ବିଧାନସଭାରେ ବିଶୃଙ୍ଖଳା ଓ ବାଚସ୍ପତିଙ୍କ ପୋଡିୟମର ମାଇକ ଭାଙ୍ଗିବା ଘଟଣାକୁ ନେଇ ଗତକାଲି କଂଗ୍ରେସର ବରିଷ୍ଠ ବିଧାୟକ ତାରାପ୍ରସାଦ ବାହିନୀପତିଙ୍କୁ ୭ ଦିନ ପାଇଁ ସସପେଣ୍ଡ କରିଛନ୍ତି ବାଚସ୍ପତି ସୁରମା ପାଢୀ । ତେବେ ତାରାଙ୍କ ସସପେଣ୍ଡକୁ ନେଇ ଓଡ଼ିଶା ପ୍ରଦେଶ କଂଗ୍ରେସ କମିଟି ପ୍ରଭାରୀ ଅଜୟ କୁମାର ଲାଲ୍ଲୁ ଏକ୍ସରେ ଏକ ପୋଷ୍ଟ କରି ଲଖିଛନ୍ତି ଓଡ଼ିଶାର ଝିଅମାନଙ୍କ ପ୍ରତି ହେଉଥିବା ଅନ୍ୟାୟ ବିରୁଦ୍ଧରେ ସ୍ୱର ଉଠାଇବାରୁ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କୁ ବିଧାନସଭାରୁ ନିଲମ୍ବିତ କରାଯାଇଛି।

ଯାହାର କଡ଼ା ଜବାବ ଦେଇଛନ୍ତି ରାଜ୍ୟ ବିଜେପି ଗଣମାଧ୍ୟମ ସଂଯୋଜକ ସୁଜିତ୍ କୁମାର ଦାସ। ସେ ଏକ ଭିଡିଓ ପୋଷ୍ଟ କରି ଲେଖିଛନ୍ତି ସାମାଜିକ ଗଣମାଧ୍ୟମରେ ଆପଣଙ୍କ ପୋଷ୍ଟ ପଢି ଦୁଃଖ ଲାଗୁଛି। ତେଣୁ ସେ ଏକ ଭିଡ଼ିଓ ପୋଷ୍ଟ କରି ଏହାକୁ ବାରମ୍ବାର ଦେଖିବାକୁ ଅନୁରୋଧ କରିଛନ୍ତି।

ପ୍ରଥମ ଭାଗ ଭିଡ଼ିଓରେ ଦେଖିବାକୁ ମିଳିଛି, ବାଚସ୍ପତି ସୁରମା ପାଢୀ ଗୃହ ପରିଚାଳନା କରୁଥିବା ବେଳେ କଂଗ୍ରେସ ନେତା ତାରା ବାହିନୀପତି ବାଚସ୍ପତିଙ୍କ ପୋଡ଼ିୟମ ଉପରେ ଚଢି ପୋଡିୟମକୁ ଭାଙ୍ଗିବାକୁ ଉଦ୍ୟମ କରୁଛନ୍ତି। ବାଚସ୍ପତିଙ୍କ ସୁରକ୍ଷା କର୍ମୀ ତାଙ୍କୁ ରୋକିବାକୁ ଚେଷ୍ଟା କରୁଥିଲେ ବି ସେ କାହା କଥା ଖାତିର ନକରି ଜୋର ଜବରଦସ୍ତ ଚଢିବାକୁ ଚେଷ୍ଟା କରୁଛନ୍ତି। ମାଇକ ଭାଙ୍ଗି ଅଶାଳୀନ ଆଚରଣ ପ୍ରଦର୍ଶନ କରୁଛନ୍ତି।

ଦ୍ୱିତୀୟ ଭାଗ ଭିଡ଼ିଓରେ ନଗର ଉନ୍ନୟନ ମନ୍ତ୍ରୀ ପ୍ରଶ୍ନକାଳରେ ଉତ୍ତର ଦେଉଥିବା ସମୟରେ ମାଇକ୍ ବନ୍ଦ କରି କାଗଜପତ୍ର ଫୋପାଡ଼ି ଦେଉଥିବାର ଦେଖାଯାଉଛି। ଏମିତି ନ କରିବାକୁ ମନ୍ତ୍ରୀ ନିବେଦନ କରୁଥିଲେ ବି ପଛକୁ ହଟୁ ନାହାନ୍ତି ତାରା ବାହିନୀପତି ।

ବିଜେପି ଗଣମାଧ୍ୟମ ସଂଯୋଜକ ସୁଜିତ୍ କୁମାର ଦାସ ଏହି ଭିଡ଼ିଓ ପୋଷ୍ଟ କରି କଂଗ୍ରେସ ପ୍ରଭାରୀଙ୍କୁ ପରୋକ୍ଷରେ ପ୍ରଶ୍ନ କରି କହିଛନ୍ତି, ମହିଳାଙ୍କ ସୁରକ୍ଷା କଥା କହୁଥିବା କଂଗ୍ରେସ ବିଧାୟକଙ୍କର ଜଣେ ମହିଳା ବାଚସ୍ପତିଙ୍କ ପ୍ରତି ଏହା କେଉଁ ପ୍ରକାର ବ୍ୟବହାର ? ତାରା ବାହିନୀପତିଙ୍କ ଭଳି ଜଣେ ବରିଷ୍ଠ ବିଧାୟକଙ୍କର ମହିଳାଙ୍କ ପ୍ରତି ଏ କେଉଁ ଶୋଭନୀୟ ଆଚରଣ ?

ଗତକାଲି ବଜେଟ ଅଧିବେଶନର ତୃତୀୟ ଦିନରେ ବିରୋଧୀଙ୍କ ହଙ୍ଗାମା ଦେଖିବାକୁ ମିଳିଥିଲା । ପ୍ରଶ୍ନକାଳ ଆରମ୍ଭରୁ ବିରୋଧୀ କଂଗ୍ରେସ ଓ ବିଜେଡ଼ି ବିଧାୟକ ଗୃହର ମଧ୍ୟ ଭାଗକୁ ଆସି ହଟ୍ଟଗୋଳ କରିଥିଲେ । ନାରୀ ନିର୍ଯାତନା ପ୍ରସଙ୍ଗକୁ ନେଇ କଂଗ୍ରେସ ବିଧାୟକ ହାତରେ ପ୍ଲାକାର୍ଡ ଧରି ନାରାବାଜି କରିଥିଲେ । କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ବାଚସ୍ପତିଙ୍କ ପୋଡିୟମ ଉପରକୁ ଚଢିବାକୁ ଉଦ୍ୟମ କରିଥିଲେ।

Argus News | argus news | Odisha Latest News, Breaking News, Trending News, Live TV