Cabinet Decisions: ଦେଶରେ ୪ଟି ସେମିକଣ୍ଡକ୍ଟର ଉତ୍ପାଦନ ୟୁନିଟକୁ ମଞ୍ଜୁରୀ, ଓଡ଼ିଶାରେ ହେବ ୨ଟି ୟୁନିଟ୍

ଭୁବନେଶ୍ଵର/ନୂଆଦିଲ୍ଲୀ: ଓଡ଼ିଶାକୁ କେନ୍ଦ୍ର ସରକାରଙ୍କ ବଡ଼ ଉପହାର । ରାଜ୍ୟରେ ସ୍ଥାପନ ହେବ ୨ଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍ । ଦେଶରେ ମୋଟ ୪ଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ ସ୍ଥାପନକୁ ମଙ୍ଗଳବାର କେନ୍ଦ୍ର କ୍ୟାବିନେଟ ଅନୁମୋଦନ ମିଳିଛି । ୪ଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ ମଧ୍ୟରୁ ଓଡ଼ିଶାରେ ୨ଟି ୟୁନିଟ୍ ସ୍ଥାପନ କରାଯିବ । ୪ଟି ସେମିକଣ୍ଡକ୍ଟର ୟୁନିଟରେ ମୋଟ ୪୬୦୦ କୋଟି ବ୍ୟୟ ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କେନ୍ଦ୍ର କ୍ୟାବିନେଟ୍ ବୈଠକରେ ଏହି ନିଷ୍ପତ୍ତି ନିଆଯାଇଛି ।

ଏହା ପୂର୍ବରୁ ଦେଶରେ ୬ଟି ସେମିକଣ୍ଡକ୍ଟର ୟୁନିଟକୁ ଅନୁମୋଦନ ମିଳି ସାରିଛି । ଏବେ ଅନୁମୋଦନ ମିଳିଥିବା ୪ଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ SiCSem, CDIL, 3D Glass Solutions Inc. ଏବଂ ASIP ଟେକ୍ନୋଲୋଜି ସ୍ଥାପନ କରିବ । ଏହି ୪ଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ ସ୍ଥାପନ ପାଇଁ ୪ ହଜାର ୬୦୦ କୋଟି ଟଙ୍କା ବ୍ୟୟ କରାଯିବ । ଯେଉଁଥିରେ ୨୦୩୪ ଜଣ କୁଶଳୀ ବୃତ୍ତିଗତଙ୍କୁ ନିଯୁକ୍ତି ମିଳିବା ସମ୍ଭାବନା ରହିଛି ।

ଏବେ ଟେଲିକମ, ଅଟୋମୋଟିଭ, ଡାଟାସେଣ୍ଟର, କଞ୍ଜୁମର ଇଲେକ୍ଟ୍ରୋନିକ୍ସ ଆଣ୍ଡ ଇଣ୍ଡଷ୍ଟ୍ରିଆଲ୍ ଇଲେକ୍ଟ୍ରୋନିକ୍ସ ଆଦି କ୍ଷେତ୍ରରେ ସେମିକଣ୍ଡକ୍ଟର ଚାହିଦା ବଢ଼ୁଛି । ଏବେ ନୂଆ ୪ଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ ପ୍ରତିଷ୍ଠାକୁ କେନ୍ଦ୍ର କ୍ୟାବିନେଟର ଅନୁମୋଦନ ଚାହିଦା ପୂରଣ କରିବା ସହ ଆତ୍ମନିର୍ଭର ଭାରତ ଅଭିଯାନକୁ ଆଗକୁ ବଢ଼ାଇ ନେବ ।

ଓଡ଼ିଶାରେ SiCSem ଏବଂ 3D Glass ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ ସ୍ଥାପନ କରିବେ । ୨ଟି ଯାକ ସେମିକଣ୍ଡକ୍ଟର ଉତ୍ପାଦନ ୟୁନିଟ୍‌ ଭୁବନେଶ୍ଵର ଇନଫୋ ଭ୍ୟାଲିରେ ହେବ । ଭୁବନେଶ୍ଵରରେ SiCSem କରିବାକୁ ଥିବା ସିଲିକନ କାରବାଇଡ୍ (SiC) ଆଧାରିତ କମ୍ପାଉଣ୍ଡ ସେମିକଣ୍ଡକ୍ଟର ମିସାଇଲ୍, ସୈନ୍ୟ ଉପକରଣ, ବୈଦ୍ୟୁତିକ ଗାଡ଼ି, ରେଲୱେ, ଫାଷ୍ଟ ଚାର୍ଜର୍ସ, ଡାଟା ସେଣ୍ଟର ସହ ସୋଲାର ପାୱାର ଇନଭର୍ଟର୍ସରେ ଲାଗିବ । କମ୍ପାନୀ ବାର୍ଷିକ ୬୦ ହଜାର ୱାଫର୍ସ ଏବଂ ୯୬ ମିଲିୟନ ୟୁନିଟ୍ ପ୍ୟାକେଜିଂ କ୍ଷମତା ଲକ୍ଷ୍ୟ ରଖିଛି ।

ସେହିଭଳି 3D Glass Solutions Inc. (3DGS) ପକ୍ଷରୁ ଭର୍ଟିକାଲ ଇଣ୍ଟିଗ୍ରେଟେଡ୍ ଆଡଭାନ୍ସଡ୍ ପ୍ୟାକେଜିଂ ଏବଂ ଏମ୍ବେଡେଡ୍ ଗ୍ଲାସ୍ ସବଷ୍ଟ୍ରେଟ୍ ୟୁନିଟ୍ ଇନଫୋ ଭ୍ୟାଲିରେ ସ୍ଥାପନ ହେବ । ଏହାଦ୍ୱାରା ଭୁବନେଶ୍ୱରରେ ବିଶ୍ୱସ୍ତରୀୟ ଆଧୁନିକ ଉନ୍ନତ ପ୍ୟାକେଜିଂ ସୁବିଧା ମିଳିବ । ଏହି ୟୁନିଟରେ ୬୯ ହଜାର ୬୦୦ ଗ୍ଲାସ ପ୍ୟାନେଲ୍ ସବଷ୍ଟ୍ରେଟର୍‍ ୫୦ ମିଲିଯନ ଆସେମ୍ବଲଡ୍ ୟୁନିଟ ଏବଂ ୧୩ ହଜାର ୨୦୦ DHI ମଡ୍ୟୁଲ୍ ବାର୍ଷିକ ଉତ୍ପାଦନ କରିବା ଲକ୍ଷ୍ୟ ରହିଛି ।