ଗୋଟେ ପଟେ ହୋଟେଲରେ ବରିଷ୍ଠ ନେତା ଓ ଯୁବ ନେତାଙ୍କ ବୈଠକ ହୋଇଥିବାବେଳେ ପ୍ରତାପ ଦେବଙ୍କ ଘରେ ମଧ୍ୟ ବିଜେଡି ନେତାଙ୍କର ଆଉ ଗୋଟେଏ ମେଳି ହୋଇଛି । ଯେଉଁଠି ବିଜେଡି ନେତା ବବି ଦାସ, ଦେବୀ ମିଶ୍ର, ବିଧାୟକ ଅରୁଣ ସାହୁ ଓ ଅତନୁ ସବ୍ୟସାଚୀ ନାୟକ ଉପସ୍ଥିତ ଥିଲେ । ପ୍ରତାପ ଦେବଙ୍କ ସରକାରୀ ବାସଭବନରେ ଏହି ରୁଦ୍ଧଦ୍ବାର ବୈଠକ ହୋଇଥିଲା । ବୈଠକ ପରେ ବିଧାୟକ ଅରୁଣ ସାହୁ କହିଛନ୍ତି, ଦଳର ନେତା ହେଉଛନ୍ତି ନବୀନ ପଟ୍ଟନାୟକ । ବିଭିନ୍ନ ସ୍ଥାନରେ ଯେଉଁ ବରିଷ୍ଠ ନେତା ମାନେ ବୈଠକ କରୁଛନ୍ତି ସମସ୍ତେ ନବୀନ ପଟ୍ଟନାୟକଙ୍କୁ ନେତା ମାନୁଛନ୍ତି ।

ସେପଟେ ହୋଟେଲରେ ବରିଷ୍ଠ ଓ ଯୁବ ବିଜେଡି ନେତାଙ୍କ ମେଳିରେ ପ୍ରସନ୍ନ ଆଚାର୍ଯ୍ୟ, ଭୁପିନ୍ଦର ସିଂ, ଶଶିଭୂଷଣ ବେହେରା, ଅଶୋକ ପଣ୍ଡା, ବଦ୍ରି ପାତ୍ର, ନୃସିଂହ ସାହୁ, ଚନ୍ଦ୍ର ସାରଥୀ ବେହେରା ପ୍ରମୁଖ ସାମିଲ ହୋଇଥିଲେ ।

ବିଜେଡି ବରିଷ୍ଠ ନେତା ଆୟୁବ ଖାନ୍ କହିଛନ୍ତି, ବର୍ତ୍ତମାନ ବିଜେଡିରେ ମନ୍ଥନ ଚାଲିଛି । ବିଷ ବି ବାହାରିବ, ଅମୃତ ବି ବାହାରିବ। ଯିଏ କ୍ଷତି କରିଛି ତାକୁ ବିଷ ଦିଆଯିବ ଆଉ ଆମେ ଅମୃତ ପାନ କରିବୁ। ଯିଏ ଭୁଲ ମନ୍ତବ୍ୟ ବା ନିଷ୍ପତ୍ତି ନେଇଛନ୍ତି ସେ ଦଳର କ୍ଷତି କରିଛନ୍ତି। ନବୀନ ବାବୁ ଙ୍କୁ ଭେଟିଥିଲୁ ସେ କହିଛନ୍ତି ସମାଧାନ କରାଯାଉଛି। ଆମେ ନବୀନ ବାବୁ ଙ୍କ ସହ ଅଛୁ।

ସେହିପରି ବୈଠକରୁ ବାହାରି ବିସ୍ଫୋରକ ବୟାନ ଦେଇଛନ୍ତି ବିଜେଡି ବରିଷ୍ଠ ନେତା ଶଶୀ ଭୂଷଣ ବେହେରା । କହିଛନ୍ତି କେହି ବି ଉଦ୍ୟମ କଲେ, ନବୀନ ପଟ୍ଟନାୟକ ଙ୍କ ନେତୃତ୍ୱକୁ ଦୂର୍ବଳ କରିବା ପାଇଁ ପ୍ରୟାସ କଲେ ତାକୁ ବରଦାସ୍ତ କରାଯିବ ନାହିଁ ।

ସେପଟେ ଓଡ଼ିଆ ଅସ୍ମିତା ପାଇଁ ବିଜେଡିର ପରାଜୟ ହୋଇଛି । ଏବେର କିଛି ନେତା ଓ ନେତ୍ରୀ ନବୀନ ବାବୁଙ୍କ ଆଦର୍ଶ ସହ ଅପରିଚିତ । ସେମାନେ ଆଉ କାହା ଈଶାରାରେ ପରିଚାଳିତ ବୋଲି କହିଛନ୍ତି ବିଜେଡି ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ । ଏବେର କିଛି ନେତା ଓ ନେତ୍ରୀମାନେ ନବୀନବାବୁଙ୍କ ଆଦର୍ଶ, ଧର୍ମନିରପେକ୍ଷତା ଓ ଓଡ଼ିଶା ପ୍ରତି ପ୍ରତିବଦ୍ଧତା ସହ ଅପରିଚିତ ବୋଲି କହିଛନ୍ତି ଦେବାଶିଷ ।

Argus News | argus news | -Argusnews Home: Odisha Latest News, Breaking News, Trending News, Live TV and more