ସରକାର ବଦଳିଛି କିନ୍ତୁ ଏବେ ବି ବନ୍ଦ ହୋଇନି ଆନ୍ଧ୍ରର ହୀନ ଉଦ୍ଦେଶ୍ୟ। ବିଗତ ଦିନରେ KYC ପାଇଁ ଲୋକଙ୍କ ଫିଙ୍ଗର ପ୍ରିଣ୍ଟ ନେଇଥିବା ବେଳେ ଓଡ଼ିଶା ସରକାରଙ୍କ ବିଦ୍ୟୁତ ମିଟର ବାହାର କରି କୋଟିଆରେ ଲୋକଙ୍କ ଘରେ ଆନ୍ଧ୍ର ଲଗାଇଥିଲା ମିଟର। ଆଉ ଏବେ ପୁଣି ସାମ୍ନାକୁ ଆସିଛି ଆନ୍ଧ୍ରର ଆଉ ଏକ କାରସାଦି। କ୍ଲିନ ଇଣ୍ଡିଆ ଡିଜିଟାଲ ଇଣ୍ଡିଆ ସର୍ଭେ ଆରମ୍ଭ କରିଛି ଆନ୍ଧ୍ର। ପ୍ରଥମେ ପାଟୁସିନେରି ଆଉ ପରେ ତଳ ସେମ୍ବି, ଉପର ସେମ୍ବି, ଧୂଳିପଦର ସହ ଅନ୍ୟ ଅଞ୍ଚଳରେ ବି ଷ୍ଟିକର ମାରିଥିଲା ଆନ୍ଧ୍ର ସରକାର। ତେବେ ଏ ନେଇ ସୂଚନା ପାଇବା ପରେ ଆନ୍ଧ୍ରକୁ କଡା ଜବାବ ଦେଇଛି ଓଡ଼ିଶା ପ୍ରଶାସନ। ପଟ୍ଟାଙ୍ଗି ବିଡ଼ିଓ ରାମକୃଷ୍ଣ ନାୟକଙ୍କ ତତ୍ଵାବଧାନରେ ଗ୍ରାଉଣ୍ଡରେ ପହଞ୍ଚି ଆନ୍ଧ୍ର ଲଗାଇଥିବା ଷ୍ଟିକର ଗୁଡିକୁ ହଟାଇଛି ବ୍ଲକ ପ୍ରଶାସନ।

ସେପଟେ କୋଟିଆରେ ସମନ୍ଵିତ ବିକାଶ ପହଞ୍ଚାଇବା ଲାଗି ବିଜେପି ସରକାର ହାତକୁ ନେଇଛନ୍ତି ବଡ ଯୋଜାନା। କୋଟିଆରେ ଖୁବଶୀଘ୍ର ଆରମ୍ଭ ହେବ ମୁଖ୍ୟମନ୍ତ୍ରୀ ବସ ସେବା। ଏପରିକି କୋଟିଆରେ ଥିବା ଖଣି ଖାଦାନ ଗୁଡିକକୁ ଚିହ୍ନଟ କରି ସଦୁପଯୋଗ କରିବା ପଦକ୍ଷେପ ନେଉଛି ଖଣି ବିଭାଗ। ଏ ନେଇ ସୂଚନା ଦେଇ ଖଣି ମନ୍ତ୍ରୀ କହିଛନ୍ତି, କୋଟିଆ ଓଡ଼ିଶାର ଅବିଚ୍ଛେଦ୍ୟ ଅଙ୍ଗ। ଯିଏ ଯେତେ ଦାବି କଲେ ବି କୋଟିଆ ଓଡ଼ିଶାର ରହିଛି ଓ ରହିବ। ନିର୍ବାଚନ ସମୟରେ କୋଟିଆ ଉପରେ ଆନ୍ଧ୍ରର ଆଖି ରହୁଛି । ତାକୁ ପ୍ରତିହତ କରିବା ପାଇଁ ରାଜ୍ୟ ସରକାର କାମ କରୁଛନ୍ତି।

ସେହିପରି ନିଜ ନିଜ ବିଭାଗର ଯୋଜନା ଓ କାର୍ଯ୍ୟକ୍ରମ ନେଇ କୋଟିଆ ଯିବେ ମନ୍ତ୍ରୀ। ଖୁବଶୀଘ୍ର ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡା ସୁଭଦ୍ରା ଯୋଜନା ଓ ଯୋଗାଣ ମନ୍ତ୍ରୀ ମଧ୍ୟ କୋଟିଆ ଯାଇ ରାସନ କାର୍ଡ ବାଣ୍ଟିବେ। ତେବେ ଭବିଷ୍ୟତରେ ଆନ୍ଧ୍ର ଅଧିକାରୀଙ୍କ ଅନୁପ୍ରବେଶ ରୋକିବାକୁ ଗଜପତି ଜିଲ୍ଲାର ସେହି ସ୍ଥାନରେ ପୋଲିସ ଆଉଟ ପୋଷ୍ଟ ପ୍ରତିଷ୍ଠା କରିବାକୁ ଜିଲ୍ଲାପାଳଙ୍କ ସହ ଆଲୋଚନା କରିଥିବା ନେଇ ସୂଚନା ଦେଇଛନ୍ତି ରାଜସ୍ଵ ମନ୍ତ୍ରୀ।

ଅଦାଲତରେ ମାମଲା। କିନ୍ତୁ ଆନ୍ଧ୍ରର ନାହିଁ ଖାତିର୍। କୋଟିଆ ଅଞ୍ଚଳକୁ ପୁଣି ଦେଖିବାକୁ ମିଳିଛି ଆନ୍ଧ୍ର ପ୍ରଶାସନର ଅନୁପ୍ରବେଶ। କିଛି ଦିନର ବ୍ୟବଧାନରେ ଆଉ ଥରେ ଚର୍ଚ୍ଚାରେ କୋଟିଆ। କେତେବେଳେ ନିର୍ବାଚନ, ପୁଣି କେତେବେଳେ ସରକାରୀ ଯୋଜନାର ପ୍ରଲୋଭନ ପୁଣି କେତେବେଳେ ଜୋର ଜବରଦସ୍ତ ଅନୁପ୍ରବେଶ। ଏପରି ସ୍ଥଳେ ଆକ୍ସନ ମୋଡରେ ଓଡିଶାର ବିଜେପି ସରକାର। ତେବେ ଆଗକୁ କୋଟିଆର ଦାଦାଗିରିକୁ ସରକାର କେମିତି ରୋକ୍ ଲଗାଇବେ ତାହା ଉପରେ ରହିଛି ନଜର।

Argus News | argus news | Odisha Latest News, Breaking News, Trending News, Live TV