ଭୁବନେଶ୍ଵର: କିଲର୍ 'ଆମ ବସ୍' । ପୁଣି ନେଲା ଜୀବନ । 'ଆମ ବସ୍' ଧକ୍କାରେ ଜଣେ ବାଇକ୍ ଆରୋହୀଙ୍କ ମୃତ୍ୟୁ ହୋଇଛି । ଜାତୀୟ ରାଜପଥ ୧୬ ସତ୍‌ସଙ୍ଗ ବିହାର ଛକରେ ଏହି ଦୁର୍ଘଟଣା ଘଟିଛି । ଯାହାକୁ ନେଇ ତୀବ୍ର ଉତ୍ତେଜନା ପ୍ରକାଶ ପାଇଛି ।

ସୂଚନା ଅନୁସାରେ, ୯୧ ନମ୍ବର ରୁଟ୍‌ର 'ଆମ ବସ୍'ଟ ବରମୁଣ୍ଡା ଆଡ଼କୁ ଯାଉଥିଲା । ବରମୁଣ୍ଡା ଆଡ଼କୁ 'ଆମ ବସ୍'ଟି ଯାଉଥିବା ବେଳେ ଜଣ ବାଇକ୍‌ ଚାଳକଙ୍କୁ ପଛରୁ ଧକ୍କା ଦେଇଥିଲା ।

ଏଥିସହ ପଢ଼ନ୍ତୁ: 'ଆମ ବସ୍' ପାଲଟିଛି କି 'ଯମ ବସ୍' ? ବର୍ଷକରେ ଗଲାଣି ୭ ମୁଣ୍ଡ...

ମୁଣ୍ଡ ଉପରେ ଚଢ଼ିଗଲା 'ଆମ ବସ୍'

'ଆମ ବସ୍' ଧକ୍କାରେ ବାଇକ୍ ଚାଳକ ତଳେ ପଡ଼ି ଯାଇଥିଲେ । ବସ୍‌ଟି ବାଇକ୍ ଆରୋହୀଙ୍କ ମୁଣ୍ଡ ଉପରେ ଚଢ଼ି ଯାଇଥିଲା । ଘଟଣାସ୍ଥଳରେ ହିଁ ବାଇକ୍ ଚାଳକଙ୍କ ମୃତ୍ୟୁ ହୋଇଛି । ଦୁର୍ଘଟଣା ପରେ 'ଆମ ବସ୍' ଡ୍ରାଇଭର୍ ଫେରାର୍ ହୋଇ ଯାଇଥିବା ଜଣା ପଡ଼ିଛି ।

ଦୁର୍ଘଟଣାକୁ ନେଇ ଲୋକଙ୍କ ମଧ୍ୟରେ ଆକ୍ରୋଶ ପ୍ରକାଶ ପାଇଛି । ଲୋକେ ସେହି ରାସ୍ତା ଦେଇ ଯାଉଥିବା 'ଆମ ବସ୍'କୁ ଅଟକାଉଛନ୍ତି । ସହିଦ ନଗର ଥାନା ପୋଲିସ ପହଞ୍ଚି ଖୋଳତାଡ଼ ଆରମ୍ଭ କରିଛି । ରସୁଲଗଡ଼ରୁ ବାଣୀବିହାର ରାସ୍ତାରେ ଏବେ ଟ୍ରାଫିକ୍ ଜାମ ହୋଇଛି ।

ଖବର ଅନୁସାରେ, 'ଆମ ବସ୍' ପଛରୁ ଧକ୍କା ଦେଇଥିବା ବାଇକ୍ ଆରୋହୀ ଜଣଙ୍କ ହେଲମେଟ୍ ପିନ୍ଧି ନଥିଲେ । ବ୍ୟକ୍ତି ଜଣଙ୍କ ବାଇକ୍‌ରେ ଏକାକୀ ଯାଉଥିଲେ । ମୃତକଙ୍କ ପରିଚୟ ଜଣାପଡ଼ି ନଥିବା ବେଳେ ଲୋକେ କ୍ଷତିପୂରଣ ଦାବି କରି ରାସ୍ତା ଅବରୋଧ କରିଛନ୍ତି ।

ବାରମ୍ବାର ଦୁର୍ଘଟଣା ଘଟାଉଛି 'ଆମ ବସ୍'

ଏହା ପୂର୍ବରୁ ଫେବ୍ରୁଆରୀ ଚତୁର୍ଥ ସପ୍ତାହରେ ପଳାଶପଲ୍ଲୀ ଓଭରବ୍ରିଜ୍ ନିକଟରେ ଜଣେ ସାଇକେଲ ଆରୋହୀଙ୍କୁ ଧକ୍କା ଦେଇଥିଲା 'ଆମ ବସ୍' । ଯାହା ପରେ 'ଆମ ବସ୍' ଜାଳି ଦେଇଥିଲେ ଲୋକେ ।

ବର୍ଷକରେ ନେଲାଣି ୭ ମୁଣ୍ଡ

ବିଧାନସଭାରେ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ଦେଇଥିବା ତଥ୍ୟ ଅନୁସାରେ, ଗତ ଏକ ବର୍ଷ ମଧ୍ୟରେ ଆମ ବସ୍ ଦୁର୍ଘଟଣାରେ ୭ ଜଣଙ୍କ ମୃତ୍ୟୁ ହୋଇଛି । ଏଥିମଧ୍ୟରୁ ସର୍ବାଧିକ ୬ ଜଣ ଭୁବନେଶ୍ୱରରେ ଏବଂ ଜଣେ କଟକରେ ପ୍ରାଣ ହରାଇଛନ୍ତି ।

ଏଥିସହ ପଢ଼ନ୍ତୁ: ଜନପଥରେ ବାଇକ୍‌କୁ ଧକ୍କା ଦେଲା 'ଆମ ବସ୍‌', ରାଗରେ ୩ଟା ବସ୍‌ ଭାଙ୍ଗି ଦେଲେ

କେବଳ ସେତିକି ନୁହେଁ ୮ ଜଣ ଗୁରୁତର ଆହତ ହୋଇ ପଙ୍ଗୁ ହୋଇଛନ୍ତି । ଦୁର୍ଘଟଣା ରୋକିବାକୁ ବିଭାଗ ପକ୍ଷରୁ ୨୮ ହଜାରରୁ ଅଧିକ ଥର ଯାଞ୍ଚ ହୋଇଥିଲେ ବି ସ୍ଥିତିରେ ସୁଧାର ଆସୁନି । ବାରମ୍ବାର ଦୁର୍ଘଟଣାକୁ ଦୃଷ୍ଟିରେ ରଖି ସରକାର ଏବେ ସ୍ପିଡ୍ ଲିମିଟ୍ ଧାର୍ଯ୍ୟ କରିଛନ୍ତି ।

ଇଲେକ୍ଟ୍ରିକ୍ ବସ୍ ପାଇଁ ଘଣ୍ଟାପ୍ରତି ୩୫ କିମି, ଡିଜେଲ ବସ୍ ପାଇଁ ୪୦ କିମି ଏବଂ ରାଜପଥରେ ୫୦ କିମି ବେଗ ସୀମିତ ରଖିବାକୁ ନିର୍ଦ୍ଦେଶ ଦିଆଯାଇଛି । କିନ୍ତୁ ପ୍ରଶ୍ନ ଉଠୁଛି, ନିୟମ ସତ୍ତ୍ୱେ କାହିଁକି ବାରମ୍ବାର ରକ୍ତ ରଞ୍ଜିତ ହେଉଛି ରାଜଧାନୀର ରାଜପଥ ?