ମନରେ କୋହକୁ ଚାପି ଝିଅକୁ ଏୟାରପୋର୍ଟରେ ଛାଡି ଦେଇ ଆସିଲେ ବାପା । ଆଉ ଝିଅ ସହ ଗୋଟେ ଫଟୋ ବି ଉଠାଇଲେ । କି କଥା ଝିଅ ମୋର ବିଦେଶ ଯାଉଛି । ଆଖିରେ ଆସୁଥିବା ଲୁହକୁ ଚାପି ଦେଇ ଶେଷ ଥର ପାଇଁ ଝିଅକୁ ଦେଖି ଟିକେ ହସିଦେଲେ । ତାକୁ ମନ ପୁରାଇ ଦେଖିଦେଲେ । ହେଲେ...

ନୂଆ ନୂଆ ବାହାଘର । ସ୍ୱାମୀଙ୍କ ପାଖକୁ ଯିବାକୁ ଖୁସବୁ ଯେତିକି ଉତ୍ସାହିତ ଥାଆନ୍ତି । ଘର ଲୋକଙ୍କୁ ଛାଡି ଚାଲିଯିବାର ଦୁଃଖ ମଧ୍ୟ ସେତିକି ଥାଏ । ଯିବା ପୂର୍ବରୁ ମା, ସାନ ଭାଇ-ଭଉଣୀଙ୍କୁ ଛାତିରେ ଜାବୁଡି ଧରିଲେ । ଆଉ ବାଏ କହି ଚେକ୍ ଇନ୍ କଲେ....

ବାସ୍ କେଇ ସେକେଣ୍ଡର କଥା । ଝିଅକୁ ଛାଡି ଗାଡିରେ ବାପା, ମା, ଭାଇ, ଭଉଣୀ ଅଳ୍ପ ବାଟ ଫେରିଛନ୍ତି କି ନାହିଁ ...ସଙ୍ଗେ ସଙ୍ଗେ ଗଣମାଧ୍ୟମରେ ଖବର ଆସେ ଅହମ୍ମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆ ବୋଇଂ ବିମାନ AI-171 କ୍ରାସ୍ ହୋଇଯାଇଛି...ଗାଡି ଚଲାଉଥିବା ବାପା..ପଛରେ ବସିଥିବା ମା, ଭଉଣୀ, ଭାଇ ସବୁ ଆଶ୍ଚର୍ଯ୍ୟ ।

କେଇ କ୍ଷଣରେ ଝିଅର ସୁନାର ସଂସାର ଜଳିଗଲା । ଉଜୁଡିଗଲା ସ୍ୱପ୍ନ । ଏଇ ଜାନୁଆରୀ ମାସରେ ତ ବାହାଘର ହୋଇଥିଲା । ବାହାଘରର ଦୁଇ ମାସ ପରେ ସ୍ୱାମୀ ଲଣ୍ଡନ ଚାଲିଯାଇଥିଲେ । କାର୍ଯ୍ୟରେ ଯୋଗ ଦେବାକୁ । ବିବାହ ପରେ ଖୁସବୁ ପ୍ରଥମ ଥର ତାଙ୍କ ସ୍ୱାମୀଙ୍କୁ ଭେଟିବାକୁ ଲଣ୍ଡନ ଯାଉଥିଲେ । ନୂଆ ଦେଶ, ନୂଆ ବାହାଘର ମନରେ କେତେ କଣ ଆଶା..ଉତ୍ସାହ । ହେଲେ ନିମିଷକେ ସବୁ ଛାରଖାର ହେଇଗଲା ।

ଅହମ୍ମଦାବାଦର ବିମାନ ଦୁର୍ଘଟଣାରେ ଅନେକ ଲୁହଭିଜା କାହାଣୀ ମଧ୍ୟରୁ ଏ କାହାଣୀ ହେଉଛି ରାଜସ୍ଥାନ ବାଲୋତ୍ରା ଜିଲ୍ଲାର ନବବିବାହିତା ୨୧ ବର୍ଷୀୟା ଖୁସବୁଙ୍କର । ଜାନୁଆରୀରେ ଡାକ୍ତର ବିପୁଲଙ୍କ ସହ ତାଙ୍କର ହାତଗଣ୍ଠି ପଡିଥିଲା । ହେଲେ ସାତ ଜନ୍ମର ସାଥୀକୁ ଏତେ ଶୀଘ୍ର ଛାଡି ଚାଲିଯିବେ, ସେ ବି ଭାବି ନଥିଲେ । ବୁଧବାର ରାତିରେ ତାଙ୍କ ବାପା ଏବଂ ସମ୍ପର୍କୀୟ ଭାଇଙ୍କ ସହ ଅହମ୍ମଦାବାଦରେ ପହଞ୍ଚିଥିଲେ ଖୁସବୁ । ତାଙ୍କ ବାପା ମଦନ ସିଂହ, ପ୍ରସ୍ଥାନ ପୂର୍ବରୁ ବିମାନବନ୍ଦରରେ ତାଙ୍କ ସହିତ ଏକ ଫଟୋ ଉଠାଇ ହ୍ୱାଟସଆପରେ ଷ୍ଟାଟସ୍ ଦେଇଥିଲେ । "ଆଶୀର୍ବାଦ ଖୁସବୁ ବେଟା, ମୋ ଝିଅ ଲଣ୍ଡନ ଯାଉଛି ।"

ହେଲେ ଝିଅକୁ ଛାଡିବାର କିଛି ମୁହୂର୍ତ୍ତ ପରେ, ପୁରା ପରିବାର ଫେରୁଥିଲା ବେଳେ ଦୁର୍ଘଟଣାର ଖବର ସେମାନଙ୍କ ଦୁନିଆକୁ ଭାଙ୍ଗି ଦେଇଛି । ଅହମ୍ମଦାବାଦରୁ ଉଡ଼ାଣ ଭରିବା ପରେ ଦୁର୍ଘଟଣାଗ୍ରସ୍ତ ହୋଇଥିବା ଏୟାର ଇଣ୍ଡିଆ ବିମାନରେ ଥିବା ୨୪୨ ଜଣଙ୍କ ମଧ୍ୟରୁ ଖୁସବୁ ଥିଲେ ଜଣେ । ଏହିଭଳି ଅନେକ ଲୋକ ନିଜ ପରିବାରକୁ ହରାଇ ଭାଙ୍ଗିପଡ଼ିଛନ୍ତି । ପ୍ରିୟଜନଙ୍କୁ ହରାଇ ସମସ୍ତେ ହତବାକ ସମସ୍ତେ ସ୍ତବ୍ଧ । ସତରେ ଭଗବାନ ଏମିତି ମୃତ୍ୟୁ କାହାରିକୁ ନ ଦିଅନ୍ତୁ ।