ବି ଛାଡିନଥିଲେ ଗୃହ। ବିଧାନସଭା ମୂଲତବି ପରେ ବାଚସ୍ପତିଙ୍କ ଫୋଡିୟମ ତଳେ ଧାରଣାରେ ବସିଥିଲେ। ପରିସ୍ଥିତି ଏପରି ହେଲା ଯେ ବିଧାନସଭାର ସୁରକ୍ଷା କର୍ମୀଙ୍କ ସହ ମୁହାଁମୁହିଁ ହୋଇଥିଲେ କଂଗ୍ରେସ ବିଧାୟକ। ଏପଟେ ବିଧାନସଭା ବାହାରେ ଜମା ହେବାରେ ଲାଗିଥିଲେ କଂଗ୍ରେସ ନେତା ଓ କର୍ମୀ।

ପିସିସି ସଭାପତିଙ୍କ ସମେତ ପୂର୍ବତନ କଂଗ୍ରେସ ବିଧାୟକ ବିଧାନସଭା ଭିତରକୁ ଯିବାକୁ ଲାଗିଥିଲେ। ଏହାକୁ ନେଇ ସୁରକ୍ଷା ଦାୟିତ୍ବରେ ଥିବା ପୋଲିସ ଅଧିକାରୀଙ୍କ ସହ ହୋଇଥିଲା ପ୍ରବଳ ଯୁକ୍ତି ତର୍କ। ବିଧାନସଭା ଗେଟ ସମ୍ମୁଖରେ କଂଗ୍ରେସ ନେତା ଓ କର୍ମୀ ଧାରଣା ଦେବା ସହ ସରକାର ବିରୋଧୀ ସ୍ଲୋଗାନ ଦେଇଥିଲେ । ପ୍ରାୟ ଦେଢ ଘଣ୍ଟା ଧରି ଏପରି ଡ୍ରାମା ଚାଲିବା ପରେ କଂଗ୍ରେସ ନେତା ଓ କର୍ମୀଙ୍କୁ ଉଠାଇନେଇଥିଲା ପୋଲିସ ।
ରାତି ପ୍ରାୟ 2 ଟା ବେଳେ ଗୃହରେ ଥିବା କଂଗ୍ରେସ ବିଧାୟକଙ୍କୁ ବିଧାନସଭା ବାହାରେ ଛାଡ଼ିଦେଇଥିଲେ ସୁରକ୍ଷା କର୍ମୀ । ସେଠାରୁ ସେମାନଙ୍କୁ ବସରେ ଆଣି କଂଗ୍ରେସ ଭବନ ଆଗରେ ଛାଡ଼ିଦେଇଥିଲା ପୋଲିସ । ଅନ୍ୟ ନେତା ଓ କର୍ମୀ ବି ପହଞ୍ଚିଥିଲେ। ନାରାବାଜି ସହ ଝାଞ୍ଜ କୀର୍ତ୍ତନ ବି ଚାଲିଲା । ଶେଷରେ ହାଲିଆ ହୋଇ ରାସ୍ତା ଉପରେ ଶୋଇ ଯାଇଥିଲେ କଂଗ୍ରେସ ବିଧାୟକ ଓ ନେତା।

ସକାଳୁ ଅନ୍ୟ କଂଗ୍ରେସ କର୍ମୀ ଓ ନେତାମାନେ ଏକାଠି ହୋଇ ବିଧାନସଭା ସଭା ଅଭିମୁଖେ ଯାଇଥିଲେ । ଘଣ୍ଟ ବାଡେଇ ଆଗରେ ଚାଲିଥିଲେ କଂଗ୍ରେସ ବିଧାୟକ। ବିଧାନସଭା ନିକଟରେ ପୋଲିସ ବ୍ୟାରିକେଟ ଲଗାଇ କଂଗ୍ରେସ କର୍ମୀଙ୍କ ରାସ୍ତା ଅବରୋଧ କରିଥିଲା। ଏହାପରେ ଆରମ୍ଭ ହୋଇଥିଲା ପୋଲିସ ଓ କଂଗ୍ରେସ କର୍ମୀଙ୍କ ମଧ୍ୟରେ ଧସ୍ତାଧସ୍ତି। ବିଧାନସଭା ଗେଟର ତାଲା ଭାଙ୍ଗିବାକୁ ଉଦ୍ୟମ କରିଥିଲେ କଂଗ୍ରେସ ବିଧାୟକ ସାଗର ଦାସ। ବିଧାନସଭା ସୁରକ୍ଷା ଦାୟିତ୍ୱରେ ଥିବା ପୋଲିସଙ୍କୁ ଦୁର୍ବ୍ୟବହାର ସହ କଲର ଧରିଥିଲେ କଂଗ୍ରେସ କର୍ମୀ। ପରେ କଂଗ୍ରେସ ବିଧାୟକ ଓ କର୍ମୀଙ୍କୁ ଉଠାଇ ନେଇଥିଲା ପୋଲିସ।

ଏହାପରେ ନିଲମ୍ବିତ ହୋଇନଥିବା ଦୁଇ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଓ ରମେଶ ଜେନା ଗୃହ ଭିତରକୁ ଯାଇଥିଲେ। ବିଧାନସଭାରେ ପ୍ରଶ୍ନକାଳ ଚାଲିଥିବା ବେଳେ ବାଚସ୍ପତିଙ୍କ ପୋଡିୟମ ଆଗରେ ଛିଡ଼ାହୋଇ ଉଭୟ ଘଣ୍ଟମାଡ଼ କରିଥିଲେ। ବିଶୃଙ୍ଖଳା ବନ୍ଦ କରିବାକୁ ବାରମ୍ବାର ଅନୁରୋଧ ପରେ ବି ନଶୁଣିବାରୁ ଶେଷରେ ଏ ଦୁହିଁଙ୍କୁ ବି ନିଲମ୍ବନ କରିଥିଲେ ବାଚସ୍ପତି। ସାମ୍ବାଦିକ ସମ୍ମିଳନୀ କରି ଘଟଣାକୁ ଅଗଣତାନ୍ତ୍ରିକ କହିବା ସହ କାଲି ବିଧାନସଭା ଘେରାଉ ବେଳେ ଏହାର ଜବାବ ଦିଆଯିବ ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର।

ଏବେ ପ୍ରଶ୍ନ ଉଠୁଛି ବାଚସ୍ପତିଙ୍କ ନିର୍ଦେଶ ପରେ ଗୃହ ନଛାଡି ହଟଗୋଳ କରିବା କେତେ ଦୂର ଠିକ ? ଆନ୍ଦୋଳନ ବେଲେ ପୋଲିସକୁ ଦୁର୍ବ୍ୟବହାର ଓ ଧମକ ଦେଇ କରି କଣ ବର୍ତ୍ତା ଦେବାକୁ ଚାଁହୁଛି କଂଗ୍ରେସ ? ଆସନ୍ତାକାଲି କଂଗ୍ରେସର ବିଧାନସଭା ଘେରାଉ କାର୍ଯ୍ୟକ୍ରମ ରହିଥିବା ବେଳେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବା ନେଇ ଆଶଙ୍କା କରାଯାଉ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV