ଲଘୁଚାପ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ଲଗାଣ ବର୍ଷା ଜାରି ରହିଛି । ଫଳରେ ସହରରେ ଜଳବନ୍ଦୀ ସ୍ଥିତି ସୃଷ୍ଟି ହୋଇଛି । ପାଣି ଘେରରେ ବାଲେଶ୍ଵର ସହର ବାସିନ୍ଦା । ୨୬ ନଂ ୱାର୍ଡର କଂଗ୍ରେସ ଅଫିସ୍ ଲେନ୍ ରାସ୍ତା ଉପରେ ପାଣି ଲହଡ଼ି ଭାଙ୍ଗୁଛି । ଏଥିସହ ସହରର ପ୍ରମୁଖ ସ୍ଥାନ- ଓଟି ରୋଡ, ତେଲେଙ୍ଗା ସାହି ଅଞ୍ଚଳରେ ଲୋକଙ୍କ ଘରେ ପାଣି ପଶିଛି । ଫକୀର ମୋହନ ଗୋଲେଇ, ମୁଖ୍ୟ ଡାକଘର, ଗୁଡିପଦା, ଏକତା ନଗର, ବାଲିଆଛକ ଅଞ୍ଚଳରେ ଜଳବନ୍ଦୀ ଅବସ୍ଥା । ଏପରିକି ସପିଂ ମଲରେ ପାଣି ପଶି ଖାଦ୍ୟ ସାମଗ୍ରୀ ଜିନିଷ ଭାସୁଥିବା ଦେଖିବାକୁ ମିଳିଛି ।

ଏପଟେ ଟ୍ବିନିସିଟି ଅବସ୍ଥା ଦେଖନ୍ତୁ କେଇ ଘଣ୍ଟାର ବର୍ଷାରେ ଏକଦମ୍ ବେହାଲ୍ ହୋଇପଡିଛି । ଡ୍ରେନ ବନ୍ଦ୍ ହେବାରୁ ବନ୍ୟା ଜଳରେ ବୁଡିଲା ଭୁବନେଶ୍ବର ପଟିଆ ଅଞ୍ଚଳର ଅହଲ୍ୟା ନଗର । ସେହିପରି କଟକ ସହରର ଅନେକ ସ୍ଥାନରେ ବର୍ଷା ଜଳ ଲହଡ଼ି ଭାଙ୍ଗୁଥିବାର ଦେଖାଯାଇଛି । ଅଗ୍ନିଶମ ଓ ଜରୁରୀକାଳୀନ ସେବାର ରାଜ୍ୟ ନିର୍ଦ୍ଦେଶକଙ୍କ କକ୍ଷରୁ ପ୍ରତି ଘଣ୍ଟାରେ ଭୁବନେଶ୍ୱର ଓ କଟକର ତଳିଆ ଅଞ୍ଚଳରୁ ଜଳ ନିଷ୍କାସନ କାର୍ଯ୍ୟର ତଦାରଖ କରାଯାଉଛି । ଜରୁରୀକାଳୀନ ସ୍ଥିତିରେ ୧୧୨ ଡାଏଲ୍ ପାଇଁ ଜନସାଧାରଣଙ୍କୁ ଅନୁରୋଧ କରାଯାଇଛି ।

କେନ୍ଦୁଝର ଜିଲ୍ଲା ଆନନ୍ଦପୁର ପୌରପରିଷଦ ୧୪ ନଂ ୱାର୍ଡରେ ଆଣ୍ଠୁଏ ଉଚ୍ଚର ପାଣି ଚାଲୁଛି । ଅନେକଙ୍କ ଘରେ ପାଣି ପଶିଛି । ସେହିପରି ହାଟଡିହି ବ୍ଲକ ଜଳ କଳଙ୍ଗ ଗାଁରେ ପାଣି ପଶି ରାସ୍ତାଘାଟି ବୁଡ଼ି ରହିଛି । ଯାହାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ଭଦ୍ରକରେ ବି ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇ ପଡିଛି । ସହରର ବିଭିନ୍ନ ସ୍ଥାନରେ ବର୍ଷା ପାଣି ଜମି ରହିଛି । କେନ୍ଦ୍ରାପଡ଼ା ଜିଲ୍ଲାରେ ବି ଅନେକ ସ୍ଥାନରେ ଜଳବନ୍ଦୀ ସ୍ଥିତି । ସେହିପରି ମାଲାକାନଗିରି ଜିଲ୍ଲା ୩୨୬ ନଂ NH ଉପରେ ଥିବା କାଙ୍ଗରକୋଣ୍ଡା ଏମ୍.ଭି-୯୬ ଓ କନ୍ୟାଶ୍ରମର ବ୍ରିଜ୍ ଉପରେ ୪ରୁ ୫ ଫୁଟ୍ ର ବନ୍ୟା ପାଣି ପଶିଛି । ଫଳରେ ମାଲକାନଗିରି ମୋଟୁ ଯୋଗାଯୋଗ ବିଚ୍ଛିନ୍ନ ହୋଇଛି ।

ସୁନ୍ଦରଗଡ଼ ଜିଲ୍ଲା ବଣାଇ ବ୍ଲକ ସରସରା ବଲାଙ୍ଗ ଗାଁ ରାସ୍ତା ଦେଇ ଯାଇଥିବା ଫଟଗାନାଳ ଉପରେ ବର୍ଷା ପାଣି ଭର୍ତ୍ତି ହୋଇଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଛି । ସରସରା ବଲାଙ୍ଗ, ଭାଡିମରା, ଉଲୁଣ୍ଡାପୋଷ ଭାଲୁପାଣି, ବରଘାଟ ଆଦି ଗାଁର ଯାତାୟତ ବାଧାପ୍ରାପ୍ତ ହୋଇଛି । ବୈତରଣୀ, ବୁଢ଼ାବଳଙ୍ଗ, ଜଳକା ଓ ସୁବର୍ଣ୍ଣରେଖାରେ ଜଳ ବୃଦ୍ଧି ପାଇବ । ସତର୍କ ସଂକେତ ଉପରକୁ ଯିବ, ଆଜି ବର୍ଷା ନ ହେଲେ ବିପଦ ସଂକେତ ଟପିବ କହିଛନ୍ତି ଜଳସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ। ସେପଟେ ବନ୍ୟାସ୍ଥିତି ନିୟନ୍ତ୍ରଣରେ ରହିଛି । ଗାଁ ଛାଡି ରିଲିଫ ସେଣ୍ଟରକୁ ଆସିବାକୁ ଲୋକଙ୍କୁ ଅପିଲ୍ କରିଛନ୍ତି ରାଜସ୍ବ ମନ୍ତ୍ରୀ । ଉତ୍ତର ପଶ୍ଚିମ ବଙ୍ଗୋପସାଗରରେ ଲଘୁଚାପ କ୍ଷେତ୍ର ଯୋଗୁଁ ୨୪ ଘଣ୍ଟାରେ ଭୀଷଣ ବର୍ଷା ଲାଗି ସମ୍ଭାବନା । ଏଥିପାଇଁ ଦେବଗଡ଼, ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି ହୋଇଛି । ସେହିପରି ୮ ଜିଲ୍ଲାକୁ ପୁରୀ, ଖୋର୍ଦ୍ଧା, କେନ୍ଦୁଝର, ଢେଙ୍କାନାଳ, ଅନୁଗୁଳ, କଟକ, କୋରାପୁଟ ଓ ନବରଙ୍ଗପୁରକୁ ଅରେଞ୍ଜ ଆଲର୍ଟ ଓ ୧୮ ଜିଲ୍ଲାକୁ ୟେଲୋ ୱାର୍ଣ୍ଣିଂ ଦେଇଛି ପାଣିପାଗ କେନ୍ଦ୍ର ।

Argus News | argus news | Odisha Latest News, Breaking News, Trending News, Live TV