ଭାଦ୍ରବ ପୂର୍ଣ୍ଣିମା ରବିବାର ଦିନ ଚନ୍ଦ୍ର ଗ୍ରହଣ । ଏହା ପୂର୍ବରୁ ସମସ୍ତଙ୍କ ମନରେ କେତେ କ'ଣ ପ୍ରଶ୍ନ । କେତେବେଳେ ଗ୍ରହଣ ଲାଗୁଛି ଏବଂ କେତେବେଳେ ଛାଡୁଛି । ପାକ ତ୍ୟାଗ କେତେବେଳେ । ବିଶେଷ କରି ଗ୍ରହଣ ଦିନ କଣ କରିବେ କଣ କରିବେନି । ଏନେଇ ସମସ୍ତଙ୍କ ମନରେ ଟିକେ ଦ୍ୱନ୍ଦ୍ୱ ରହିଥାଏ । ତେବେ ଆସନ୍ତୁ ଜାଣିବା ଗ୍ରହଣ ଦିନ କ'ଣ କରିବା ଉଚିତ୍ ଏବଂ କ'ଣ ନକରିବା ଉଚିତ୍।

ଗ୍ରହଣ ୭ ତାରିଖ ରାତି ୯ଟା ୫୮ ମିନିଟରୁ ଆରମ୍ଭ ହୋଇ ଏହା ରାତି ୧ଟା ୨୬ ମିନିଟ୍‌ରେ ଶେଷ ହେବ ଗ୍ରହଣ । ଚନ୍ଦ୍ର ଗ୍ରହଣର ୯ ଘଣ୍ଟା ପୂର୍ବରୁ ଅର୍ଥାତ ମଧ୍ୟାହ୍ନ ୧୨ଟା ୫୭ ମିନିଟ୍‌ରେ ପାକ ତ୍ୟାଗ ଆରମ୍ଭ ହେବ । ଏହି ସମୟରେ ଭୋଜନ କରାଯାଏ ନାହିଁ ତା' ସହ ସମସ୍ତ ଶୁଭ କାର୍ଯ୍ୟ କରିବାକୁ ମଧ୍ୟ ବାରଣ କରାଯାଏ । ଗ୍ରହଣ ସମୟରେ କୌଣସି ପ୍ରକାରର ଖାଦ୍ୟ ଗ୍ରହଣ କରନ୍ତୁ ନାହିଁ।

ଏହି ସମୟରେ କୌଣସି ନୂଆ କିମ୍ବା ଶୁଭ କାର୍ଯ୍ୟ ଆରମ୍ଭ କରନ୍ତୁ ନାହିଁ।
ଘର ନିର୍ମାଣ କିମ୍ବା ଯାନବାହନ କିଣା ଆଦି କାର୍ଯ୍ୟର ଯୋଜନା ବି ଏହି ସମୟରେ କରନ୍ତୁ ନାହିଁ ।
ଗ୍ରହଣ କାଳରେ ଛୁଞ୍ଚି, ଛୁରୀ, କଇଁଚି ପରି କୌଣସି ପ୍ରକାରର ଧାରୁଆ ଅସ୍ତ୍ର ବ୍ୟବହାର କରିବାକୁ ବାରଣ ରହିଛି ।
ଏହି ସମୟରେ ପୂଜାପାଠ କରିବାକୁ ବି ବାରଣ ରହିଛି ।
ଗ୍ରହଣ ସମୟରେ ଗଛ ଡାଳ ଭାଙ୍ଗନ୍ତୁ ନାହିଁ କି କୌଣସି ଗଛ ବି ପୋତନ୍ତୁ ନାହିଁ ।
କେଶ ବିନ୍ୟାଶ, ନଖ କଟା କିମ୍ବା ଦାନ୍ତ ଘସିବା ପରି କାର୍ଯ୍ୟ ଏହି ସମୟରେ କରନ୍ତୁ ନାହିଁ।
ଗର୍ଭବତୀ ମହିଳାମାନେ ଏହି ସମୟରେ ବେଶି ସତର୍କ ରୁହନ୍ତୁ । ଏହି ସମୟରେ ବାହାରକୁ ଆଦୌ ବି ବାହରନ୍ତୁ ନାହିଁ।
ଗ୍ରହଣ ସମୟରେ ଗର୍ଭବତୀମାନେ କୌଣସି ଧାତୁ ନିର୍ମିତ ଅଳଙ୍କାର ନପିନ୍ଧିଲେ ଭଲ।
ଗ୍ରହଣ ଛାଡ଼ିବା ପରେ ୨ ଦିନ ଆମୀଷ ଭକ୍ଷଣ ନକଲେ ଭଲ।
ଗର୍ଭବତୀ ମହିଳାମାନେ ଘରୁ ବାହାରିବା ଉଚିତ୍ ନୁହେଁ ।
ଏ ସମୟରେ ନିରବ ଓ ଶାନ୍ତ ରହିବା ସହ ଭଗବାନଙ୍କ ନାମ ଜପ କରିବା ଉଚିତ୍ ।

Argus News | argus news | Odisha Latest News, Breaking News, Trending News, Live TV