Argus News - ନୂଆପଡ଼ା ପରାଜୟ ପରେ BJDରେ ବିଦ୍ରୋହର ନିଆଁ

ନୂଆପଡ଼ା ପରାଜୟ ପରେ ବିଜେଡିରେ ବିଦ୍ରୋହର ବହ୍ନି । ବିସ୍ଫୋରଣ କଲେ ବିଜେଡିର ବରିଷ୍ଠ ନେତା ଭୂପିନ୍ଦର ସିଂହ । କହିଲେ, ନବୀନଙ୍କୁ ପ୍ରଚାର ପାଇଁ ନେବା.. ବିଜେଡିର ବଡ଼ ଭୁଲ ଥିଲା । ପ୍ରଥମେ ପ୍ରାର୍ଥୀ ଚୟନରେ ତ୍ରୁଟି, ବରିଷ୍ଠଙ୍କୁ ଅଣଦେଖା, ଆଉ ଏବେ ଜଣଙ୍କ ପରେ ଜଣେ ବିଜେଡିର ବରିଷ୍ଠ ନେତା ଖୋଲୁଛନ୍ତି ମୁହଁ । ରାଜନୈତିକ ବିଶେଷଜ୍ଞଙ୍କ ମତ ଆଗକୁ ବିଜେଡିରେ ଉପୁଜିପାରେ ଗୃହ ଯୁଦ୍ଧ ସ୍ଥିତି ।

ନୂଆପଡ଼ା ଉପନିର୍ବାଚନରେ ୩ ନମ୍ବରକୁ ଖସିଲା ବିଜେଡି, ଯାହାକୁ ନେଇ ଦଳରେ ଏବେ ବିଦ୍ରୋହ, ଆଗକୁ ହୋଇପାରେ ବଡ଼ ବିସ୍ଫୋରଣ। ପ୍ରଫୁଲ୍ଲ ସାମଲ, ଏଲିନା ଦାସ, ଅଜିତ ବେହେରାଙ୍କ ପରେ ବରିଷ୍ଠ ନେତା ଭୁପିନ୍ଦର ଉଠାଇଛନ୍ତି ପ୍ରଶ୍ନ । ଭୂପିନ୍ଦର କହିଛନ୍ତି ନୂଆପଡ଼ାରେ ମୋର ଭଲ ଦବଦବା ଥିଲେ ବି ଦଳ କୌଣସି ଦାୟିତ୍ୱ ଦେଇ ନଥିଲା । ପ୍ରାର୍ଥୀ ଚୟନ ସହ ଜୟ ଢ଼ୋଲକିଆଙ୍କ ନାଁ ଆଗୁଆ ଘୋଷଣା ନ କରିବା ବିଜେଡି ପରାଜୟର ଏକ କାରଣ । ତେବେ ସବୁଠୁ ବଡ଼ କଥା ନବୀନଙ୍କ ଏଭଳି ଅବସ୍ଥାରେ ପ୍ରଚାର ପାଇଁ ତାଙ୍କୁ ନେବା ଦଳର ବଡ଼ ଭୁଲ ଥିଲା । ଯେଉଁଥିପାଇଁ ପରାଜୟ ପରେ ବିଜେଡିର ସମ୍ମାନ ଚାଲିଗଲା ବୋଲି କହିଛନ୍ତି ଭୂପିନ୍ଦର ।

ପୂର୍ବରୁ ବିଜେଡିର ସର୍ବେସର୍ବା ଥିବା ପାଣ୍ଡିଆନ ରାଜନୀତି ଛାଡିଥିଲେ ବି ଦଳରେ ବେଶ ସକ୍ରିୟ । ନୂଆପଡ଼ା ଉପନିର୍ବାଚନ ବି ପାଣ୍ଡିଆନ ଓ କୋଟେରୀ ଗ୍ରୁପ ନେତା ପରିଚାଳନା କରୁଥିଲେ । ଆସନ୍ତା ବର୍ଷ ରାଜ୍ୟସଭାର ୪ଟି ଆସନ ଖାଲି ହେଉଥିବା ବେଳେ ବିଜେଡି ଖାତାକୁ ଗୋଟିଏ ପଡ଼ିବ । ଯେଉଁଥିରେ ସୁଜାତା କାର୍ତ୍ତୀକେୟନଙ୍କୁ ବିଜେଡିରେ ଏଣ୍ଟ୍ରି କରାଇ ରାଜ୍ୟସଭା ପଠାଇବାକୁ ଯୋଜନା କରାଯାଉଥିବା ଚର୍ଚ୍ଚା ହେଉଛି । ରାଜନୈତିକ ବିଶେଷଜ୍ଞଙ୍କ ମତ ଏଭଳି ହେଲେ ଆଗକୁ ବିଜେଡିରେ ଗୃହ ଯୁଦ୍ଧ ସ୍ଥିତି ଉପୁଜିପାରେ ।

ନୂଆପଡ଼ା ପରାଜୟ ନେଇ ବିଜେଡିର ବିଭିନ୍ନ ନେତା ଦେଇଥିବା ମନ୍ତବ୍ୟ ଉପରେ ନଜର ପକାଇଲେ ଲାଗୁଛି ବିଜେଡି ଆଉ ସୁଧୁରିବା ସ୍ଥିତିରେ ନାହିଁ । ସମ୍ବିତ ରାଉତରାୟ କହିଥିଲେ-ଏରାଗେରାଙ୍କୁ ଦାୟିତ୍ବ ଦେବା ଦଳ ପାଇଁ ମହଙ୍ଗା ପଡିଲା । ସେହିଭଳି ପ୍ରଫୁଲ୍ଲ ସାମଲ ପରାଜୟର ସମୀକ୍ଷା ପାଇଁ ଦାବି କରିଥିଲେ । ସୁବାସ ସିଂଙ୍କ ମତ ଥିଲା-ବଡ଼ ଶିକ୍ଷା ଦେଇଛି ନୂଆପଡ଼ା । ଏଲିନା ଦାସ ସୋସିଆଲ ମିଡିଆରେ ଲେଖିଥିଲେ କୋମନା ଦାୟିତ୍ବ ନେଇଥିବା କ୍ରୀତଦାସ ଦାୟୀ । ଅଜିତ ବେହେରା ମତ ରଖିଥିଲେ ବହୁମତ ଆଧାରିତ ନଥିଲା ପ୍ରାର୍ଥୀ ଚୟନ । ସେହିଭଳି ନୂଆପଡ଼ାର ବିଜେଡି ନେତା ଭାନୁ ପ୍ରତାପ ସିଂ ମାଝୀ ଖୋଲାଖୋଲି କହିଥିଲେ ବାହାର ପ୍ରାର୍ଥୀ ବିପର୍ଯ୍ୟୟର କାରଣ । ଏବେ ଦଳ ପରାଜୟର ସମୀକ୍ଷା କରୁଛି ନା ଦାୟିତ୍ବ ଦିଆଯାଇଥିବା ନେତାଙ୍କୁ ଘଣ୍ଟ ଘୋଡ଼ାଉଛି ତାହା ଉପରେ ନଜର ।