Accident News / ଭୟଙ୍କର ଦୁର୍ଘଟଣା: ଦୁଇଟି କାର୍ ଏବଂ ଦୁଇଟି ବାଇକ୍ ଉପରେ ଚଢିଗଲା ମହିନ୍ଦ୍ରା ଏକ୍ସୟୁଭି

ଭୁବନେଶ୍ୱରର ପଳାଶୁଣୀ ଛକରେ ଘଟିଛି ଭୟଙ୍କର ସଡ଼କ ଦୁର୍ଘଟଣା । ଫୁଟ୍ ଓଭରବ୍ରିଜ୍ ତଳେ ଥିବା ଏକ ଚା’ ଦୋକାନ ଉପରେ ଏସୟୁଭି କାର୍ ମାଡ଼ିଯିବାରୁ ଅନେକ ଲୋକ ଆହତ ହୋଇଛନ୍ତି । ଚା’ ପିଇବା ପାଇଁ ଦୋକାନ ନିକଟରେ ଲୋକମାନେ ଏକାଠି ହୋଇଥିବା ବେଳେ ହଠାତ୍ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି ।

ସୂଚନା ଅନୁସାରେ, ଦୁର୍ଘଟଣାଗ୍ରସ୍ତ ମହିନ୍ଦ୍ରା ଏସୟୁଭିଟି ନିୟନ୍ତ୍ରଣ ହରାଇ ଚା’ ଦୋକାନ ଉପରେ ଚଢ଼ିଯାଇଥିଲା । ଏହାସହ ରାସ୍ତା କଡ଼ରେ ଥିବା ଦୁଇଟି କାର୍ ଓ ଦୁଇଟି ବାଇକ୍ ମଧ୍ୟ ଏହାର ଧକ୍କାରେ କ୍ଷତିଗ୍ରସ୍ତ ହୋଇଥିବା ଜଣାପଡ଼ିଛି । ଘଟଣାରେ ଚାରିଜଣ ଗୁରୁତର ଆହତ ହୋଇଥିବା ବେଳେ ଦୁର୍ଘଟଣା ଘଟାଇଥିବା ଯୁବକ ମଧ୍ୟ ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି ।

ଦୁର୍ଘଟଣା ପରେ ଘଟଣାସ୍ଥଳରେ ତୁରନ୍ତ ପୋଲିସ ଓ ଉଦ୍ଧାରକାରୀ ଟିମ୍ ପହଞ୍ଚିଥିଲେ । ମଞ୍ଚେଶ୍ୱର ଥାନାର ଦୁଇଟି ପିସିଆର୍, ପାହାଳ ଥାନାର ଗୋଟିଏ ପିସିଆର୍, ସହିଦନଗର ଥାନାର ଗୋଟିଏ ପିସିଆର୍ ଏବଂ ହାଇୱେ ପାଟ୍ରୋଲିଂ ଗାଡ଼ି ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ କରିଥିଲେ ।

ଗୁରୁତରଙ୍କ ମଧ୍ୟରୁ ଜଣଙ୍କୁ ପିସିଆର୍ ଯୋଗେ ଏବଂ ଅନ୍ୟମାନଙ୍କୁ ଦୁଇଟି ଆମ୍ବୁଲାନ୍ସ ଯୋଗେ ନିକଟସ୍ଥ ମେଡିକାଲକୁ ପଠାଯାଇଛି । ଅନ୍ୟପକ୍ଷରେ, ମଞ୍ଚେଶ୍ୱର ଥାନା ପୋଲିସ ଦୁର୍ଘଟଣାଗ୍ରସ୍ତ ସମସ୍ତ ଗାଡ଼ିକୁ ଥାନାକୁ ନେଇଛି । ଘଟଣାକୁ ନେଇ ମାମଲା ରୁଜୁ କରାଯାଇ ଦୁର୍ଘଟଣାର ପ୍ରକୃତ କାରଣ ନେଇ ତଦନ୍ତ ଆରମ୍ଭ ହୋଇଛି ।