ବିଜେଡି ଶାସନରେ ସାରା ରାଜ୍ୟରେ ଚାଲିଥିଲା ମାଫିଆଙ୍କ ରାଜ୍ । ସବୁଠୁ ବେଶୀ ଆତଙ୍କ ଖେଳାଇଥିଲେ ବାଲି ମାଫିଆ। ଏବେ ସେମାନଙ୍କ ଅଣ୍ଟା ଭାଙ୍ଗିବାକୁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର। ବେଆଇନ ବାଲି ଉତ୍ତୋଳନ ଓ ପରିବହନ କରୁଥିବା ମାଫିଆଙ୍କ ଉପରେ ଚାଲିଛି ଘନ ଘନ ଚଢ଼ାଉ। ବାଲେଶ୍ବର ଜଳେଶ୍ୱରରେ ୩୨ ହାଇୱା ଜବତ କରାଯାଇଥିବା ବେଳେ ଜଗତସିଂହପୁର କିଲିପାଳ ଘାଟରୁ ୪୬ ହାଇୱା ଜବତ ଘଟଣାରେ ମାମଲା ରୁଜୁ ହୋଇଛି । ସେପଟେ ମୟୂରଭଞ୍ଜ ବେତନଟୀରେ ତହସିଲଦାରଙ୍କୁ ମାଫିଆଙ୍କ ଆକ୍ରମଣ ଘଟଣାରେ ୭ ଜଣ ବନ୍ଧା ହୋଇଛନ୍ତି।

ଆଉ ମାଫିଆଙ୍କୁ ନାହିଁ ମାଫ୍ । ବିଜେଡି ଶାସନରେ ଆତଙ୍କରାଜ ଖେଳାଇଥିବା ମାଫିଆଙ୍କ ଉପରେ ବସୁଛି ବିଜେପି ସରକାରଙ୍କ ଘନ ଘନ ଛାଟ । ବାଲେଶ୍ୱର ଜିଲ୍ଲା ଜଳେଶ୍ୱର ତହସିଲ ଚାଲନ୍ତି ଅଞ୍ଚଳରେ ବେଆଇନ ବାଲି ଉଠାଣ ରୋକିବାକୁ ଅଚାନକ ରେଡ୍ କରିଛି ପ୍ରଶାସନ ଓ ପୋଲିସ । ଅପରେସନର ନେତୃତ୍ବ ନେଇଥିଲେ ଖୋଦ୍ ଜିଲ୍ଲାପାଳ ଓ ଏସପି। ବେଆଇନ ବାଲି ପରିବହନ କରୁଥିବା ୩୨ଟି ହାଇୱା ଜବତ କରାଯାଇଛି । ଜିଲ୍ଲାପାଳ କହିଛନ୍ତି, ଅବୈଧ ଖନନ ବିରୋଧରେ ସରକାରଙ୍କର ଶୂନ୍ୟ ସହିଷ୍ଣୁତା ନୀତି । କଡ଼ା ଆକ୍ସନ ପାଇଁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ।

ଲଘୁଖଣିଜ ଚୋରାଚାଲାଣର ହଟ୍ ସ୍ପଟ୍ ପାଲଟିଥିବା ଜଗତସିଂହପୁରରେ ବି ପ୍ରଶାସନର ଘନ ଘନ ରେଡ୍ । ବାଲିପାଟଣା କିଲିପାଳ ବାଲିଘାଟରେ ବେଆଇନ ବାଲି ଉତ୍ତୋଳନ ବେଳେ ଚଢ଼ାଉ କରି ୪୬ଟି ହାଇୱା ଓ ୩ଟି ମେସିନ ଜବତ ହୋଇଥିବାବେଳେ କିଲିପାଳ ବାଲିଘାଟ ନାଁରେ ତିର୍ତ୍ତୋଲ ଥାନାରେ ମାମଲା ରୁଜୁ ହୋଇଛି । ୬ ଜଣ ଡ୍ରାଇଭରଙ୍କୁ ଗିରଫ କରାଯାଇଛି । ହାଇୱା, ମେସିନ ସବୁକୁ ତିର୍ତ୍ତୋଲ ବାଲିଯାତ୍ରା ପଡ଼ିଆରେ ପୋଲିସ ହେପାଜତରେ ରଖାଯାଇଛି ।

ସେପଟେ ମୟୂରଭଞ୍ଜ ଜିଲ୍ଲା ବେତନଟୀ ତହସିଲଦାର ଓ ତାଙ୍କର ଡ୍ରାଇଭରଙ୍କ ଉପରେ ବାଲି ମାଫିଆଙ୍କ ଆକ୍ରମଣ ଘଟଣାରେ ଏବେ ସୁଦ୍ଧା ୭ ଜଣଙ୍କୁ ଗିରଫ କରାଯାଇଛି । ସୋମବାର ଜଣେ ଓ ମଙ୍ଗଳବାର ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଥିଲା । ଗତକାଲି ରାତିରେ ବେତନଟୀ ପୋଲିସ୍ ଟିମ୍ ବଡ଼ସାହି ତହସିଲ କୁଳିଅଣା ଗାଁରେ ଅତର୍କିତ ଚଢ଼ାଉ କରି ଆଉ ୪ ଜଣଙ୍କୁ ଗିରଫ କରିଥିଲା। ଆଉ ୫ ଜଣ ଅଭିଯୁକ୍ତ ଫେରାର ଅଛନ୍ତି । ସେମାନଙ୍କୁ ଧରିବାକୁ ପୋଲିସ ଅଭିଯାନ ଚଳାଇଛି । ବଡ଼ସାହି ବିଧାୟକ ସନାତନ ବିଜୁଳି କହିଛନ୍ତି, ଘଟଣାରେ ସମ୍ପୃକ୍ତ କାହାରିକୁ ଛଡ଼ାଯିବ ନାହିଁ । ପାତାଳରେ ଲୁଚିଲେ ବି ଖୋଜି ବାହାର କରାଯିବ।