Argus News - କୋଟ୍ଟାୟମସ୍ଥିତ ରବର ବୋର୍ଡ ମୁଖ୍ୟାଳୟ ପରିଦର୍ଶନ କଲେ ଓଡ଼ିଶା ଗଣମାଧ୍ୟମ ପ୍ରତିନିଧି

ପତ୍ର ସୂଚନା କାର୍ଯ୍ୟାଳୟ (ପିଆଇବି), ଭୁବନେଶ୍ୱର ନେତୃତ୍ୱରେ ଏକ ଗଣମାଧ୍ୟମ ପ୍ରତିନିଧି ଦଳ ସମ୍ପ୍ରତି କେରଳ ଗସ୍ତରେ ଅଛନ୍ତି । ଏହି ପ୍ରତିନିଧି ଦଳ ମଙ୍ଗଳବାର କୋଟ୍ଟାୟମସ୍ଥିତ ରବର ବୋର୍ଡ ମୁଖ୍ୟାଳୟ ପରିଦର୍ଶନ କରିଛନ୍ତି। ସେଠାରେ ସେମାନେ ଭାରତର ପ୍ରାକୃତିକ ରବର କ୍ଷେତ୍ର, ସାମ୍ପ୍ରତିକ ପ୍ରଯୁକ୍ତି ଉଦ୍ଭାବନ ଏବଂ କ୍ଷେତ୍ର ଆଧାରିତ ବିକାଶ ପଦକ୍ଷେପ ବିଷୟରେ ପ୍ରତ୍ୟକ୍ଷ ଅଭିଜ୍ଞତା ହାସଲ କରିଛନ୍ତି ।

ଏହି ପ୍ରତିନିଧି ଦଳ ରବର ବୋର୍ଡର କାର୍ଯ୍ୟନିର୍ବାହୀ ନିର୍ଦ୍ଦେଶକ ଏମ. ବସନ୍ତଗେସନ, ନିର୍ଦ୍ଦେଶିକା (ତାଲିମ) ପ୍ରିୟା ବର୍ମା, ଉପନିର୍ଦ୍ଦେଶକ (ପ୍ରଚାର ଏବଂ ଲୋକ ସମ୍ପର୍କ) ବି. ଶ୍ରୀ କୁମାର, ଉପନିର୍ଦ୍ଦେଶକ (ତାଲିମ) ଅନୀଲ କୁମାର ଭି. ପ୍ରମୁଖଙ୍କ ସମେତ ବରିଷ୍ଠ ଅଧିକାରୀଙ୍କ ସହ ମତବିନିମୟ କରିଛନ୍ତି ।

ଶ୍ରୀ ଏମ. ବସନ୍ତଗେସନ ପ୍ରତିନିଧିମଣ୍ଡଳ ସହ ଆଲୋଚନା ସମୟରେ ଭାରତର ଶିଳ୍ପ ଇକୋସିଷ୍ଟମରେ ପ୍ରାକୃତିକ ରବରର ରଣନୀତିକ ଗୁରୁତ୍ୱ ଉପରେ ଆଲୋକପାତ କରିଥିଲେ। ସେ କହିଥିଲେ, ଘରୋଇ ପ୍ରାକୃତିକ ରବର ବ୍ୟବହାରର ୬୫ ପ୍ରତିଶତରୁ ଅଧିକ ଟାୟାର ଶିଳ୍ପ ଦ୍ୱାରା ବ୍ୟବହୃତ ହୁଏ; ଅବଶିଷ୍ଟ ୩୫ ପ୍ରତିଶତ ଚିକିତ୍ସା ଉପକରଣ, ଜୋତା, ଉପଭୋକ୍ତା ସାମଗ୍ରୀ ଏବଂ ଶିଳ୍ପ ଉତ୍ପାଦ ଭଳି ଅଣ-ଟାୟାର କ୍ଷେତ୍ରରେ ଉପଯୋଗ ହୁଏ। ଚାଷ ଏବଂ ପ୍ରକ୍ରିୟାକରଣ ଠାରୁ ଆରମ୍ଭ କରି ବିପଣନ ଏବଂ ଦକ୍ଷତା ବିକାଶ ପର୍ଯ୍ୟନ୍ତ ସମଗ୍ର ମୂଲ୍ୟ ଶୃଙ୍ଖଳକୁ ସୁଦୃଢ଼ କରିବାରେ ରବର ବୋର୍ଡର ଭୂମିକା ଉପରେ ସେ ଗୁରୁତ୍ୱାରୋପ କରିଥିଲେ।

କାର୍ଯ୍ୟନିର୍ବାହୀ ନିର୍ଦ୍ଦେଶକ ମଧ୍ୟ ରବର ବୋର୍ଡ ଦ୍ୱାରା ପ୍ରୋତ୍ସାହିତ ହେଉଥିବା ସାମ୍ପ୍ରତିକ ପ୍ରଯୁକ୍ତି ଓ ଉଦ୍ଭାବନଗୁଡ଼ିକ ବିଷୟରେ ସୂଚନା ପ୍ରଦାନ କରିଥିଲେ। ଏଥିରେ ବୃକ୍ଷରୋପଣ ପରିଚାଳନା ପାଇଁ ଡ୍ରୋନ-ଆଧାରିତ ସ୍ପ୍ରେ ପ୍ରଯୁକ୍ତିବିଦ୍ୟା ଏବଂ ଉତ୍ପାଦକତା ଓ ସମ୍ବଳ ଦକ୍ଷତା ବୃଦ୍ଧି ପାଇଁ ନାନୋ-ଅଏଲ୍‌ ପ୍ରୟୋଗର ବ୍ୟବହାର ସାମିଲ ରହିଛି। ରବର ଚାଷର ଆଧୁନିକୀକରଣ, ସ୍ଥାୟୀତ୍ୱ ବୃଦ୍ଧି ଏବଂ ପରିବେଶଗତ ପ୍ରଭାବ ହ୍ରାସ କରିବା ପାଇଁ ବୋର୍ଡର ବ୍ୟାପକ ପ୍ରୟାସର ଏକ ଅଂଶ ଭାବରେ ଏହି ପଦକ୍ଷେପଗୁଡ଼ିକୁ ଉପସ୍ଥାପିତ କରାଯାଇଥିଲା।

ପଢ଼ନ୍ତୁ ଏହି ଖବର: ୨୦୨୭ ମାର୍ଚ୍ଚ ସୁଦ୍ଧା ସବୁ ଗାଁ’କୁ ପାଇପ୍‌ ପାଇଁ ଯୋଗାଇବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ

ଅଧିକାରୀମାନେ ଆହୁରି କହିଥିଲେ, ଭାରତ ବିଶ୍ୱ ସ୍ତରରେ ପ୍ରାକୃତିକ ରବରର ପ୍ରମୁଖ ଉତ୍ପାଦକ ଏବଂ ଉପଭୋକ୍ତାଙ୍କ ମଧ୍ୟରୁ ଅନ୍ୟତମ। ଏହାର ଚାଷ ପ୍ରାୟ ୯.୩୯ ଲକ୍ଷ ହେକ୍ଟରରେ ବିସ୍ତାରିତ। ଦେଶରେ ପ୍ରାକୃତିକ ରବର ଉତ୍ପାଦନ କ୍ଷେତ୍ରରେ ସ୍ଥିର ଅଭିବୃଦ୍ଧି ଦେଖିବାକୁ ମିଳିଛି । ୨୦୨୪-୨୫ ଆର୍ଥିକ ବର୍ଷରେ ଏହା ପ୍ରାୟ ୮.୭୫ ଲକ୍ଷ ଟନ୍‌ରେ ପହଞ୍ଚିଛି। ଅନ୍ୟପକ୍ଷରେ ଘରୋଇ ବ୍ୟବହାର ୧୪୧ ଲକ୍ଷ ଟନ୍‌ରୁ ଅଧିକ ହୋଇଛି । ଏହା ଟାୟାର ଏବଂ ଆନୁସଙ୍ଗିକ ଶିଳ୍ପଗୁଡ଼ିକର ପ୍ରବଳ ଚାହିଦା ଯୋଗୁଁ ପ୍ରଭାବିତ ହୋଇଛି। ଡାଉନଷ୍ଟ୍ରିମ୍ ରବର କ୍ଷେତ୍ର ଏକ ପ୍ରମୁଖ ଶକ୍ତି ଭାବରେ ଉଭା ହୋଇଛି, ରବର ଉତ୍ପାଦର ରପ୍ତାନି ୪୩ ହଜାର କୋଟି ଟଙ୍କାରୁ ଅଧିକ ମୂଲ୍ୟରେ ପହଞ୍ଚଛି ଯାହା ଗୁରୁତ୍ୱପୂର୍ଣ୍ଣ ମୂଲ୍ୟ ବୃଦ୍ଧି ଏବଂ ଶିଳ୍ପ ବିକାଶକୁ ପ୍ରତିଫଳିତ କରୁଛି।

ଆଲୋଚନା ସମୟରେ, ଭାରତର ରବର କ୍ଷେତ୍ର, ବିଶେଷକରି ଅଣ-ପାରମ୍ପରିକ ଏବଂ ଆଦିବାସୀ ଅଞ୍ଚଳରେ ଓଡ଼ିଶାର ବର୍ଦ୍ଧିତ ଭୂମିକା ଉପରେ ବିଶେଷ ଗୁରୁତ୍ୱାରୋପ କରାଯାଇଥିଲା। ଅଧିକାରୀମାନେ କହିଥିଲେ, ସମ୍ପ୍ରସାରଣ ସେବା, ତାଲିମ କାର୍ଯ୍ୟକ୍ରମ ଏବଂ ବୃକ୍ଷରୋପଣ ବିକାଶ ମାଧ୍ୟମରେ ଓଡ଼ିଶାରେ ରବର ବୋର୍ଡ ହସ୍ତକ୍ଷେପ ଦ୍ୱାରା ଗ୍ରାମୀଣ ଏବଂ ଆଦିବାସୀ ସମ୍ପ୍ରଦାୟ ପାଇଁ ଜୀବିକା ସୁଯୋଗ ସୃଷ୍ଟି ହେଉଛି । ଏହା ମଧ୍ୟ ନିଯୁକ୍ତି ସୁଯୋଗ ଏବଂ ସାମାଜିକ-ଆର୍ଥିକ ଉନ୍ନତିରେ ଗୁରୁତ୍ୱପୂର୍ଣ୍ଣ ଅବଦାନ ଦେଉଛି।
ପିଆଇବି ଭୁବନେଶ୍ୱରର ଉପନିର୍ଦ୍ଦେଶକ ମନୋଜ କୁମାର ଜାଲି, ଗଣମାଧ୍ୟମ ଓ ଯୋଗାଯୋଗ ଅଧିକାରୀ ସ୍ୱାଧୀନ ଶକ୍ତିପ୍ରସାଦ ଏହି ପ୍ରତିନିଧି ଦଳର ନେତୃତ୍ୱ ନେଇଥିଲେ ।