ବାର୍ଦ୍ଧକ୍ୟ ବୟସରେ ବି ବିବାହ କରିବାକୁ ଥିଲା ଇଚ୍ଛା । ଆଉ କନିଆ ସାଜିବାକୁ ସୂଦୁର ଆମେରିକାରୁ ଭାରତକୁ ଚାଲି ଆସିଥିଲେ ୭୧ ବର୍ଷୀୟ ମହିଳା । ହେଲେ ଯାହା ହାତ ଧରିଥାନ୍ତେ , ସେ ହିଁ ସାଜିଲା ତାଙ୍କ ମୃତ୍ୟୁର କାରଣ ।

ବିଶ୍ଵାସ ପାଲଟିଲା ବିଷ, ହେବାକୁ ଯାଉଥିବା ସ୍ଵାମୀ ପାଲଟିଲେ ରାକ୍ଷସ । ଏପରି ଘଟଣା ଏବେ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଛି ।

ଆମେରିକାରେ ରହୁଥିବା ରୁପିନ୍ଦର କୌର ପାନ୍ଧେର ନାମକ ଜଣେ ୭୧ ବର୍ଷୀୟ ଭାରତୀୟ ବଂଶୋଦ୍ଭବ ମହିଳା ୭୫ ବର୍ଷୀୟ ଚରଣଜିତ ସିଂ ଗ୍ରେୱାଲଙ୍କ ପ୍ରମରେ ପଡିଥିଲେ । ଚରଣଜିତ ଇଂଲଣ୍ଡରେ ରହୁଥିବା ଜଣେ ପ୍ରବାସୀ ଭାରତୀୟ ଅଟନ୍ତି । ସେ ପଞ୍ଜାବ ଲୁଧିଆନାର ଅଟନ୍ତି । ତେବେ ଉଭୟ ବିବାହ କରିବାକୁ ସ୍ଥିର କରିଥିଲେ । ଆଉ ବିବାହ କରିବା ପାଇଁ ଚରଣଜିତ ରୁପିନ୍ଦରଙ୍କୁ ପଞ୍ଜାବ ଲୁଧିଆନାକୁ ଆସିବା ପାଇଁ ନିମନ୍ତ୍ରଣ କରିଥିଲେ । ଭାବିସ୍ଵାମୀଙ୍କ କଥାରେ ବିଶ୍ଵାସ କରି ରୁପିନ୍ଦର ଆମେରିକାରୁ ଲୁଧିଆନା ଆସିଥିଲେ । ଆଉ ଆସିବା ପରେ ତାଙ୍କ ଫୋନ ହୋଇଯାଇଥିଲା ସୁଇଚ୍ ଅଫ୍ । ପାନ୍ଧେରଙ୍କ ଭଉଣୀ କମଲ କୌର ଖରିଆର୍ ତାଙ୍କ ଭଉଣୀଙ୍କୁ ବାରମ୍ବାର ଫୋନ ଲଗାଇବା ପରେ ମଧ୍ୟ ତାଙ୍କ ଫୋନ ସୁଇଚ୍ ଅଫ୍ ଆସୁଥିଲା । ସନ୍ଦେହରେ ଭଉଣୀ ଜଣକ ଦିଲ୍ଲୀରେ ଥିବା ଆମେରିକା ଦୂତାବାସକୁ ଜଣାଇଥିଲେ ।
ଏହାପରେ ପୋଲିସ ଘଟଣାକୁ ଗୁରୁତର ସହ ନେଇ ତଦନ୍ତ ଆରମ୍ଭ କରିଥିଲେ । ଆଉ ଜଣା ପଡିଥିଲା ପାନ୍ଧେରଙ୍କୁ ହତ୍ୟା କରାଯାଇଛି, ଆଉ ଏଥିରେ ଚରଣଜିତ ଗ୍ରେୱାଲଙ୍କର ହିଁ ହାତ ରହିଛି ।

ପ୍ରଥମ ତଦନ୍ତରେ ପୋଲିସ ସୁଖଜିତ ସିଂ ସୋନୁ ନାମକ ଜଣେ ବ୍ୟକ୍ତିକୁ ଗିରଫ କରିଥିଲା । ଆଉ ପୋଲିସ ଆଗରେ ସବୁ ସତ ମାନିଥିଲା ସୋନୁ । ସେ କହିଥିଲା, ସେ ହିଁ ପାନ୍ଧେରକୁ ତାଙ୍କ ଘରେ ମାରି ଦେଇଥିଲା, ଆଉ ମୃତ ଶରୀରକୁ ଷ୍ଟୋରରୁମରେ ଜଳାଇ ଦେଇଥିଲା । ହେଲେ ଏହି ହତ୍ୟା କରିବା ପଛରେ ଚରଣଜିତର ହିଁ ହାତ ଥିଲା । କାରଣ ପାନ୍ଧେରକୁ ମାରିବା ପାଇଁ ,ତାକୁ ୫୦ ଲକ୍ଷ ଟଙ୍କା ଦେବାକୁ ପ୍ରତିଶ୍ରୃତି ଦେଇଥିଲା ଚରଣଜିତ ।

ଅନ୍ୟ ପୋଲିସ ଅଧିକାରୀ କହିଛନ୍ତି, ଏହି ହତ୍ୟା ପଛର ମୂଳ ଉଦ୍ଦେଶ୍ୟ ହେଉଛି ଟଙ୍କା । ପାନ୍ଧେର ପୂର୍ବରୁ ଚରଣଜିତଙ୍କୁ ମୋଟା ଅଙ୍କର ଟଙ୍କା ଦେଇଥିଲେ । ଆଉ ଏହି ହତ୍ୟା ପଛର କାରଣ ସେହି ଟଙ୍କା ସହ ସମ୍ପୃକ୍ତ ଥିବା ସନ୍ଦେହ କରାଯାଉଛି । ତେବେ ବର୍ତ୍ତମାନ ମୁଖ୍ୟ ଅଭିଯୁକ୍ତ ଚରଣଜିତ ଫେରାର ଥିବା ସୂଚନା ମିଳିଛି । ପୋଲିସ ଏବେ ପାନ୍ଧେରଙ୍କ କଙ୍କାଳ ଏବଂ ଶରୀରର କିଛି ମୁଖ୍ୟ ଅବଶେଷକୁ ନେଇ ତଦନ୍ତ ଆରମ୍ଭ କରିଛି ।