ରାଜ୍ୟରେ ରହିବେନି ଭୂମିହୀନ, ଖୋଜି ଖୋଜି ପଟ୍ଟା ଦେବେ ତହସିଲଦାର

ନବରଙ୍ଗପୁର: ରାଜସ୍ଵ ମନ୍ତ୍ରୀଙ୍କ ବଡ଼ ଘୋଷଣା । ରାଜ୍ୟରେ ରହିବେନି ଜଣେ କେହି ବି ଭୂମିହୀନ । ଭୂମିହୀନଙ୍କୁ ଖୋଜି ଖୋଜି ପଟ୍ଟା ଦେବେ ତହସିଲଦାର । ନବରଙ୍ଗପୁର ଜିଲ୍ଲା ପାପଡ଼ାହାଣ୍ଡିରେ ସହିଦ ଦିବସ ଅବସରରେ ମୁଖ୍ୟ ଅତିଥି ଭାବେ ଯୋଗ ଦେଇ ଏ କଥା କହିଛନ୍ତି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ।

ରାଜସ୍ଵ ମନ୍ତ୍ରୀ କହିଛନ୍ତି, ଜମି ପଟ୍ଟା ନେଇ ସରକାର ସଚେତନ ଅଛନ୍ତି । ପ୍ରତ୍ୟେକ ଭୂମିହୀନଙ୍କୁ ଖୋଜି ଖୋଜି ବାହାର କରିବା ସହିତ ସେମାନଙ୍କୁ ପଟ୍ଟା ଦେବା ଦାୟିତ୍ୱ ତହସିଲଦାରଙ୍କର । ଏଥିସହ ବର୍ତ୍ତମାନ ବିଦ୍ୟାଳୟମାନେ ମଧ୍ୟ ଭୂମିହୀନ ହୋଇ ଯାଇଥିବା କହିବା ସହିତ ସ୍କୁଲ୍ ନାମରେ ଜମି ପଟ୍ଟା କରି ତହସିଲଦାର ନିଜେ ସ୍କୁଲ ଯାଇ ଦେବେ ବୋଲି ରାଜସ୍ଵ ମନ୍ତ୍ରୀ କହିଛନ୍ତି ।

ପୂର୍ବରୁ ବିଦ୍ୟାଳୟରେ ପାଠ ପଢ଼ାଇବା କାର୍ଯ୍ୟ ଛାଡ଼ି ଶିକ୍ଷକମାନେ ଜମି ପଟ୍ଟା ପାଇଁ ତହସିଲ୍ କାର୍ଯ୍ୟାଳୟର ଚକ୍କର କାଟୁଥିଲେ । ତେଣୁ ଏଣିକି ତହସିଲଦାର ନିଜେ ସ୍କୁଲକୁ ଯାଇ ଜମି ପଟ୍ଟା ଯୋଗାଇଦେବେ ବୋଲି କହିଛନ୍ତି ମନ୍ତ୍ରୀ । ଜଙ୍ଗଲ କିସମ ଜମି ହୋଇଥିଲେ ମଧ୍ୟ ସ୍କୁଲକୁ ଉକ୍ତ ଜମି ହସ୍ତାନ୍ତର କରାଯିବ ।

ପୂର୍ବରୁ ଜେଜେବାପା ସ୍କୁଲକୁ ଦାନ କରିଥିବା ଜମିକୁ ନାତି ନିଜର ବୋଲି ଦାବି କରି ପ୍ରତିବଦଳରେ ଜମି ପାଇଁ ଦାବି କଲେ ତାଙ୍କୁ ଅନ୍ୟ କୌଣସି ସ୍ଥାନରେ ଜମି ଯୋଗାଇ ଦିଆଯିବ ବୋଲି କହିଛନ୍ତି ମନ୍ତ୍ରୀ । ଚଳିତ ସରକାରର କାର୍ଯ୍ୟକାଳ ଶେଷ ପୂର୍ବରୁ ରାଜ୍ୟକୁ ଭୂମିହୀନ ମୁକ୍ତ କରାଯିବ ବୋଲି କହିଛନ୍ତି ମନ୍ତ୍ରୀ ସୁରେଶ ପୂଜାରୀ ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ