ଭଦ୍ରକ: ଆର୍ଥିକ ଅନାଟନ, ସ୍ଵାମୀଙ୍କ କରଜ... ଶେଷରେ ଧାର ଟଙ୍କା ବିକ୍ରି ପାଇଁ ନବଜାତ ଛୁଆକୁ ବିକ୍ରି । ସମ୍ପର୍କୀୟଙ୍କ ହାତକୁ ନବଜାତ ଝିଅକୁ ଟେକିଦେଲେ ପରିବାର ଲୋକ । ଏଭଳି ଘଟଣା ଘଟିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ବୟାବନପୁର ଅଞ୍ଚଳରେ ।

ନବଜାତ ଛୁଆର ମାଆ କହିବା ଅନୁସାରେ, ସ୍ଵାମୀ କୌଣସି କାମଧନ୍ଦା କରୁନଥିଲେ । ବିଭିନ୍ନ ଲୋକଙ୍କ ଠାରୁ କରଜ କରି ପରିବାର ଚଳାଉଥିଲେ । ପରେ କରଜ ଟଙ୍କା ଶୁଝିବା ପାଇଁ ମାଆଙ୍କୁ ଟଙ୍କା ମାଗିଥିଲେ ସ୍ଵାମୀ । ହେଲେ ମାଆ ଟଙ୍କା ଦେଇନଥିଲେ ।

ଏଥିସହ ପଢ଼ନ୍ତୁ: ଶିକ୍ଷା ଦେଇଗଲା ୧୯ ବର୍ଷର ଝିଅ; ଜୀବନ ନେଇଗଲା ପିରିୟଡ୍ସ

ଫଳରେ ୩୫ ହଜାର ଟଙ୍କା ପାଇଁ ସ୍ତ୍ରୀର ଅନିଚ୍ଛା ସତ୍ତ୍ଵେ କଟକର ସମ୍ପର୍କୀୟ ଖୁଡ଼ିଙ୍କ ହାତକୁ ନବଜାତ ଝିଅକୁ ଟେକି ଦେଇଥିଲେ ସ୍ଵାମୀ । ନବଜାତ କନ୍ୟାର ଜେଜେମାଆଙ୍କ ଅଭିଯୋଗ କ୍ରମେ ଭଣ୍ଡାରିପୋଖରୀ ଥାନା ପୋଲିସ ଶିଶୁଟିକୁ ଉଦ୍ଧାର କରିଛି ।

ଉଦ୍ଧାର ଶିଶୁ କନ୍ୟାର ସ୍ୱାସ୍ଥ୍ୟ ପରୀକ୍ଷା ପରେ CWCକୁ ହସ୍ତାନ୍ତର କରିବ ପୋଲିସ । ତେବେ ଏନେଇ ମହିଳାଙ୍କ ସ୍ଵାମୀଙ୍କ ପ୍ରତିକ୍ରିୟା ମିଳିପାରି ନାହିଁ । ପ୍ରଥମେ ନବଜାତ ଶିଶୁକୁ ବିକ୍ରି ଓ ଏବେ ପୋଲିସ ଉଦ୍ଧାର କରିବା ଶିଶୁ କନ୍ୟା କେଉଁଠି ରହିବ ସେ ନେଇ ସିଡବ୍ଲୁସି ନିଷ୍ପତ୍ତି ନେବ ।

ସେପଟେ ଛୁଆର ମାଆ କହିଛି, "ଝିଅକୁ ଅନ୍ୟ ହାତକୁ ଦେବାକୁ ମୋର ଇଚ୍ଛା ନାହିଁ । ସ୍ଵାମୀ ନେଇ ଦେଇଥିଲେ । ମୋ ଛୁଆକୁ ନେଇ ମୁଁ ବାପଘରକୁ ପଳାଇବି । ଏଠି ରହି ମାଡ଼ ଖାଇ ଟଙ୍କା କରଜ କରିବି ନାହିଁ ।"

ଏଥିସହ ପଢ଼ନ୍ତୁ: ପାକିସ୍ତାନରେ ପଶି ଗ୍ରାଉଣ୍ଡ ଅପରେସନ୍ ପାଇଁ ପ୍ରସ୍ତୁତ ଥିଲା ଭାରତ; ଚେତାବନୀ ଦେଲେ ସେନା ମୁଖ୍ୟ

ଏବେ ନବଜାତ କନ୍ୟାକୁ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଶିଶୁ କନ୍ୟାର ସ୍ୱାସ୍ଥ୍ୟ ପରୀକ୍ଷା କରାଯାଉଛି । ଏହା ପରେ ସିଡବ୍ଲୁସି ଓ ପରିବାର ଲୋକଙ୍କ ମଧ୍ୟରେ ଆଲୋଚନା ପରେ ଶିଶୁକନ୍ୟା କାହା ପାଖରେ ରହିବ ନିଷ୍ପତ୍ତି ନିଆଯିବ ।


ମାତ୍ର ୩୫ ହଜାର ଟଙ୍କା ପାଇଁ ଶିଶୁକନ୍ୟାକୁ ଅନ୍ୟ ହାତକୁ ଟେକି ଦେବା ଘଟଣା ସାରା ଜିଲ୍ଲାରେ ଆଲୋଡ଼ନ ସୃଷ୍ଟି କରିଛି । ପ୍ରଥମେ ପୁଅକୁ ଟଙ୍କା ଦେଇ ନଥିବା ଜେଜେମାଆର ଅଭିଯୋଗ କ୍ରମେ ଏବେ ନାତୁଣୀ ଉଦ୍ଧାର ହୋଇଛି ।