ବେଙ୍ଗାଲୁରୁରୁ ବାରାଣସୀ ଯାଉଥିବା ଏୟାରଇଣ୍ଡିଆର ଏକ ବିମାନ ଅପହରଣ ଉଦ୍ୟମ କରାଯାଇଛି। ଏଥିରେ ଯାତ୍ରା କରୁଥିବା ଜଣେ ଯାତ୍ରୀ କକ୍‌ପିଟ୍‌ କ୍ୟାବିନ୍‌ ଡୋର୍‌ ଖୋଲିବାକୁ ଚେଷ୍ଟା କରିଥିଲେ, ଯାହା ଫଳରେ ବିମାନ ଭିତରେ ହଙ୍ଗାମା ହୋଇଥିଲା। ଯାତ୍ରୀ ଜଣକ ସଠିକ୍‌ ପାସକୋଡ୍‌ ଏଣ୍ଟ୍ରି କରିଥିଲେ, କିନ୍ତୁ ପାଇଲଟ୍‌ ଅପହରଣର ଭୟରେ ଡୋର୍‌ ଖୋଲି ନ ଥିଲେ। ସେହି ବ୍ୟକ୍ତି ଅନ୍ୟ ୮ ଜଣ ଯାତ୍ରୀଙ୍କ ସହିତ ଯାତ୍ରା କରୁଥିଲେ। ସମସ୍ତ ୯ ଯାତ୍ରୀଙ୍କୁ ସିଆଇଏସ୍‌ଏଫ୍‌କୁ ହସ୍ତାନ୍ତର କରାଯାଇଥିଲା। ଏୟାର ଇଣ୍ଡିଆ କହିଛି, ଆମେ ଗଣମାଧ୍ୟମ ରିପୋର୍ଟରୁ ବାରାଣସୀ ଯାଉଥିବା ବିମାନ ବିଷୟରେ ସୂଚନା ପାଇଥିଲୁ। ଜଣେ ଯାତ୍ରୀ ଶୌଚାଳୟ ଖୋଜିବା ସମୟରେ କକ୍‌ପିଟ୍‌ ଏଣ୍ଟ୍ରି ଡୋର୍‌ ନିକଟରେ ପ୍ରବେଶ କରିଥିଲେ। ଆମେ ଜନସାଧାରଣଙ୍କୁ ଆଶ୍ୱସ୍ତ କରିବାକୁ ଚାହୁଁଛୁ ଯେ, ବିମାନରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ଏବଂ କୌଣସି ଉଲ୍ଲଂଘନ ହୋଇନାହିଁ। ଅବତରଣ କରିବା ସମୟରେ କର୍ତ୍ତୃପକ୍ଷଙ୍କୁ ଘଟଣା ବିଷୟରେ ସୂଚନା ଦିଆଯାଇଥିଲା ଏବଂ ବର୍ତ୍ତମାନ ଏହାର ତଦନ୍ତ ଚାଲିଛି।

ଯାତ୍ରୀ କକ୍‌ପିଟ୍‌ ଭିତରକୁ ପ୍ରବେଶ କରିବାକୁ କାହିଁକି ଚେଷ୍ଟା କରିଥିଲେ ତାହା ଏପର୍ଯ୍ୟନ୍ତ ଜଣାପଡ଼ିନାହିଁ। ଏୟାର ଇଣ୍ଡିଆ ଏକ୍ସପ୍ରେସ୍‌ ବିମାନ IX-1086 ସକାଳ ୮ଟା ପରେ ବେଙ୍ଗାଲୁରୁରୁ ଯାତ୍ରା କରିଥିଲା। ବିମାନ ବାରାଣସୀରେ ଅବତରଣ କରିବା ପରେ, ଅଭିଯୁକ୍ତ ଯାତ୍ରୀମାନଙ୍କୁ ସିଆଇଏସ୍‌ଏଫ୍‌ କର୍ମଚାରୀଙ୍କୁ ହସ୍ତାନ୍ତର କରାଯାଇଥିଲା। ଏୟାର ଇଣ୍ଡିଆ ଏକ୍ସପ୍ରେସ ବିମାନ ଉଡ଼ାଣ ଆରମ୍ଭ କରିବାର କିଛି ସମୟ ପରେ, ଜଣେ ଯାତ୍ରୀ କକ୍‌ପିଟ୍‌ କ୍ୟାବିନ୍‌ ଡୋର୍‌ ଖୋଲିବାକୁ ଚେଷ୍ଟା କରିଥିଲେ। ପାସକୋଡ୍‌ ଦେବା ମାତ୍ରେ ପାଇଲଟ୍‌ ଏକ ସିଗ୍‌ନାଲ ପାଇଲେ। ଯେତେବେଳେ ପାଇଲଟ୍‌ ସିସିଟିଭି ଫୁଟେଜ୍‌ ଦେଖିଲେ, ସେତେବେଳେ ଅପହରଣ ହେବାର ଭୟରେ ସେ ଡୋର୍‌ ଖୋଲି ନ ଥିଲେ। ଏହି ଯାତ୍ରୀ କକ୍‌ପିଟ୍‌ ପାସକୋଡ୍‌ କିପରି ଜାଣିଲେ ସେ ବିଷୟରେ ମଧ୍ୟ ପ୍ରଶ୍ନ ଉଠିଛି।

ଏକ ରିପୋର୍ଟ ଅନୁଯାୟୀ, କକ୍‌ପିଟ୍‌ ଡୋର୍‌ ଖୋଲିବାକୁ ଚେଷ୍ଟା କରିଥିବା ଯାତ୍ରୀ ପ୍ରଥମଥର ପାଇଁ ବିମାନ ଯାତ୍ରା କରୁଥିଲେ। ସେ ଏପରି କାହିଁକି କଲେ ବୋଲି ପଚରାଯିବାରୁ, କହିଥିଲେ ଯେ, ସେ ଶୌଚାଳୟ ଯିବାକୁ ଚାହୁଁଥିଲେ ଏବଂ ଭାବିଥିଲେ ଯେ, ଏହା ସେହି ଡୋର୍‌। ତଥାପି ଯେତେବେଳେ କ୍ରୁ ମେମ୍ବର ତାଙ୍କୁ ଜଣାଇଲେ ସେ କକ୍‌ପିଟ୍‌ ଡୋର୍‌ ଖୋଲିବାକୁ ଚେଷ୍ଟା କରିଛନ୍ତି, ସେ ଚୁପ୍‌ଚାପ୍‌ ପଛକୁ ହଟିଯାଇଥିଲେ।