କଳିଙ୍ଗା ଘାଟିରେ ଆରମ୍ଭ ହୋଇଛି ରାସ୍ତା ନିର୍ମାଣ କାର୍ଯ୍ୟ । ଭୟଙ୍କର ଭୂସ୍ଖଳନ ପରେ ଯୁଦ୍ଧକାଳୀନ ଭିତିରେ ଚାଲିଛି ରାସ୍ତା ନିର୍ମାଣ କାର୍ଯ୍ୟ । ବିଜୟୱାଡା-ରାଞ୍ଚି କରିଡର କୁହାଯାଉଥିବା ୧୫୭ ନମ୍ବର ଜାତୀୟ ରାଜପଥ ସମ୍ପୂର୍ଣ୍ଣ ଅବରୋଧ ହୋଇରହିଛି । ବଡ଼ ବଡ଼ ପଥର ଓ ମାଟି ଅତଡ଼ାକୁ ରାସ୍ତା ଉପରୁ ସଫା କରାଯାଇଛି । ବାଲି ପଥର ପକାଇ ରାସ୍ତା କାର୍ଯ୍ୟ ନିର୍ମାଣ କରିବାକୁ NH କର୍ତ୍ତୃପକ୍ଷ ଅଣ୍ଟାଭିଡ଼ିଛି । ଯାତାୟାତ ଠପ ହୋଇ ଯାଇଥିବାରୁ ଲୋକେ ୫୦ କିଲୋମିଟରରୁ ଅଧିକ ବୁଲାଣି ରାସ୍ତାରେ ଯାତାୟତ କରୁଛନ୍ତି । କନ୍ଧମାଳ ଓ ଗଞ୍ଜାମ ଜିଲ୍ଲା ପ୍ରଶାସନ ଘଟଣାସ୍ଥଳରେ ରହି ନିର୍ମାଣ କାର୍ଯ୍ୟର ତଦାରଖ କରୁଛନ୍ତି ।

ଗତ ଗୁରୁବାର ଦିନ ମଧ୍ୟାହ୍ନରେ ଭୟଙ୍କର ଭୂସ୍ଖଳନ ହେବା ଯୋଗୁ କଳିଙ୍ଗା ଘାଟି ଦେଇ କନ୍ଧମାଳର ଜି.ଉଦୟଗିରିରୁ ଗଞ୍ଜାମର ଦୁର୍ଗାପ୍ରସାଦକୁ ଯାତାୟାତ ସମ୍ପୂର୍ଣ୍ଣ ଠପ୍ ହୋଇ ପଡିଥିଲା । ଭୂସ୍ଖଳନ ଫଳରେ ପାହାଡ଼ରୁ ବଡ଼ ବଡ଼ ପଥର ଖଣ୍ଡ ଖସିଥିଲା । ପ୍ରବଳ ବର୍ଷା ଲାଗି ରହିଥିବା ବେଳେ କଳିଙ୍ଗା ଘାଟି ଦେଇ ଯାଇଥିବା ୧୫୭ ନମ୍ବର ଜାତୀୟ ରାଜପଥରେ କନ୍ଧମାଳରୁ ଗଞ୍ଜାମକୁ ଯାତାୟାତ ବାଧାପ୍ରାପ୍ତ ହୋଇଥିଲା ।