ବାଂଲାଦେଶ କ୍ରିକେଟ୍ ବୋର୍ଡ ପରିବର୍ତ୍ତିତ ପରିସ୍ଥିତିକୁ ଦର୍ଶାଇ ଚଳିତ ବାଂଲାଦେଶ ପ୍ରିମିୟର ଲିଗର ଉପସ୍ଥାପନା ପ୍ୟାନେଲରୁ ଭାରତୀୟ ଆଙ୍କର ରିଦ୍ଧିମା ପାଠକଙ୍କୁ ହଟାଇ ଦେଇଛି। ମଙ୍ଗଳବାର, ଜାନୁଆରୀ 6, 2026 ରେ, BCB ଅଧିକାରୀମାନେ କହିଥିଲେ ଯେ ସାମ୍ପ୍ରତିକ ଘଟଣାକ୍ରମ ମଧ୍ୟରେ ପାଠକଙ୍କୁ ପ୍ୟାନେଲରୁ ହଟାଇ ଦିଆଯାଇଛି। ଏହାକୁ ନେଇ ଭାରତୀୟ ସ୍ପୋର୍ଟ୍ସ ବ୍ରଡକାଷ୍ଟର ରିଦ୍ଧିମା ପାଠକ ବିସ୍ଫୋରକ ବୟାନ ଦେଇଛନ୍ତି, ମୁଁ ନିଜେ ବାଂଲାଦେଶ ପ୍ରିମିୟର ଲିଗ (bpl)ରୁ ବାହାରିଛି। ମୋତେ କେହି ବାହାର କରି ନାହାନ୍ତି। ଏବଂ ବାଂଲାଦେଶ କ୍ରିକେଟ୍ ବୋର୍ଡ (BCB) ଦ୍ୱାରା ତାଙ୍କୁ ବହିଷ୍କାର କରାଯାଇଥିବା ନେଇ ହେଉଥିବା ଚର୍ଚ୍ଚାକୁ ଖାରଜ କରିଛନ୍ତି। ତାଙ୍କର ସ୍ପଷ୍ଟୀକରଣ ଏପରି ଏକ ସମୟରେ ଆସିଛି ଯେତେବେଳେ ଭାରତ ଏବଂ ବାଂଲାଦେଶୀ କ୍ରିକେଟ୍ ବୋର୍ଡ ମଧ୍ୟରେ ଉତ୍ତେଜନା ଚରମ ସୀମାରେ ପହଞ୍ଚିଛି।

View this post on Instagram

A post shared by Ridhima Pathak (@ridhimapathak)

BCB ବାହାର କରିଦେଇଥିବା ନେଇ ହେଉଥିବା ଚର୍ଚ୍ଚା
ପ୍ରଥମେ ଖବର ମିଳିଥିଲା ଯେ, BCB ଭାରତ-ବାଂଲାଦେଶ ମଧ୍ୟରେ ଚାଲିଥିବା ବିବାଦ ମଧ୍ୟ‌ରେ ରିଦ୍ଧିମା ବଳି ପଡ଼ିଥିଲେ। ତାଙ୍କୁ BCB ବିଦା କରିଥିବା କୁହାଯାଉଥିଲା। ହେଲେ ଏବେ ରିଦ୍ଧିମା ଏହି ଚର୍ଚ୍ଚା ଉପରେ ପ୍ରତିକ୍ରିୟା ରଖିଛନ୍ତି। ହେଉଥିବା ଚର୍ଚ୍ଚା ମିଛ ବୋଲି ସେ କହିଛନ୍ତି।

ମୋତେ ବାହାର କରାଯାଇନି, ମୁଁ ଛାଡ଼ିଛି: ରିଦ୍ଧିମା
ସେ କହିଛନ୍ତି ଯେ, "ସତ୍ୟ ଗୁରୁତ୍ୱପୂର୍ଣ୍ଣ। ଗତ କିଛି ଘଣ୍ଟା ହେଲାଣି ଚର୍ଚ୍ଚା ହେଉଛି ଯେ, ମୋତେ BPLରୁ ବିଦା କରାଯାଇଛି। ଏହା ସତ ନୁହେଁ। ମୁଁ ଛାଡ଼ିବାକୁ ନିଷ୍ପତ୍ତି ନେଇଥିଲି, ମୋତେ ବିଦା କରାଯାଇନି। ମୋ ପାଇଁ, ମୋ ଦେଶ ସବୁବେଳେ ପ୍ରଥମେ ଆସେ। ଏବଂ ମୁଁ କ୍ରିକେଟକୁ ବହୁତ ଗୁରୁତ୍ବ ଦିଏ। ବର୍ଷ ବର୍ଷ ଧରି ସଚ୍ଚୋଟତା, ସମ୍ମାନ ଏବଂ ଆଗ୍ରହ ସହିତ ଏହି କ୍ରୀଡ଼ାର ସେବା କରିବାର ସୌଭାଗ୍ୟ ମୁଁ ପାଇଛି। ଏହି ନିଷ୍ପତ୍ତି ସହିତ କିଛି ବଦଳିବ ନାହିଁ। ମୁଁ ସର୍ବଦା‌ ଏହି ସହିତ ରହିବି। ସମର୍ଥନ ପାଇଁ ମୋ ସହିତ ଯୋଗାଯୋଗ କରିଥିବା ସମସ୍ତଙ୍କୁ ଧନ୍ୟବାଦ। ଆପଣଙ୍କ ବାର୍ତ୍ତାଗୁଡିକ ମୋ ପାଇଁ ଅଧିକ ମହତ୍ତ୍ୱପୂର୍ଣ୍ଣ।"

ରିଦ୍ଧିମା ପାଠକ କିଏ?
ରିଦ୍ଧିମାଙ୍କ ଜନ୍ମ ୧୯୯୦ ମସିହା ଫେବୃଆରୀ ୧୭ ତାରିଖରେ ଝାଡ଼ଖଣ୍ଡ ରାଜଧାନୀ ରାଞ୍ଚିରେ ହୋଇଥିଲା। ପେଶାରେ ସେ ଜଣେ ମଡେଲ, ଅଭିନେତ୍ରୀ, ଭଏସ ଓଭର ଆର୍ଟିଷ୍ଟ ଏବଂ ଟିଭି ଆଙ୍କର ଅଟନ୍ତି। ରିଦ୍ଧିମା ତାଙ୍କ କ୍ୟାରିୟର ଏକ ରେଡିଓ ଷ୍ଟେସନରୁ ଆରମ୍ଭ କରିଥିଲେ। ସେ ଷ୍ଟାର ସ୍ପୋର୍ଟ୍ସ, ଟେନ ସ୍ପୋର୍ଟ୍ସ, ସୋନି ଏବଂ ଜିଓରେ ବହୁତ ସାରା ସ୍ପୋର୍ଟ୍ସ ଇଭେଣ୍ଟ ପ୍ରେଜେଣ୍ଟ କରିସାରିଛନ୍ତି। ରିଦ୍ଧିମାଙ୍କୁ ଟୋକିଓ ଅଲିମ୍ପିକ୍ସ ବେଳେ ପ୍ରକୃତ ପରିଚୟ ମିଳିଲା। ରିଦ୍ଧିମା ବହୁ ବଡ଼ ଷ୍ଟାର ଖେଳାଳିଙ୍କ ଇଣ୍ଟରଭ୍ୟୁ ମଧ୍ୟ କରିଛନ୍ତି।