ପ୍ରଥମ ଥର ପାଇଁ ଓଡ଼ିଶା ବ୍ୟତୀତ ଅନ୍ୟ କୌଣସି ରାଜ୍ୟର ସରକାରୀ କ୍ୟାଲେଣ୍ଡରରେ ସ୍ଥାନ ପାଇବାକୁ ଯାଉଛି ଏପ୍ରିଲ ୧ ଓଡ଼ିଶା ଦିବସ। ଆସନ୍ତା ବର୍ଷରୁ ଦିଲ୍ଲୀ ସରକାର ମଧ୍ୟ ଓଡିଶା ଦିବସ ପାଳନ କରିବେ । ଓଡ଼ିଶା ଦିବସ ଅବସରରେ ଏହି ଘୋଷଣା କରିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ରେଖାଗୁପ୍ତା। ଓଡ଼ିଶାବାସୀଙ୍କୁ ଓଡ଼ିଶା ଦିବସର ଶୁଭେଚ୍ଛା ଜଣାଇବା ସହ ତାଙ୍କ ସରକାର ଦିଲ୍ଲୀର ବାସକରୁଥିବା ଓଡ଼ିଆଙ୍କ ସୁଖଦୁଃଖର ସବୁବେଳେ ରହିବେ ବୋଲି ପ୍ରତିଶ୍ରୁତି ଦେଇଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ।

ଆଜି ଓଡ଼ିଶା ଦିବସ ଅବସରରେ ନୂଆଦିଲ୍ଲୀ ହଜଖାସ ସ୍ଥିତ ଜଗନ୍ନାଥ ମନ୍ଦିରରେ ପହଞ୍ଚିଥିଲେ ମୁଖ୍ୟମନ୍ତ୍ରୀ ରେଖାଗୁପ୍ତା। ସାଙ୍ଗରେ ଥିଲେ ଦିଲ୍ଲୀ ସରକାରଙ୍କ ସଂସ୍କୃତି ମନ୍ତ୍ରୀ କପିଲ ମିଶ୍ର, ସ୍ଥାନୀୟ ସାଂସଦ ବାଂଶୁରୀ ସ୍ବରାଜ, ସ୍ଥାନୀୟ ବିଧାୟକ ସତିଶ ଉପାଧ୍ୟାୟ ଏବଂ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହଧର୍ମୀଣୀ ମୃଦୁଳା ପ୍ରଧାନ।

ସମସ୍ତେ ଚତୁର୍ଦ୍ଧା ମୂର୍ତ୍ତିଙ୍କ ଦର୍ଶନ କରିଥିଲେ। ଏହି ଅବସରରେ ମନ୍ଦିର ପରିସରରେ ଆୟଜିତ ଓଡ଼ିଶା ଦିବସ କାର୍ଯ୍ୟକ୍ରମରେ ଯୋଗଦେଇ ରେଖା ଗୁପ୍ତା କହିଥିଲେ ସପ୍ତାହେ ଭିତରେ ମହାପ୍ରଭୁ ଜଗନ୍ନାଥଙ୍କର ଦ୍ବିତୀୟ ଥର ପାଇଁ ଦର୍ଶନ କଲି। ନିକଟରେ ଡାକ୍ତର ଦେବେନ୍ଦ୍ର ପ୍ରଧାନଙ୍କୁ ଶ୍ରଦ୍ଧାଞ୍ଜଳି ଜଣାଇବାକୁ ଓଡ଼ିଶା ଆସିଥିବା ସମୟରେ ପୁରୀ ଯାଇ ମହାପ୍ରଭୁଙ୍କ ଦର୍ଶନ କରିଥିଲେ ଦିଲ୍ଲୀ ମୁଖ୍ୟମନ୍ତ୍ରୀ।

ଓଡ଼ିଶା ଦିବସ କାର୍ଯ୍ୟକ୍ରମରେ ଯୋଗଦେଇଥିବାରୁ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ କୃତଜ୍ଞତା ଜଣାଇଛନ୍ତି ହଜଖାସ ଜଗନ୍ନାଥ ମନ୍ଦିର କର୍ମକର୍ତ୍ତା ଓ ପ୍ରବାସୀ ଓଡ଼ିଆ।

ଦେଶର ରାଜଧାନୀରେ ପ୍ରାୟ 14 ଲକ୍ଷ ପ୍ରବାସୀ ଓଡ଼ିଆ ରହୁଥିବା ବେଳେ ସେଥିରୁ ଅଛନ୍ତି ପ୍ରାୟ 8ଲକ୍ଷ ଭୋଟର। ନିକଟରେ ଶେଷ ହୋଇଥିବା ଦିଲ୍ଲୀ ବିଧାନସଭା ନିର୍ବାଚନରେ ବିଜେପିର ବିପୁଳ ବିଜୟ ପଛରେ ଓଡ଼ିଆ ଭୋଟରଙ୍କର ଥିଲା ବଡ଼ ଭୂମିକା। ସେଥିପାଇଁ ପୂର୍ବରୁ ବି ଦିଲ୍ଲୀସ୍ଥିତ ଓଡ଼ିଆଙ୍କ ପ୍ରତି କୃତଜ୍ଞତା ବ୍ୟକ୍ତ କରିଛନ୍ତି ମୁଖ୍ୟମନ୍ତ୍ରୀ ରେଖା ଗୁପ୍ତା।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV