ଲକ୍ଷ୍ୟ ଆଉ ବେଶୀ ଦୂର ନୁହେଁ । ବିକଶିତ ଭାରତ ଗଠନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ପଡ଼ିସାରିଛି ଶକ୍ତିଶାଳୀ ମୂଳଦୁଆ । ଜାପାନକୁ ପଛରେ ପକାଇ ବିଶ୍ବର ଚତୁର୍ଥ ବୃହତ ଅର୍ଥନୀତିରେ ପହଞ୍ଚିଛି ଭାରତ । ନୀତି ଆୟୋଗ ପରିଚାଳନା ପରିଷଦର ୧୦ମ ବୈଠକ ପରେ ସିଇଓ ବି.ବି.ଆର୍ ସୁବ୍ରମଣ୍ୟମଙ୍କ ଏହି ଘୋଷଣା ଦେଶବାସୀଙ୍କୁ ଗର୍ବିତ କରିଛି । ପୂର୍ବରୁ ୨୦୧୯ରେ ବିଶ୍ବ ପଞ୍ଚମ ବୃହତ୍ତମ ଆର୍ଥିକ ଶକ୍ତି ହୋଇ ଭାରତରେ ଶତାଧିକ ବର୍ଷ ଶାସନ କରିଥିବା ବ୍ରିଟେନକୁ ଶକ୍ତ ଝଟକା ଦେଇଥିଲା ଭାରତ । ଏବେ ଆଗରେ କେବଳ ଆମେରିକା, ଚୀନ ଓ ଜର୍ମାନୀ । ଆଗାମୀ ଅଢେଇରୁ ୩ ବର୍ଷ ମଧ୍ୟରେ ଭାରତ ତୃତୀୟ ବୃହତ୍ ଅର୍ଥନୀତିରେ ପରିଣତ ହେବାକୁ ଯାଉଥିବା ନେଇ ଆକଳନ କରିଛି ଆଇଏମଏଫ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ଭାରତ ବିକାଶ ମାର୍ଗରେ ନୂଆ ଉଡାଣ ଭରିବାକୁ ଯାଉଛି ବୋଲି ଏକ୍ସ ପୋଷ୍ଟରେ ଲେଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସବୁଜ ଓ ଗ୍ରାମୀଣ ଅର୍ଥନୀତିର ବିକାଶ ଉପରେ ରହିଛି ଫୋକସ । ବର୍ତ୍ତମାନ ବିଶ୍ୱ ରାଜନୈତିକ ଏବଂ ଅର୍ଥନୈତିକ ପରିବେଶ ଭାରତ ସପକ୍ଷରେ ରହିଥିବା କହିଛନ୍ତି ନୀତି ଆୟୋଗି ସିଇଓ ।

ଆଗାମୀ ଦୁଇରୁ ତିନି ବର୍ଷ ଭିତରେ ବିଶ୍ବର ସବୁଠାରୁ ଦ୍ରୁତ ଅର୍ଥନୀତିରେ ପରିଣତ ହେବାକୁ ଯାଉଛି ଭାରତ । ୨୦୨୫ରେ ଭାରତର ଅଭିବୃଦ୍ଧି ହାର ୬.୨ ପ୍ରତିଶତ ଓ ୨୦୨୬ରେ ୬. ୩ ପ୍ରତିଶତ ରହିବ ବୋଲି ଆଇଏମଏଫ ପକ୍ଷରୁ ଆକଳନ କରାଯାଇଛି । ଅନ୍ୟପକ୍ଷରେ ଚଳିତବର୍ଷ ବିଶ୍ବ ଅଭିବୃଦ୍ଧି ହାର ୨.୮ ଓ ଆସନ୍ତାବର୍ଷ ୩.୦ ପ୍ରତିଶତ ରହିବ ବୋଲି ଆକଳନ କରାଯାଇଛି ।

୧୯୪୫ରେ ଦ୍ବିତୀୟ ବିଶ୍ବଯୁଦ୍ଧ ପରେ ଧ୍ବଂସସ୍ତୁପରେ ପରିଣତ ହୋଇଥିବା ଜାପାନବାସୀଙ୍କ କଠିନ ପରିଶ୍ରମ ଓ ଉଦ୍ୟମ ଦେଶକୁ ପୁନର୍ବାର ଏକ ଶକ୍ତିଶାଳୀ ଅର୍ଥନୀତିରେ ପରିଣତ କରିଥିଲା । ଆଉ ଏବେ ଭାରତବାସୀ ବିକାଶ ପ୍ରକ୍ରିୟାରେ ସାମିଲ ହୋଇ ଦେଶକୁ ଚତୁର୍ଥ ବୃହତମ ଅର୍ଥନୀତିରେ ପରିଣତ କରିବାରେ ସଫଳ ହୋଇଛନ୍ତି । ବଳିଷ୍ଠ ନେତୃତ୍ବ, ଦେଶବାସୀଙ୍କ ଆତ୍ମବିଶ୍ବାସ, ଉଦ୍ୟମ ଜାରି ରହିଲେ ବିକଶିତ ଭାରତ ଗଠନ ଲକ୍ଷ୍ୟ ଆଉ ବେଶୀ ଦୂର ନୁହେଁ ।