The first meeting of the central election committee in BJP today

ବ୍ରହ୍ମପୁର, ନବରଙ୍ଗପୁର, ଫୁଲବାଣୀ, ବଲାଙ୍ଗିର , ବରଗଡ଼  । ମୋଦିଙ୍କ ନିଶାନାରେ ଥିଲେ ନବୀନ । ପୁରା ଶାଣିତ ଢଙ୍ଗରେ ନବୀନଙ୍କ ଉପରେ ମନଖୋଲା ବର୍ଷିଛନ୍ତି ମୋଦି । ସଭା ମଂଚରେ ପହଞ୍ଚୁ ପହଞ୍ଚୁ ରାଜ୍ୟ ସରକାରଙ୍କ ଉପରେ ହମଲା କରିବା ସହିତ କେନ୍ଦ୍ର କେତେ ଟଙ୍କା ଦେଇଛି ତାହାର ବି ଗୁମର ଖୋଲିଥିଲେ । ହେଲେ ପୂର୍ବ ଅପେକ୍ଷା ଆଜିର ଆକ୍ରମଣ ଥିଲା ପୁରା ସାନଦାନ, ଜବରଦସ୍ତ, ଧମାକାଦାର । ରତ୍ନଭଣ୍ଡାରଠୁ ଶ୍ରୀମନ୍ଦିର...ଆୟୁଷ୍ମାନଠୁ ଆରମ୍ଭ କରି ଓଡ଼ିଆ ଅସ୍ମିତା । ଏ ସବୁ ପ୍ରସଙ୍ଗରେ ଗୋଟି ଗୋଟି କରି ଜବାବ ରଖିଥିଲେ । କେନ୍ଦ୍ର କେତେ ଦେଉଛନ୍ତି କଡା ଗଣ୍ଡା କରି ହିସାବ ଦେଇଥିଲେ । ନିର୍ବାଚନ ଆରମ୍ଭର ଠିକ୍‌ ଦିନକ ପୂର୍ବରୁ ମୋଦିଙ୍କ ଏମିତି ବୟାନକୁ ନେଇ ଚର୍ଚ୍ଚା ଜୋର ।

ବରଗଡ଼ରେ ବି ମୋଦି ହୁଙ୍କାର । ରାଜ୍ୟ ସରକାରଙ୍କ ଉପରେ ଆସୁ ଆସୁ କଲେ ହମଲା । ରାଜ୍ୟ ସରକାରଙ୍କୁ ଟାର୍ଗେଟ କରି ପ୍ରଧାନମନ୍ତ୍ରୀ କହିଛନ୍ତି, ୨୫ ବର୍ଷ ଭିତରେ ବିଜେଡି ସରକାର ଓଡ଼ିଶାକୁ ଗରିବୀରୁ ବାହାରକୁ ଆଣିପାରିନି । ସାରା ଓଡ଼ିଶାରେ ବିଜେଡି ପ୍ରତି ଲୋକଙ୍କ ପ୍ରବଳ ରାଗ ରହିଛି । କାରଣ ଓଡ଼ିଶାରେ ସରକାର ପୂରା ଆଉଟ ସୋର୍ସ ହୋଇଯାଇଛି । ମୁଖ୍ୟମନ୍ତ୍ରୀଙ୍କ ଉପରେ ଜଣେ ସୁପର ସିଏମ୍‌ ହୋଇଗଲେଣି । ଯିଏ ଓଡ଼ିଶାକୁ ଜାଣିନି, ତା ହାତକୁ ଓଡ଼ିଶା ଯିବା ଉଚିତ କି ବୋଲି ପ୍ରଧାନମନ୍ତ୍ରୀ ମୋଦି ପ୍ରଶ୍ନ କରିଛନ୍ତି ? ଓଡ଼ିଶାକୁ ବଞ୍ଚାଇବା ଦାୟିତ୍ୱ କାହାର ବୋଲି ପଚାରିଛନ୍ତି ପ୍ରଧାନମନ୍ତ୍ରୀ । ମୋ ଓଡ଼ିଶାକୁ ବଞ୍ଚାଇବାକୁ ଆପଣମାନଙ୍କୁ ପ୍ରାର୍ଥନା କରୁଛି । ନେହୁରା ହେଉଛି ମୋ ଓଡ଼ିଶାକୁ ବଞ୍ଚାଇ ଦିଅନ୍ତୁ ବୋଲି ଆକୁଳ ପ୍ରାର୍ଥନା କରିଛନ୍ତି ପ୍ରଧାନମନ୍ତ୍ରୀ ।

ଅପାର ପ୍ରାକୃତିକ ସଂପଦରେ ପରିପୂର୍ଣ୍ଣ ଓଡ଼ିଶା ଗରିବ କାହିଁକି । ଓଡ଼ିଶା ଧନୀ, କିନ୍ତୁ ଲୋକେ ସବୁବେଳେ ଗରିବ କାହିଁକି । ଏହାର କାରଣ ଆପଣଙ୍କ ସରକାରକୁ ନିର୍ବାଚିତ ଲୋକ ଚଳାଉ ନାହାନ୍ତି । ତେଣୁ ସମୟ ଆସିଯାଇଛି, ବଦଳିବା ଦରକାର ଏ ସରକାର ବୋଲି କହିଛନ୍ତି ମୋଦି ।
 

ଓଡ଼ିଶାରେ ଏଥର ଡବଲ ଇଞ୍ଜିନ ସରକାର ହେଲେ ଡବଲ ବିକାଶ ହେବ । ଲଗାତାର ଏତେଦିନ ବିଜେଡି କ୍ଷମତାରେ ରହିଲା ହେଲେ ରାଜ୍ୟର ବିକାଶ ଯେମିତି ଭାବରେ ହେବାର କଥା ସେମିତି ହେଲା ନାହିଁ । ଏ ସରକାର ପାଇଁ ଓଡ଼ିଆ ଅସ୍ମିତା ଆଜି ସଂକଟରେ, ଆମେ କେବେ ଏହାକୁ ବନ୍ଧା ପକାଇବୁନି । ଓଡ଼ିଶାକୁ ଏହି ସଂକଟରୁ ଉଦ୍ଧାର କରିବାକୁ ବିଜେପି ସଂକଳ୍ପ କରିଛି । ଜୁନ୍‌ ୪ ବିଜେଡି ସରକାରର ଏକ୍ସପାଏରୀ ଡେଟ୍‌ । ଜୁନ୍‌ ୧୦ରେ ବିଜେପି ସରକାର ଶପଥ ନେବ, ଆପଣମାନଙ୍କୁ ନିମନ୍ତ୍ରଣ ରହିଲା...ଓଡ଼ିଶା ମାଟିରେ ଜନ୍ମିତ ବ୍ୟକ୍ତି ହିଁ ମୁଖ୍ୟମନ୍ତ୍ରୀ ହେବ, ଏହା ମୋଦି ଗ୍ୟାରେଣ୍ଟି ।

ଖାଲି ଏତିକି ନୁହେଁ ବରଂ ମୋଦି ବଲାଙ୍ଗିର ସଭାରେ କହିଛନ୍ତି, ଆପଣଙ୍କ ମୁଖ୍ୟମନ୍ତ୍ରୀ ଏଠାରେ ନିର୍ବାଚନ ଲଢ଼ିବାକୁ ଆସିଛନ୍ତି । ତାଙ୍କୁ ପୂରା ବାଜାବାଣ ବଜାଇ ଏଠାରୁ ବିଦା କରିଦିଅନ୍ତୁ । ନବୀନ ବାବୁ ଯଦି ଏଠାକୁ ପ୍ରଚାରରେ ଆସନ୍ତି, ତାଙ୍କୁ ପଚାରିବେ । ନବୀନଙ୍କୁ ବିନା କାଗଜରେ କଣ୍ଟାବାଂଜିର ୧୦ ଗାଁ ନାଁ ପଚାରିବେ । ନବୀନ କଣ୍ଟାବାଂଜିର ୧୦ଟି ଗାଁ ନାଁ ବି କହିପାରିବେନି । ସେ ଆପଣଙ୍କ ସହ ନାହାନ୍ତି, ସେ ଆପଣଙ୍କ ଦୁଃଖ ବୁଝିପାରିବେନି । କିଛି ଏମିତି ଢଙ୍ଗରେ ନବୀନଙ୍କୁ ହମଲା କରିଛନ୍ତି ମୋଦି । ଆଉ ମୋଦିଙ୍କ ଏମିତି ସାନାଦାର ଆକ୍ରମଣକୁ ନେଇ ଏବେ ବିଜେଡି ଶିବିରରେ ଭାଳେନି । 

ଏଥର ଅଧିକ ଆଗ୍ରେସିଭ୍‌ ମୁଡ୍‌ରେ ମୋଦି । ଫୁଲବାଣୀରେ ନବୀନଙ୍କ ଉପରେ ଜୋରଦାର ବର୍ଷିଲେ ମୋଦି ।  କହିଲେ, ମହାପ୍ରଭୁ ଜଗନ୍ନାଥ ଓ ରତ୍ନଭଣ୍ଡାର ସହ ଖେଳ ଖେଳୁଛି ବିଜେଡି । ଶ୍ରୀମନ୍ଦିର ରତ୍ନଭଣ୍ଡାର ମୂଲ୍ୟାଙ୍କନ ୪୫ ବର୍ଷ ତଳେ ହୋଇଥିଲା । ଭଗବାନ ଜଗନ୍ନାଥଙ୍କ ବିନା ଆମର ଜୀବନ ହିଁ ନାହିଁ  । ଜଗନ୍ନାଥ ଅଛନ୍ତି ତ ଜୀବନ ଅଛି । ଗତ ୪୦ ବର୍ଷରୁ ଅଧିକ ହେଲାଣି ରତ୍ନଭଣ୍ଡାର ଖୋଲାଯାଇନାହିଁ । ରତ୍ନଭଣ୍ଡାର ଚାବି ଗଲା ୬ ବର୍ଷ ହେଲାଣି ମିଳୁନି । ଏଭଳି ଅମୂଲ୍ୟ ଭଣ୍ଡାରର ଚାବି ବି ସମ୍ଭାଳି ପାରୁନାହାନ୍ତି ନବୀନ ସରକାର । ଚାବି କୁଆଡ଼େ ଗଲା ? ଲୋକଙ୍କର ଜାଣିବା ଅଧିକାର ଅଛି । ଚାବି ଗଲା, କୁଆଡ଼େ ଗଲା, କାହା ପାଖକୁ ଗଲା ବୋଲି ମୋଦି ପଚାରିଛନ୍ତି ? ରାଜ୍ୟ ସରକାର କହୁଛନ୍ତି ଡୁପ୍ଲିକେଟ ଚାବି ମିଳିଛି ? ଡୁପ୍ଲିକେଟ ଚାବି କାହିଁକି ତିଆରି ହେଲା ? ଡୁପ୍ଲିକେଟ ଚାବିରେ କେହି ଖୋଲୁନଥିଲା ତ ରତ୍ନ ଭଣ୍ଡାର ? ରତ୍ନ ନେଉନଥିଲା ତ ଡୁପ୍ଲିକେଟ୍‌ ଚାବିରେ ? ଚାବି ହଜିବାଠାରୁ ଡୁପ୍ଲିକେଟ ଚାବି, ଅଧିକ ଗମ୍ଭୀର ବିଷୟ କହିବା ସହିତ ରତ୍ନଭଣ୍ଡାରର ସବୁ ସମସ୍ୟା ବିଜେପି ସରକାର ଆସିଲେ ହେବ ବୋଲି କହିଛନ୍ତି ।

ଏହାସହ ନବୀନ ବାବୁଙ୍କ ଦୀର୍ଘ ୨୫ ବର୍ଷର ଶାସନ ରହିଛି,  କାହିଁକି ଓଡ଼ିଶାର ଲୋକ ଦୁଃଖରେ ? ନବୀନ ବାବୁଙ୍କ ଭାଷଣ ଦେବା ଶୈଳୀ ଉପରେ ବି ପ୍ରଶ୍ନ ଉଠାଇଛନ୍ତି ,ବିନା କାଗଜ ଦେଖି ମୁଖ୍ୟମନ୍ତ୍ରୀ ନିଜ ରାଜ୍ୟର ଜିଲ୍ଲାଙ୍କ ନାଁ କହିବାକୁ ଫୁଲବାଣୀରୁର ସଭା ମଞ୍ଚରୁ ନବୀନକୁ ଆହ୍ଵାନ  ଦେଇଛନ୍ତି । ଗତକାଲି ରୋଡ୍‌ ସୋ' ସାରିବା ପରେ ବଡ଼ ବୟାନ ଦେଲେ ମୋଦି । କହିଲେ, ଏଥର ଓଡ଼ିଶା ନିର୍ବାଚନର ଟର୍ଣ୍ଣିଂ ପଏଣ୍ଟ ଆସୁଛି । ଓଡ଼ିଶାରେ ବିଜେପି ଉପରେ ଲୋକଙ୍କ ଅଦ୍ଭୁତ ବିଶ୍ୱାସ ରହିଛି । ଦେଶର ଅନ୍ୟ ଅଞ୍ଚଳରେ ଏଭଳି ପରିବେଶ ନଥାଏ ହେଲେ ଓଡ଼ିଶାରେ ଭାଷାଗତ ବିଭେଦ ଥିବା ସତ୍ତ୍ୱେ ଲୋକଙ୍କ ସହ ହୃଦୟ ଯୋଡ଼ି ହୋଇ ସାରିଛି । ତେଣୁ ଏଥର ଓଡ଼ିଆ ଲୋକ ଓଡ଼ିଶାରେ ପଦ୍ମ ଫୁଟିବ ବୋଲି କହିଛନ୍ତି ମୋଦି । ଆଉ ନିର୍ବାଚନ ଠିକ୍‌ ପୂର୍ବରୁ ମୋଦିଙ୍କ ଏମିତି ବୟାନକୁ ନେଇ ଜୋରଦାର ଚର୍ଚ୍ଚା ଚାଲିଛି ।