ଅର୍ଗସ ବ୍ୟୁରୋ : ବିଧାନସଭାରେ ଉପସ୍ଥାପିତ ହେଲା ସିଏଜି ରିପୋର୍ଟ । ରିପୋର୍ଟ ସ୍ପଷ୍ଟ କଲା କାଳିଆ ଯୋଜନାରେ କେମିତି ଦୁର୍ନୀତି କରିଥିଲା ବିଜେଡି ସରକାର । କୋଟିଏ କି ଦୁଇକୋଟି ନୁହେଁ ବରଂ ଅଯୋଗ୍ୟ ହିତାଧିକାରୀ ପ୍ରାୟ ୭୮୨ କୋଟି ଟଙ୍କା ନେଇଯାଇଥିବା ଜଣାପଡିବା ପରେ ଏବେ ଚର୍ଚ୍ଚା ଜୋର ଧରିଛି । କାରଣ ଏତେ ପରିମାଣରେ ରାଜସ୍ଵ ନଷ୍ଟ ହେଲା, ହେଲେ କେମିତି ତତ୍କାଳୀନ ସରକାର ଜାଣିପାରିଲେ ନାହିଁ ତାହାକୁ ନେଇ ଉଙ୍କି ମାରୁଛି ପ୍ରଶ୍ନ । 

କାଳିଆ ଯୋଜନା ଘୋଷଣା ହେବା ପରଠାରୁ ଅନେକ ବିବାଦ ଦେଖାଯାଇଛି । କୁହାଯାଉଥିଲା କି ରାଜସ୍ଵ ଲୁଟ୍‌ କରିବାକୁ ଜାଣିଶୁଣି ଫନ୍ଦି କରିଥିଲେ ସେବର ସରକାର । ଯାହା ଗତକାଲିର ସିଏଜି ରିପୋର୍ଟ ହିଁ ପ୍ରମାଣ କରିଦେଇଛି । ସୂଚନା ଅନୁସାରେ, ୨୦୧୯ରୁ ୨୧ ମଧ୍ୟରେ ୬୫.୬୪ ଲକ୍ଷ ହିତାଧିକାରୀଙ୍କୁ କାଳିଆ ଟଙ୍କା ଦେଇଥିଲା ବିଜେଡି ସରକାର  । ୪୧.୬୪ ଲକ୍ଷ ହିତାଧିକାରୀଙ୍କୁ ୩ ଥର, ୮.୦୯ ଲକ୍ଷଙ୍କୁ ୨ ଥର ଟଙ୍କା ମିଳିଛି । ୧୫ ଲକ୍ଷ ୯୧ ହଜାର ହିତାଧିକାରୀଙ୍କୁ କେବଳ ଥରଟିଏ କିସ୍ତି ଟଙ୍କା ମିଳିଛି କାଳିଆ ଯୋଜନାରେ । ଯୋଜନା କାର୍ଯ୍ୟକାରୀ ବେଳେ ୯.୭୬ ଲକ୍ଷ ଅଯୋଗ୍ୟ ହିତାଧିକାରୀ ମିଳିଥିଲେ । ପରେ ଡାଟାବେସ୍‌ ବିଶ୍ଲେଷଣ ବେଳେ ଆଉ ୨.୯୬ ଲକ୍ଷ ଅଯୋଗ୍ୟ ମିଳିଥିଲେ । ଏମିତି ମୋଟ ୧୨.୭୨ ଲକ୍ଷ ଅଯୋଗ୍ୟ ହିତାଧିକାରୀ କିସ୍ତି ପାଇଯାଇଥିଲେ । ଏହି ୧୨ ଲକ୍ଷ ଅଯୋଗ୍ୟ ହିତାଧିକାରୀ ୭୮୨ କୋଟି ନେଇଯାଇଥିଲେ । ସେମିତି ତାଲିମ ନଦେଇ ୧୪.୦୪ ଭୂମିହୀନ କୃଷି ଶ୍ରମିକଙ୍କୁ ଟଙ୍କା ଦେଇଥିଲେ । ୧୪.୦୪ ଭୂମିହୀନ କୃଷି ଶ୍ରମିକ ୩ଟି କିସ୍ତି ଟଙ୍କା ପାଇଯାଇଥିଲେ । ଏହି ରିପୋର୍ଟ ଦେଖିବା ପରେ ପୁଣି ଥରେ ବିବାଦ ଘେରକୁ ଆସିଛି କାଳିଆ ।

ବିଧାନସଭାରେ ରିପୋର୍ଟ ଉପସ୍ଥାପିତ ହେବା ପରେ ଜଣାଯାଇଛି କି କେବଳ କାଳିଆ ଯୋଜନାରେ ନୁହେଁ ବରଂ ଅନେକ ଯୋଜନାରେ ଦୁର୍ନୀତି ହୋଇଛି । ବାଙ୍ଗିରିପୋଷି ତହସିଲଦାରଙ୍କ ପାଇଁ ୧୦ କୋଟିର ରାଜସ୍ବ ଅନାଦେୟ ରହିଛି । ଲଘୁ ଖଣିଜ ପଦାର୍ଥ ଲିଜ୍ ଧାରୀଙ୍କଠାରୁ ଅଗ୍ରୀମ ରୟାଲିଟି ଆଦାୟ କରିବା କଥା । ବାଙ୍ଗିରିପୋଷି ତହସିଲଦାର କିନ୍ତୁ ୧୦.୩୫ କୋଟି ଆଦାୟ କରିନଥିଲେ । ସେହିପରି ରାଜସ୍ବ ବିଭାଗ ନୀତି ଅନୁସାରେ ସ୍କୁଲ, କଲେଜ ପାଇଁ ରିହାତି ଦରରେ ଜମି ମନା ଥିବାବେଳେ ଏକ ଶିକ୍ଷାନୁଷ୍ଠାନ ପ୍ରତିଷ୍ଠା ପାଇଁ ପୁରୀ ଜିଲ୍ଲାପାଳ ୫ ଏକର ଜମି ଲିଜ୍ ଦେଇଥିଲେ । ପୁରୀ ଜିଲ୍ଲାପାଳଙ୍କ ଏହି ଅନିୟମିତ କାର୍ଯ୍ୟ ପାଇଁ ୮.୪୭ କୋଟି ରାଜସ୍ଵ ନଷ୍ଟ ହୋଇଛି । 

ଅନ୍ୟପଟେ ଜାଲ୍ ପ୍ରମାଣପତ୍ରରେ କେମିତି ଛାତ୍ର ବୃତ୍ତି ହଡ଼ପ କରାଯାଇଛି ତାହାର ମଧ୍ୟ ଗୁମର ଖୋଲିଛି ସିଏଜି ରିପୋର୍ଟ । ୯୭ ଲକ୍ଷ ଟଙ୍କାର ବୃତ୍ତି ଟଙ୍କା ହଡପ୍ କରାଯାଇଥିବା ଦର୍ଶାଯାଇଛି । ଏମିତିକି ଅନୁବନ୍ଧିତ ହୋଇନଥିବା କିଛି ଶିକ୍ଷାନୁଷ୍ଠାନ ବି ନେଇଯାଇଥିଲେ ବୃତ୍ତି ଟଙ୍କା । ୩୮ଟି ଶିକ୍ଷାନୁଷ୍ଠାନର ୫୬୬୦ ପିଲାଙ୍କୁ ବେଆଇନ ଭାବେ ୧୮ କୋଟି ଦିଆଯାଇଥିବା ସିଏଜି ଦର୍ଶାଇଛନ୍ତି ରିପୋର୍ଟରେ । ସମବାୟ ବିଭାଗର ଭ୍ରାମ୍ୟମାଣ ଏଟିଏମ୍‌ରେ ବି ହୋଇଛି ବଡ଼ ଘୋଟାଲା । କାର୍ଯ୍ୟକ୍ଷମ ହୋଇନପାରିବାରୁ ଏଟିଏମ୍‌ ପାଇଁ ପାଣିରେ ପଡ଼ିଛି ୮ କୋଟି ଟଙ୍କା । ମୋଟ୍‌ ଉପରେ, ରାଜ୍ୟରେ ପୂର୍ବ ସରକାର କେମିତି ଦୁର୍ନୀତି କରିଥିଲା ତାହାର ଏବେ ଗୋଟିଏ ପରେ ଗୋଟିଏ ଗୁମର ଖୋଲିଛି । ଏବେ ସମୟ, କେବେ ଦୁର୍ନୀତିକାରୀଙ୍କ ବିରୋଧରେ ହେଉଛି ଆକ୍ସନ ।