ଇଟାଲୀରେ ଅନୁଷ୍ଠିତ ୨୦୨୬ ଶୀତକାଳୀନ ଅଲିମ୍ପିକ୍ସରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଖେଳ ଆରମ୍ଭର ମାତ୍ର ୩ ଦିନ ମଧ୍ୟରେ ଖେଳାଳିଙ୍କ ପାଇଁ ଉଦ୍ଦିଷ୍ଟ ସମସ୍ତ ମାଗଣା କଣ୍ଡୋମ ଶେଷ ହୋଇଯାଇଛି, ଯାହା ଆୟୋଜକଙ୍କୁ ଚିନ୍ତାରେ ପକାଇଛି। ମିଲାନ୍-କୋର୍ଟିନା ଅଲିମ୍ପିକ୍ସ ଭିଲେଜରେ ପ୍ରାୟ ୨,୯୦୦ ଆଥଲେଟ୍ ରହୁଥିବାବେଳେ ସେମାନଙ୍କ ପାଇଁ ଆୟୋଜକମାନେ ୧୦,୦୦୦ ପ୍ୟାକେଟ୍ କଣ୍ଡୋମ ମାଗଣାରେ ବାଣ୍ଟିବାକୁ ରଖିଥିଲେ। କିନ୍ତୁ ମାତ୍ର ୩ ଦିନ ମଧ୍ୟରେ ଏହି ଷ୍ଟକ୍ ସମ୍ପୂର୍ଣ୍ଣ ଶେଷ ହୋଇଯାଇଛି। ଫଳରେ ଗେମ୍ସ ଭିଲେଜରେ ଏକ ପ୍ରକାର ‘କଣ୍ଡୋମ ସଙ୍କଟ’ ଦେଖାଦେଇଛି।

କାହିଁକି ଦେଖାଦେଲା ଏହି ଅଭାବ?
ଗତ ୨୦୨୪ ପ୍ୟାରିସ୍ ଅଲିମ୍ପିକ୍ସରେ ପ୍ରାୟ ୨ ଲକ୍ଷରୁ ଅଧିକ କଣ୍ଡୋମ ଯୋଗାଇ ଦିଆଯାଇଥିଲା। କିନ୍ତୁ ମିଲାନ୍ ଆୟୋଜକମାନେ ଏଥର ମାତ୍ର ୧୦,୦୦୦ ପ୍ୟାକେଟ୍ ରଖିଥିଲେ, ଯାହା ଆବଶ୍ୟକତା ତୁଳନାରେ ବହୁତ କମ୍ ସାବ୍ୟସ୍ତ ହୋଇଛି। ଅନେକ ଖେଳାଳି ଅଲିମ୍ପିକ୍ସ ଲୋଗୋ ଥିବା ଏହି ସାମଗ୍ରୀଗୁଡ଼ିକୁ ସ୍ମୃତି ଚିହ୍ନ ଭାବରେ ନିଜ ସାଙ୍ଗରେ ନେଇଯାଉଥିବାରୁ ଏହା ଶୀଘ୍ର ଶେଷ ହୋଇଥିବା ଅନୁମାନ କରାଯାଉଛି।ଏହା ବ୍ୟତୀତ ଖେଳାଳିମାନେ ଏକାଠି ରହୁଥିବାରୁ ସୁରକ୍ଷିତ ଯୌନ ସମ୍ପର୍କ ଏବଂ ସ୍ୱାସ୍ଥ୍ୟ ସଚେତନତା ପାଇଁ ଅଲିମ୍ପିକ୍ସରେ ଏଭଳି ସୁବିଧା ଯୋଗାଇଦେବା ଏକ ପୁରୁଣା ପରମ୍ପରା।

ଏହି ଅପ୍ରତ୍ୟାଶିତ ସ୍ଥିତି ପରେ ଆୟୋଜକ କମିଟି ତରଫରୁ ଖୁବଶୀଘ୍ର ନୂତନ ଷ୍ଟକ୍ ଯୋଗାଇ ଦେବାକୁ ପ୍ରତିଶ୍ରୁତି ଦିଆଯାଇଛି। ଖେଳାଳିଙ୍କ ସ୍ୱାସ୍ଥ୍ୟ ଓ ସୁରକ୍ଷାକୁ ଦୃଷ୍ଟିରେ ରଖି ଟୁର୍ଣ୍ଣାମେଣ୍ଟ ଶେଷ ପର୍ଯ୍ୟନ୍ତ ଏହି ଯୋଗାଣ ଜାରି ରହିବ ବୋଲି ସେମାନେ ସ୍ପଷ୍ଟ କରିଛନ୍ତି।
ସୂଚନାଯୋଗ୍ୟ ୨୦୨୧ ଟୋକିଓ ଅଲିମ୍ପିକ୍ସରେ କରୋନା କଟକଣା ଯୋଗୁଁ ଖେଳାଳିଙ୍କ ମଧ୍ୟରେ ଶାରୀରିକ ଦୂରତା ବଜାୟ ରଖିବାକୁ ନିର୍ଦ୍ଦେଶ ଥିଲା, କିନ୍ତୁ ଚଳିତ ଶୀତକାଳୀନ ଅଲିମ୍ପିକ୍ସରେ ସେଭଳି କୌଣସି ପ୍ରତିବନ୍ଧକ ନାହିଁ।
ପଢନ୍ତୁ ଏହି ଖବର: କାହିଁକି ଗୋଟିଏ ଦିନରେ ଦୁଇ ଥର ହେବ ଭାରତ-ପାକିସ୍ତାନ ଭେଟ୍‌, ଜାଣନ୍ତୁ କଣ ରହିଛି ପ୍ଲାନ...